Foodie 生活雜誌

太后愛鰻魚，但香港無乜有質素的鰻魚飯，所以過來日本必食。揾朋友打去訂位話無位，因為離酒店唔算太遠，所以親自行去訂幾日後的枱，去到見餐廳無乜人，唔明點解話無位。到幫襯當晚至知原來店家每日鰻魚來貨有限，若無訂定，賣哂就無。鰻魚飯無論肉質、飯粒及鰻魚汁都係水準之作，稍嫌魚唔夠肥美。

今日喺城崎溫泉返回大阪，住番之前間酒店，喺附近行下食下嘢，晚上食埋太后最喜愛的鰻魚飯，總算使命達到。第二朝早餐後就出發去機場，搞完check in再食個lunch就上機，九日八夜旅程就喺吵吵鬧鬧中渡過。

旅館坐落湖邊，並非喺城崎温泉街一帶，有shuttle於城崎溫泉JR站接送。旅館有三十間房，房間舒適，環境幽靜，晚餐ok，早餐不俗。若唔想住温泉街咁熱鬧，可以考慮過來住下，不過旅館的温泉環境一般，若你係温泉精，建議喺温泉街浸左幾個傳統温泉再過來。

湯村溫泉的住宿比較平實，揀的時候有點難度，反正為温泉而來，最後決定以温泉的環境取決。呢間無論裝修及服務都好傳統的中型温泉旅館，老闆係女士，喺晚餐來打招呼，用英文寒暄兩句，一個女人要掌管咁大間旅館，真不容易。旅館有點歷史，但整潔乾淨，該有的設施及服務都有了，膳食水準一般，温泉比相片遜色，但總體不過不失，價錢實惠，可以一住。

今日開始三日兩夜温泉之旅。好耐無去旅行，技能生疏哂，功課做唔足。好似坐JR，只記得喺香港訂定個JR pass ，完全忘記左予約席呢樣嘢，直至confirm 時間至記得，好彩做得切。之後又忘記睇清楚接駁巴士時間，結果又呆等一個鐘，而且真係唔認老唔得，反應慢半拍又無記性，好多時要confirm再confirm，真頭痕。

今日去京都，先去三户室寺睇繡球花，因為下一班巴士要等成個幾鐘，所以捉左太后去搭的士。太后咁慳家，成日話的士個錶跳得快過佢心跳，所以短短車程見佢坐得唔安樂，因為怕貴😓(結果價錢係千八yen)。去到三户室寺見到一大片繡球花，太后即時開心哂，佢好叻，上埋樓梯去寺廟睇荷花。

今次行程無乜點訂位食飯，好彩原來酒店附近好多不俗的餐廳，我行過經過就入左呢間鮨店。因為個額頭鑿住遊客兩個字，所以侍應只比左Omakase餐牌我，兩個價錢，我點11000yen的，質素同香港食開的差不多，係間中一兩款做法新鮮點。chef識講英文，有主動同我傾偈，原來佢朋友喺香港Arbor做二廚，我又剛剛去食完，大家即時拉近左少少距離😝

Day 4 （大阪 - 近江八幡 - 大阪）

去日本點都要食餐fine dinning，大阪選擇無東京咁多，出名的更是一位難求，喺網上揾間合眼緣的就算。呢間可以網上訂位，無需預先付款。菜式有創意，味道好，氣氛casual，侍應落力將每道菜的介紹用手機翻譯成英文，好有誠意。今餐食材以魚為主，感覺有點重複，不過價錢合理，食有所值，若同酒友來，點埋wine paring 就完滿。太后一邊食一邊讚，深感安慰。

呢次真係行過經過，唔好錯過。我地喺酒店行去搭地鐵途中見到到呢間餐廳，靚靚西洋古董裝修，決定隔日幫襯。餐廳其實係連鎖咖啡店，開喺呢間有50年歷史的前銀行內，好有氣派，成件事upgrade左。餐廳內有餅房，麵包新鮮出爐，款式又多又靚，啱哂太后。喺呢個咁靚嘅地方食早餐，高級哂😆

