日本食西餐我好少彈，但呢間真係好唔得，餐廳的評價不俗，食物其實ok，但服務真係好奇怪。餐廳類似私房菜，確認訂位前會email問客人有乜唔食，我話有一個朋友唔食牛，其他人乜都食，餐廳答覆唔可以，因為佢地餐單有牛，唔可以為一個人而改，咁我咪唔訂囉，點知轉頭餐廳又回覆話若四個人都唔食牛就得。我無所謂，反正又唔係前世未食過牛，只係想試下廚師的創意。
餐廳setting 係一張木製長吧枱，open kitchen，爐頭同料理台都喺一邊，工作枱及洗碗zinc盤喺另一邊，我坐洗碗盤嗰邊。全餐廳只得一個主廚一個二廚及一個外塲。結果係chef由頭到尾無行過過來，外塲就由落單至上菜，備菜至洗碗都做哂，見佢又要上菜又要幫手準備食材，之後仲捲起衫袖去洗碗，洗完碗又去備菜，個袖濕淋淋，感覺唔係好衞生。
浸左咁多年温泉，唯一一間我會再度入住的旅館。喜歡旅館的低調豪華，高雅大器。旅館有11間客房，全部為獨幢小屋，分佈於竹林四周，環境幽靜，每間房的面積及設計都不同，所有房間都附設風呂。之前入住最小的入門階房間，今次見有特價，四人入住獨幢的紫炎庵，倘大的露天温泉，仲有分足湯、卧湯、內湯，兩餐於屋內飯廳進食，全程可以足不出户，儼如入住私人温泉酒店，實在係頂級享受😎
朋友去完覺得讚，睇佢影的相覺得唔錯，又試下住。小型旅館，似家庭式經營，房間乾淨舒適，天然温泉係賣點，但泉水勁熱，要自己翻湯，搞搞下都無心機浸，職員服務普通，兩餐膳食非常一般，價錢同之前的奥日田温泉 うめひびき只差五千yen左右，旅館水準一般，加上黑川溫泉有好多選擇，我唔推薦呢間。
餐廳喺黑川温泉民居內，離温泉鄉有點遠，我因為喺兩間温泉旅館入住時間的中間要揾食，喺google map揾到呢間餐廳。去到至知餐廳原來係由一對七十幾歲的夫婦經營，丈夫掌廚，太太做外場。Chef喺世界各地不同地方做過廚，唔識英文但好生鬼，我係用IG訂位，以為係佢的子女幫佢管理IG賬戶，原來係佢自己搞，真心佩服。西餐廳，環境舒適味道好，pasta好好味👍🏻飯後大廚好好人，話要車我地去旅館，見佢好在型咁同老婆單聲，再fling住條車匙叫我地跟住上車，一副溝死女咁款，好搞笑。我地當然唔想麻煩老人家，再三推搪至推得甩，真係太感謝，呢餐食得好開心。
跟住專家浸温泉。人地follow我，我都follow人，温泉達人去親都係好地方，佢揀親的旅館都係品味之選，雖然佢住靚房，但我住基本房都滿足。旅館位於奧日田，離日田車站12公里，旅館感覺沉實優雅，最欣賞旅館細緻的裝修，木雕窗花門框，牆上的浮雕，全館窗明几淨，一塵不染，温泉除左基本的外湯及內湯、仲有寢湯及活盤浴，加埋本身房內的風呂，真係想多幾個body。早晚餐出品一般，不過若天氣好，食完早餐可以移施室外望住溪谷嘆咖啡，都係一個亮點。整體住宿感覺良好，推薦👍🏻
去日本其中一個指定動作係食鰻魚飯，餐廳已bookmark 多時，今次順路可以去。餐廳在遊遊區豆田町內，從車站坐的士去約十分鐘左右。鰻魚飯三食，加湯嗰種。鰻魚烤得香，但唔夠肥美，而且切得幼，無啖啖肉的感覺。整體來講好味但唔算出色。不過枝山椒粉好香，外面的小店有售，我都買左枝回家食。
今日開始温泉之旅，今晚會入住位於奧日田的温泉旅館，午餐食鰻魚飯，本來只係一心去食餐飯，點知餐廳原來喺旅遊點豆田町內，所以變相去多個點。原來豆田町有「九州小京都」之稱（日本真係有好多小京都😁）仍然保留往昔的城下風情及建築，好多懷舊小鋪，慢慢行都幾舒服，不過我要食飯又要番車站坐温泉接駁車，係咁二行一陣就走了。
福岡好多地方shopping，JR博多站及天神最熱鬧。我喜歡行小店，會行天神後街的今泉區，今次去遠少少，行藥院區，嗰邊無大商場，但小街內好多ZAKKA店、cafe及小餐廳，我好鍾意。行完去食晚飯，但唔記得當日係星期五，無訂位食飯，我對餐廳有點揀擇，可憐團友又要陪我四圍行。最後揾到間串燒都唔錯，食完就回酒店休息了。
烏冬係我日本揾食名單上其中一種食物，通常揾d獨立店，唔去專門店。餐廳出品的烏冬晶盈半透明，去到大家都被季節限定的牡蠣鱈魚子烏冬吸引，加上剛食完大堆麵包做早餐，食唔落其他小食，所以只得一張食物照。其實店內有多款烏冬選擇，麵質柔軟中帶煙靭，好食👍🏻餐廳聲稱烏冬係即打即切即煮，天婦羅都係即炸，好新鮮。
第二次入住Miyako 集團旗下酒店，之前大阪店好滿意，今次博多店更滿意。首先係地理位置優越，酒店喺博多車站紫筑口一出步行幾分鐘就到，無博多口咁繁忙，但餐廳便利店藥房一應俱全。酒店B1直駁地鐵站，落雨不怕落雪也不怕。房間面積合理，雙床房夠開兩個喼，衛浴乾濕分離。酒店頂樓有温泉，行完一日的最佳享受。
香港食食食 (25)
