Foodie 生活雜誌

年紀大唔食得多，尤其係和牛，所以盡量貴精不貴多。餐廳走高級路線，獨立房間，專人招待，食材高質名貴，以靚和牛配合魚子醬、雞泡魚白子、舞茸等高級食材，煮成一道道精美菜式，無太多的調味，盡量保留食材原味。全程由專業的侍應即席主理，又睇又食，滿意👍🏻有幾款套餐選擇，兩位起，不過兩位的套餐選擇有限，要選價錢較高的，一人前就諗都唔使諗，多謝好友陪我來❤️

今日去左一開幕已想去的角川武藏野博物館，行完後原本想去銀座shopping，但居然遇到大雪！被困於無乜嘢行的商場內，乜都買唔到，叫做慳左錢。晚上去一早訂好的餐廳食飯，原本行過去十幾分鐘就得，但天雪路滑，行得好呢hea。飽餐一頓後諗住豪下叫的士回住宿，但太大雪，好多車都比人叫左，唯有踩住再濕濕淰淰的地下行去坐車。

每次去築地都係食海膽飯同生蠔，今次突破安全帶，食個18品餐。

今日同朋友仔離團逛街街，先去築地本願寺咖啡 Tsumugi 食18品早餐。嚟左N次築地，第一次行本願寺，所以話東京總係有未行過的地方。之後去新開的麻布台hill，同六本木hills、表參道hills 一樣，都係結合藝術與建築的作品，為市民提供一個多元化的生活空間。入去見到pelican cafe，忍唔住又食。之後轉塲去吉祥寺逛，食埋晚餐高就返歸了。

返回東京都係住上野，不過係另一間airbnb。呢個單位喺上野同淺草中間，近淺草，裝修有點舊，但尚算清潔。不過有四房一廳，價錢又可接受的單位，喺東京應該唔易搵。單位離上野站步程約二十分鐘，建議行十分鐘喺地鐵入谷站出入。住宅區，晚上較靜，樓下有餐廳及便利店，尚算方便。

食完早餐後坐JR回東京，今日都係離團自由行。我喜歡四圍逛，乜都睇一餐，唔係個個頂得住，所以一個人逛最自由自在。今次行左想行好耐的合羽橋及其周邊。合羽橋近淺草，賣廚具為主，即係香港的上海街，鋪頭開滿大街兩邊，貨品包羅萬有，可以行足一天。附近有不少個性小店，但幾分散，好考腳骨力。晚餐食鰻魚飯，飯後去左澡堂，天寒地凍，浸浴最疏肝😁

今日我離團自由活動，來個仙台city walk。先去食pancake 作早午餐，見G神比小店幾高分，點知誤入粉絲店，食物出品一般，可能係粉絲大本營所以高分。之後行下飲下咖啡，因為天氣凍又無乜好行，我番酒店睇youtube hea下仲舒服。晚上會合團友食飯，簡單的一天。

酒店位置非常好，樓下就係地鐵站，對面係JR站，行幾分鐘就到仙台朝市。一般連鎖酒店規格，房間可能用色較深沉及太簡約，不夠亮麗。之前未住過呢個品牌的酒店，入住後感覺整體不俗，日後都會例入我考慮範圍。

離開藏王雪山，去山形食米沢牛做午餐，中途加插左一個特別節目(有興趣請睇掛衫張相的描述)，結果落到仙台已經旁晚，行左一陣商店街又食晚餐，今晚又係食牛，雖然係我好喜歡的牛脷，但午餐的和牛實在太膩，差點食唔落。

酒店check out 後上藏王雪山，今日天氣好差，上到山頂當贏。以為就算睇唔到一大片樹林都可以近距離睇到棵冰樹，天真的我實在太小覷大自然的威力，山頂上大風大霧，能見度極低，莫講話冰樹，路都睇唔到咁滯，好恐怖。夾硬留左一陣，職員已通知因為太大風，纜車將停駛，要遊客落山。落到山中間，已經係另一個世界，剛剛山頂的悪劣天氣仿似從無發生。大家開開心心影下雪景就離開。

喺妙乃湯享受完早餐後就出發去蔵王，因為車程遠，所以無景點，只係中途停留食左個lunch ，喺SA去個廁所。晚上住宿蔵王國際飯店，喺正滑雪場隔離，若真係來滑雪就非常方便，但好似我地咁，唔係滑雪又自駕，可以選擇住附近，因為呢間旅館都幾貴，房間一般，膳食唔得，服務好hea，唔值。

