Foodie 生活雜誌

應該係之前龍皇個位？點心不過不失，反而欣賞店內服務員，大部份都係年輕人，雖然生手但態度好，服務殷勤。現今社會富裕，好多年輕人都養尊處優，唔似我地當年一畢業就要工作，所以今時今日見到年輕人肯入行工作，真係會心存感激，盡量包容，想佢繼續做落去🙏🏻

2/2023 光顧

澳南好熱鬧，乜都有得食，呢間餐廳好旺場，假日訂過幾次都訂唔到。新派中式小店，點心選擇多，新潮懷舊都有提供。食物中規中矩，不過半開放式坐位對住靚靚海景，又歡迎寵物至係賣點。

1/2023光顧

飲茶係新年的節目之一，所以呢餐係一個星期內第三次飲茶。一般酒樓店心味道，只係燒賣太多肥豬肉、馬豆糕的豆太硬，豬手咬唔開，豉油雞見紅僅僅熟，小籠包入面無湯，蝦餃皮太厚…….咁係咪即係唔使去?

1/2023光顧

點心質素高，賣相平實但質量扎實，雖然係酒店級價錢，但出品水準比好多酒店高。

1/2023 光顧

朋友仔上網買Q旁，食點心放題，原價$288，特價$199。我一向覺得放題唔抵食，因為點心紙內都係一般點心，貴價的如灌湯餃就一定無，不過朋友咁有興致，當然奉陪。任食點心選擇唔算多，不過出品算不俗，只係川菜類小食無乜味。開店頭一小時只得兩個侍應，其中一個似兼職，乜都唔識，我坐卡位，侍應可以企喺我張枱度將個茶壺跨過我張枱遞過對面枱，我望住佢都無言以對。睇過晚市餐牌，收費唔平，將軍澳真係一個高消費地區。

8/2022 光顧

好有鄉村feel的酒家，唔知以為返左國內二線城市。我個人膚淺，睇餐廳外表諗佢唔荒好食，結果當然係我錯啦。酒家新裝修，地方好大，點心選擇多，蒸炆炸的水準都不俗，喺附近住的朋友可以一試。

6/2022光顧

5/2022 光顧

酒店內的中菜廳，環境舒適，點心味道不俗，炸物不油不膩，份量足，大大碟，不過限時90分鐘，最好等齊人至好入。

1/2022光顧

太后的朋友話好食，叫我帶佢去，咁梗係要遵旨。餐廳喺美利酒店旁，似搭出來的玻璃屋，幾趣緻。一坐低知道係某集團𣄃下的餐廳已無期望，結果質素真係麻麻。我知道去酒店附屬的餐廳價錢係貴，因為包埋環境及服務，但呢餐真係物非所值，我點左幾款點心，見唔對路都唔再點，止蝕離場，一向埋單唔手軟的朋友都呻左兩句。可能八字不合，以後要會小心點，避免再幫襯呢間集團旗下的餐廳。

12/2021光顧

而家香港食飯愈來愈難訂位，朋友星期六晚話要星期日去中環飲茶，我打定輸數揾唔到位，點知比佢揾到呢間喺橫街內，裝修靚靚的中菜館。不過點心質素普通，蝦餃燒賣大大件，無點心感，食價比低，試過就算。

11/2021 光顧

高級中菜廳，又係嗰d用貴價材料去做一般點心的餐廳，但味道並不突出，一係偏濃一係偏淡，最出色居然係經理的介紹。餐廳喺渣打銀行總行地庫，食服務食擺盤食環境食裝修多於食味道的西式中菜，偶一為之，叫做見識下城中人氣餐廳，感受下氣氛。

9/2021 光顧

4/2021光顧

長假期無地方去，行下大館，順便喺度食埋午餐。大館開左好多餐廳，想飲茶，之前食過Madam Fu，今次試新嘢，揀左Chinese Library，不過假日只做點心任點任食brunch，點心款式選擇唔多，好彩味道唔錯，賣相亦幾精緻。其實我唔多鐘意食點心任點套餐，因為通常選擇大路，而且實際唔係食到咁多，除非係有食力之人，否則散點反而仲多選擇，而且埋單會平過任點任食，所以呢餐我無比錢，迫人請我食😜😜

2/2021 光顧

貴價精緻中菜館，食過中環嗰間，覺得唔錯，尖沙咀店之前推出點心任點，一位難求，今次善長想試，梗係舉腳贊成👍🏻點心任點已完，點餐回復正常。點心真係有水準，尤其係碟叉燒，小朋友食到舔舔脷，裝修又靚，不俗的餐廳。雖然餐廳今期無參加coupon 計劃，但為左保住生意都有做8折，易book位好多。

11/2020光顧

10/2020光顧

公眾假期想飲茶，心水餐廳全部無位，可能呢度價錢較高，位置較徧，所以book到。餐廳走高級粵菜路線，菜式精緻，味道濃淡適中，幾好食但又唔係好突出，餐廳裝修清雅，坐得舒服，不過價錢唔平都要分兩輪，真無奈。

9/2020 光顧

8/2020光顧

7/2020 光顧

新派點心，味道較重，但唔算口渴，可以接受。點心精緻，不過好快上枱，唔係即點即蒸。餐具有點殘舊，餐廳係去年12月開張，唔明點解咁快咁殘舊。整體麻麻，試過就算。

6/2020光顧

點心精緻，配搭有心思，味道不濃不淡，剛剛好。點心通常一客三件，個別點心可以遂件點，兩位起，好似我今次兩個人就唔使夾硬食三件。