Foodie 生活雜誌

7/2023 光顧

成日以為係茶餐廳，一直無興趣，朋友提議去食晚餐至知原來係小菜館。食物水準不俗，價錢合理，最重要有個外塲cindy姐，Cindy姐喺利苑同龍皇做左十幾年，好有經驗又敬業，詳細介紹餐廳菜式及服務，除左招牌菜式，仲可以選擇特定菜式叫師傅煮，佢話餐廳出品的海南雞飯都唔錯，令我有再回頭的想法。所以話，師傅係餐廳的靈魂，外塲係師傅同客人溝通的橋梁，一間成功的餐廳真係要有優秀的外塲。

5/2023光顧

每日有海量的飲食介紹文章，睇下試下，試得多就會知自己同邊個筆者啱口味，邊個唔啱。啱嗰d固然會一直睇跟住食，唔啱嗰d我都會繼續睇，因為咁樣就會令我剔走好多餐廳。

5/2023光顧

餐廳喺美孚開店時好受歡迎，想幫襯時已遷址尖沙咀，再想幫襯時又遇上疫情，一波三折下終於可幫襯。地方光猛舒適，菜式選擇唔算多，但設計幾有心思，味道不俗但稍嫌油膩，價錢合理，可以作為尖沙咀區食小菜的選擇。

2/2023 光顧

餐廳喺以前長樂街新兜記個位。小菜選擇多，食材實在，煮功扎實，鑊氣夠，價錢少貴，當晚食左幾個菜式都唔錯，可以再來，不過真係坐得好迫。

1/2023光顧

唔係朋友仔介紹都唔知小巷內有間小菜館。街坊格局，實實在在，小菜有鑊氣，重油水重口味，大牌檔本色，煲仔飯夠火喉，價錢實惠，難怪大排長龍。不過出品較油膩，頭兩昧都覺得唔錯，但愈食愈滯，幾重負擔。

1/2023光顧

久仰大名，擇日不如撞日，終於有機會食到。菜式多樣化又有心思，味道不俗，服務好好，近年裝修過，環境光猛舒適，可以再來。

1/2023光顧

太古城又係一個唔知食乜好的商場，好似外圍的餐廳比較吸引。行過見到呢間有哂排隊圍欄，雖然當時無人排隊，但感覺好似幾勁咁，喺我在門口睇緊餐牌時見後面開始有人等位，死唔蝕底入左去先。小菜同煲仔飯質素不俗，不過煲仔飯的餸就少左d囉。

12/2022 光顧

好多年前食過，我覺得呢間係西貢海鮮店中的精品店，不過去得精品店就要預左比貴d。地方企理，擺碟簡潔，唔會亂糟糟，招呼好，我喜歡。

11/2022光顧

餐廳食順德菜。原本以為係普通餐廳，原來係私房菜，去到至知全部獨立房間，我當晚係因為其中一枱客唔介意同人share房間至比到張枱我。餐牌簡單，得兩頁，大部份係好多餐廳唔願做的家鄉手工菜，味道唔錯，因為第一次食加上大家食力有限，下次要約多d人試埋其他嘢。

9/2022光顧

朋友仔帶我去食好嘢。餐廳喺小路盡頭，細細間，個名叫大排檔，其實係小菜館。食材新鮮，烹調認真，味道唔錯。餐廳地方細，三張大枱兩張細枱，最好先訂位。

9/2022光顧

多年前來過，印象奇差，覺得係呃鬼佬的餐廳，之後black list 左多年。最近先後聽到兩位朋友稱讚，又試下。今次對餐廳改觀不少，晚餐小菜精緻，味道不俗，價錢合理，地方清靜寬敞，枱與枱之間距離濶，感覺良好。

7/2022光顧

好少去石門，同太后去嗰邊辦完事順便食飯，去開飯網揾餐廳，完全無心水，想起住附近的朋友，揾佢推介，咁啱佢介紹呢間同太后朋友推介的一樣，當然要試下，可能我當日食運不佳，食物唔多啱口味，試過就算。

6/2022光顧

11/2021光顧

新派粵菜店，擺碟精美，菠蘿飯上枱時來個火焰燒，薑汁芥蘭都雕哂花，碟頭細，份量啱哂兩公婆或小家庭。餐廳無論菜式及擺盤都令我想起另一間餐廳「唐宮小聚」。我地四個人點九碟餸至夠食，而且食物味道唔知點解好似樣樣差不多。我懶得寫，睇相算了。

12/2021光顧

又一次中左開飯網好評䧟阱。睇介紹話係高級粵菜，食完後只覺得無論食物、環境、招呼都無樣高級，只係升級版小菜王，好彩係價錢都唔高級啫。餐廳經理熱情地介紹招牌菜，可惜我唔啱食，只揀左咕嚕肉，其他小菜就麻麻，見到餐廳全塲客滿，好熱鬧，枱枱都點差不多的打咭feel菜式，可能要點招牌菜至好食卦。

9/2021光顧

印象中係貴價中菜餐廳，專食鮑參翅肚，所以開業多年都無想過去。朋友食過話唔錯，想再食，所以又試下。唔知係颱風關係，餐廳準備不足，定係廚房太遠，大部分菜式都唔夠熱，犯左中菜大忌，小菜賣相亂糟糟，收咁嘅價錢，完全物非所值，可能真係要食鮑參翅肚至能食出水準。

9/2021 光顧

朋友喜歡咕嚕肉，下午經過見到餐廳以咕嚕肉做招牌菜，立即話要食，即時book位夜晚再去。結果真係只得咕嚕肉比較好食，其餘菜式味道麻麻。

9/2021光顧

同朋友玩懷舊，突然想食泉章居的鹽焗雞同炸大腸，記起上環仲有一間，幾個老鬼走去想當年。唔知係想當年要求低定食物質素真係下降左，除左鹽焗雞，其他食物味道真係麻麻地，可以正式講再見。

9/2021 光顧

喜歡的中菜廳，食物精緻美味，裝修高雅舒服，係背景音樂大聲左d，侍應親切服務好，雖然價錢唔平，份量又少，但大廚成日有新菜式，隔一排會食下，就當食西菜fine dining 好了，二人食剛剛好。

9/2021 光顧

介紹讚到飛起，話菜式色香味俱全，仲有日落靚景陪食，加上打去訂位時做緊奄仔蟹套餐，太后愛食蟹，當然立即預訂，好彩趕得及套餐最後一日供應期。餐廳環境開揚舒適，食物味道不俗但一定唔算好味到識飛，餐廳走中菜fine dinning 路線，擺盤靚。除左餐牌上的菜式以外，餐廳定期推出不同套餐，啱晒唔想諗的食客。侍應殷勤有禮，要垢病的應該係交通，實在太遠。