一開始當然又要多謝團長先啦🍻乳頭温泉的旅館同銀山溫泉一樣，一向難訂，其中最受歡迎的鶴心之湯及妙乃湯更加係一房難求，今次團長訂到，又肯臨時加我入去，仲要讓埋間大房比我地三個人住，非常感謝。

今日開始左我不停讚頌團長的行程。話說乳頭温泉及藏王雪山係我睇左人地遊記N次，但從未想過去的地方，一來我怕凍，二來怕自駕危險。但團長有雪地自駕經驗，令我好安心，知道佢會去呢個地方，仲要訂到妙乃湯，即時二仔底死跟。到左白茫茫的乳頭温泉，買左温泉巡遊帖，試左幾個露天温泉，玩埋混浴，過足癮👍🏻

今日先去宮古市魚菜市場，行程聲稱有海鮮浜燒，我心目中係好似八户咁熱鬧，去到至知係小市場，當日仲無得燒，好彩有幾檔海鮮檔可以買刺身，團長又食到佢喜愛的新鮮元貝，目標達到。餐後去淨土之濱，沿住海岸線行去海灘，冬日的海岸特別寧靜，陽光伴海鳥飛翔，幾舒服。跟G神食完個豬扒飯午餐就回盛岡市行街。晚餐團友們去食盛岡冷麵，我無興趣，一條友做孤獨試食家去食串燒，再行下AEON就回酒店休息了。

Richmond係我喜歡的酒店品牌之一，通常選房間面積23平方的雙床房，近火車站，房間配套齊備，整潔舒適，價錢合理，去鄉下地方通常租呢個品牌，有埋停車場，唔使諗，今次住盛岡的三人房居然有部LG的衣物護理機，好好玩，張相仲為我呃左九百幾個like，真係開page多年以來首次有呢個數字😝😝

平日的盛岡市晚上好靜，當晚想食西餐，G神揾到啱心水的餐廳又無開，只能憑感覺揀。餐廳係獨棟小店，工業風裝修，小酒館形式，菜式屬多元化創作料理，啱哂愛新鮮的我。我地一行五人點左幾個小菜，份量足味道好，價錢勁平，幾百至一千yen就一個菜，抵過自己煮，若我用香港的物價計，真係唔知佢點維生😅不過睇tabelog 只得3.12分，所以話，有時都要自己試下至知啱唔啱食。

一早去松島海鮮市場食海鮮丼做早餐，之後出發去猊鼻溪坐船仔，又係一個我自己唔會去，跟人去又唔抗拒的地方。原本團長心目中想睇的係冰封世界，可惜今年迎來暖冬，只睇到枯枝。午餐食前沢牛，食完去另一景點 :嚴美溪。景點似荒廢左咁，吊橋停開，涼亭又欄住左，不過見到積雪的溪流都幾靚，係咁二行個圈就走。落番盛岡市已經入夜，靠G神揾食居然揾到間又平又正的餐廳，大家都好滿意，飯後回酒店休息了。

經airbnb訂的住宿，應該係當地人的渡假別墅，平房一層過，兩間房加超大客飯廳，所有家用設施一應俱全。步行五至十分鐘可以到便利店，駕車幾分鐘可到附近餐廳食飯。住宿兩旁係温泉酒店，其中一間提供日歸温泉。民宿寬敞舒適 ，若去松島住宿，係一個好的選擇，多謝團長揀到好民宿👍🏻

一早坐8點出發的JR上仙台，大家都係晨型人真係好，早出發感覺時間好用得多。去到仙台攞車開始自駕遊，先去摘士多啤梨，真係夾下唔同人至有新體驗，我自己排就一定唔會去，但原來又幾好玩，邊摘邊食爽YY。之後去松島，我之前去過，無乜好做，但都叫做有四圍行吓，但團友們行完瑞巖寺食下嘢就算，居然連個海都無望過😅。之後就直去airbnb住宿，晚餐去買七仔搞掂，雖然住宿無温泉，但附近有日歸温泉，作為温泉精的我當然唔放過，浸完終於感覺到開啟旅遊mode了。

事緣我喺雜誌見到有個以白子為主要食材的「痛風鍋」，愛白子的我豈能錯過。餐廳以食貝類為主，年輕廚師掌廚，有板有眼，態度友善認真，點左套餐再追加其他食物，貝類新鮮，但痛風鍋則同相片好有出入。我地好早食，走的時候已坐滿客人，其中一個客人同我地傾偈，仲話餐廳係區內名店呢👍🏻