厚多士軟綿綿，好食

昨日景點撲空，午餐又要捱餓，苦了太后，今日當然要鬆一鬆，全日食買食就好了。先去開喺有90年歷史的舊銀行建築內的咖啡店嘆早餐，之後出發去新開的lalaport門真市outlet，出發的時候仲落雨，不過好彩之後放晴。outlet 貨品唔啱我，主要係為太后而來，因為佢成日覺得outlet平，要去outlet至肯買嘢，好彩最後都買左兩對鞋，滿載而歸。今日我醒，先回酒店唞下，晚上再帶佢去預先訂好位的法蘭西餐，今次佢有讚好了，真識食。

晚餐諗唔到食乜，去google map揾食，G神話呢間幾高分，就咁話。餐廳喺酒店後面，細細間，門口有個茶室的入口「躙口」，幾特別。內裡面積好細，只可坐十多人，由兩夫婦(?)主理的居酒屋，部份食物放在吧枱，似潮洲打冷，每樣食物上面以代碼標注價錢，幾得意，另外再有餐牌點菜。菜式以送酒小食為主，我見到啱食就點，唔算好美味，但好有風味。坐坐下隔離枱的人同我地傾偈，問我廣東麻雀筒索萬點讀，好搞笑，離開時門口的兩位客人又同我打招呼，原來二人分別係居港三十年回流及喺上海做左十幾年生意的日本人，好彩無講日本人壞話😅佢地話平時餐廳通常滿座，我今日好彩有位。一餐有趣的晚餐，旅行就係想要呢種樂趣。

一早諗住同太后去妙見之森坐小火車同吊車睇綉球花，等佢唔使日日行商場，點知去到至知當日的車休息😫無所事事之下經火車站旁餐廳的小姐推介去左附近神社，結果係完全無嘢睇。中途太后仲喺水渠內見到一條小蛇，差點嚇死。帶住失望之心情返回市區，諗住食饅魚飯，揾到間幾出名的，可惜我太天真太傻，試問一間出名的餐廳點會有位？結果當然係滿席。太后已經好肚餓，只好求其喺隔離食碗拉麵就算。

我唔鍾意太熱鬧，所以無選心齋橋一帶的酒店。酒店位置係本町，離心齋橋十分鐘左右步程，去大阪站要坐地鐵出入，酒店離地鐵站約五分鐘步程，地鐵站有電梯到地面。酒店開業一年，好新淨，今次住左premium 及standard 兩款房間，面積及設備都滿意，最特別係有露台，啱哂草根的我晾下衫。大堂有免費飲品供應，一般商務酒店的寄放行理、洗衣機、微波爐等設施齊全，附近好多不俗的餐廳，隔離有百貨店及開到午夜十二點的超市，生活機能極好。我好滿意間酒店，連一入門的香氛都好舒服。唯一微言係酒店唔肯幫我打電話去餐廳訂位🥹

太后愛牛脷，當然一定要安排。唔想㨂車站的連鎖店，揾左呢間有三間分店的燒牛脷店。牛脷用炭燒，有焦香味，食味真係好得多，牛脷質素不俗，肉質柔軟，厚薄適中，太后比左四分呢👍🏻雖然話係心齋橋店，但心齋橋區好大，小店喺心齋橋外圍的小街。不過就喺我酒店附近，行十分鐘就到，幾方便。

去日本點都要食餐串燒，儘管太后無興趣，我都唔理佢。跟住推介揾美食，去左呢間串燒店，喺心齋橋筋對面，近難波車站的小街內，因為無book位，等左45分鐘。串燒平靚正，不過好似得我一人食咁，實在無癮，好懷念我的團友。

Day 1

2023 大阪遊 行程篇