8/2021光顧
從「不能說的秘密」到「可以講d唔講d的秘密」。朋友帶我去食私房菜，每晚只招待一枱客，夠哂私隱。菜式由一人主理，心機小菜，菜單由食客同店主商議，價錢每位計，價錢愈高菜式愈多，初初食可能會覺得菜式少價錢貴，但其實食物份量足，而且考慮到包塲的費用，其實差不多。
目前分類：中餐-粵菜 (116)
- Nov 19 Fri 2021 07:59
私房菜@觀塘
- Nov 14 Sun 2021 19:05
大公館@荔枝角
9/2021光顧
太后愛食蟹，趁大閘蟹時節，同佢食個大閘蟹餐。見到餐廳套餐菜式幾有心思，即管試下。食物味道一般，成個餐食左好多蟹粉，但蟹粉味道唔夠濃，大閘蟹質素一隻好一隻麻麻，好彩太后開正好嗰隻，我都係為搏鳳顏一笑啫。太后評語 ： 套餐質素可以，但價錢太貴，若減價三份一就合理。今次我同意。
- Oct 08 Fri 2021 14:41
太湖海鮮城@銅鑼灣
7/2021 光顧
餐廳開左幾十年，係朋友的食堂，食過幾次，水準穩定，兩個太子爺落手落腳做樓面，一個親切一個cool，好大對比😆晚市9點後有孖寶餐提供，幾抵食。菜式以當日剩下的食材再組合，要等菜單即時出，幾有趣。當晚的亮點係黃金龍蝦配煎米粉及梅子蒸鱔。
- May 14 Fri 2021 10:00
唐閣@尖沙咀
3/2021光顧
好耐之前慕名去過食點心，感覺一般，而且價錢唔平，所以就算年年攞獎都無打算再去。朋友想試個「星級午後套餐」，當然奉陪。食完後維持原判 ： 感覺一般。可能係少鹽少油健康煮食，整個套餐食物味道偏淡，食材味道亦唔突出，只有焗蟹蓋較精彩，壺茶都唔錯，最慘食完唔飽。雖然係星星餐廳，但實在唔係我心水，應該唔會再試了。
- Mar 28 Sun 2021 07:58
潤@灣仔 （二訪）
2/2021光顧
上次來食點心，食完好滿意，今次再來食商務套餐。套餐有三款點心、小菜、炒飯及甜品，食物賣相精緻，用料優質，味道濃而不膩，套餐咪睇佢每樣少少，其實夠飽。不過為食的我忍唔住加多個煙燻鵝肝，好滿足。
- Feb 04 Thu 2021 18:28
阿翁小館@天后
10/2020光顧
朋友點名要去的餐廳，去到叫我點菜，我好少食鮑參翅肚，打開餐牌頭都痕，家常小菜都要幾舊水一個，好鬼貴，套餐又唔平，揭來揭去唔知點乜好。好彩朋友最後帶我出關，講到明要食鮑魚，咁就成件事清晰哂，立馬點個套餐，因為相比起散點，套餐實在抵食。食材好，味道好，食得出係精品，餐廳裝修清雅簡約但帶貴氣時尚感，睇個餐牌似係上等人食堂。對於我，最抵係光顧可以無限時免費泊車，而且今晚結果係善長埋單，感謝🙏🏻
- Dec 15 Tue 2020 20:55
瑪寶鮮海鮮酒家@尖沙咀
- Aug 23 Sun 2020 22:58
唐人館@中環
5/2020光顧
岳少的食堂出名貴，趁佢近排做優惠，梗係要試下。唐人館尖沙咀店的點心放題已經full 哂，唯有轉戰中環店的特價片皮鴨及餐牌7折優惠。片皮鴨由$698減至$198，抵到爛，餐廳出品水準高，不過餐牌7折都死，我點完片皮鴨後，叫左幾碟青菜就算，叫做見識下高級食府。
- Apr 03 Fri 2020 23:24
文華軒@北角
2/2020光顧
北角自從開左北角匯，一下子多左好幾間新餐廳。朋友喜歡食片皮鴨，見有特價就試下。餐廳地方唔算大，十零圍左右，有海景，塲內setting 適合辦小型宴會，環境舒適，小菜味道不俗，走中價路線，整體水準可以。
- Dec 29 Sun 2019 21:09
嚐喜大不同@北角
10/2019光顧
朋友推薦，諗住係茶餐廳一間，遲遲無意欲去，食完至知原來真係有料到。貌似茶餐廳，其實係街坊小菜館。小菜選擇多，火喉足，煲仔飯好味。仲有好多菜想試，下次要約大班人去至得。餐廳晚晚高朋滿座，有心去的話，繁忙時間最好先訂位，不過訂左都可能要等。
- Oct 11 Fri 2019 23:22
再訪凱悅軒@尖沙咀
9/2019光顧
口碑不錯的餐廳，一直想來，嚟到至記起原來食過，堅痴呆，不過上次來已經係三年前，若果等做我的生意就死得。今次水準比上次好，食材處理精細，只用最嫩的部分，樣樣菜色都認真d，夾埋就係高水準的一餐。
香港食食食 (25)
