Foodie 生活雜誌

今日由Rovinj 番Zagreb要揸3個鐘車，中途停Opatija食個lunch 行下。回到Zagreb都係住番旅程第一日住的apartment ，有始有終😁晚上又去舊城，食左餐非常滿意的晚餐後就結束一日行程。第二朝好忙，兵分兩路，駕駛員負責還車，其他團友臨別秋波，先返去高質早餐店Broom 44食早餐，再補買香水，之後就出發去機場搭機返香港，完結今次克羅地亞之旅。克國真係一個好好的旅遊地點，大推👍🏻

今次的行程有好多留白，反正有車，就讓個天安排好了。睇資料時知道ROVINJ附近有松露有葡萄酒產區，但又無乜遊記可參考，決定跟地圖走，好好享受自駕遊的樂趣。先去Buzet ，聲稱係Town of truffle，但可能我唔識揾，只揾到一個賣truffle 的地方，之後經介紹又去左Motovun酒廠，又再經介紹去左Lim fjord 小峽灣食晚餐，今日上天安排的行程好好啊，感恩❤️

來Zadar只係中轉站，比駕駛員休息一晚，所以求其兩房一廳有位泊車就得，最緊要價錢唔貴，　估唔到呢間平靚正👍🏻

喺Hvar揾合心水的住宿唔容易，古城嗰邊價錢貴，揾揾下去左Jelsa，試下住山區小屋。

今日又係無所事事遊車河。先去昨日幫襯的手信店介紹的橄欖油工廠行下，再去小港口食雪糕，之後回古城晚餐睇日落。今日一早出門口時已經行雷落大雨，諗住今日係咁大，感謝老天，我地一落車就停雨，之後仲要放晴，直到晚上，阿門。

因為自駕，古城唔準車入，當然亦無可能泊車，所以揀左離古城十五分鐘步程的兩房apartment。

作為晨型人，諗住趁朝早無乜人，自己去行埋昨日未行完的城牆及堡壘fort lovrijenac。因為買左Dubrovnik pass，諗住可以無限次進出景點，我實在太天真，結果無得再上城牆之餘，仲因為我一早自己上左fort lovrijenac，無得再同團友一齊上，結果要一條友喺下面呆等。

話說喺城牆行左幾個鐘，又熱又攰，想求其揾間餐廳坐低抖下，但我死性不改，真係好難求其，可憐的團友們又要陪我喺城内四圍行，結果揀左城內最頂的餐廳，行死佢地，仲要喺外面等左一陣子至有得食。餐廳係歐洲田園風裝修，望住古城的屋頂及大海，似宮崎駿「魔女宅急便」的塲景。餐廳有個大大的烤爐，因為last order，我地只點左燒squid ，沙律及飲味。食物架好食，環境又靚，感謝團友們的相就🙏🏻

連續兩日都會行古城，車唔能夠入古城，城外亦無位泊，所以呢兩日都唔會用車，訂住宿時一定要揀有車位的。由住宿行去古城只需十五分鐘，好彩喺間靚景餐廳食完早餐就行城牆了。因為留兩日，買張Dubrovnik pass 方便d，個pass包左大部份的旅遊點入塲券及可乘坐多條巴士線，用來去厠所都抵，喺門口scan個QR code，即塲買就得。不過記住每個景點只可以入一次，我就因為無留意呢點，影響左行程。

​

昨晚落左場大雨，一早起身仲天陰陰，睇天氣報告都係多雲，總之唔落雨就當贏。弱智的我睇左好多介紹都分唔到上下湖區，以為上湖區係精華所在，揀左條以為係只行上湖區的H線，好彩結果係行哂上下湖，無miss 過美景，不過團友就慘了，行足六小時，攰死。

睇到呢個天氣報告，內心一沉

十六湖附近有好多住宿，若住湖區內的酒店，買湖區一日票可以用兩日。我揀左住外圍小木屋，離entrance 2 只需5分鐘車程，一樣方便，當然門票係一日算一日。

住屋介紹 : 兩層木屋，兩房一廳，一衞浴及一洗手間，廚房基本設備齊全，有洗衣機及晾衫架，花園有燒烤爐，包車位。木屋新淨，非常清潔，被鋪一塵不染，不過抽水馬桶較弱，住左兩晚，臨走時塞塞地。

正式開始自駕遊，駕駛員開工了！線係係Zagreb 至水車村(Rastoke)再去十六湖國家公園。開車無耐已落雨，雖然話個零鐘頭車好近，但因為要熟習下架車，加上天雨路滑，叫駕駛員慢慢揸好了。去到水車村，泊好車搞下泊車咪錶，坐低食飯都兩點了。食完行個圈，Rastoke有迷你16湖之稱，十幾間紅頂小木屋分佈喺山坡上，夾著小瀑布，似童話小村莊，可惜天陰有雨，景色打左折扣。離開後直駛今晚住宿，懶得四圍行，去超市附近買簡單食物自煮，留喺靚屋嘆下。

又去菜市場，想睇昨日無開的魚市塲。

呢間喺露天市場旁的小店，供應早午餐，食材新鮮健康，配搭有新意，最重要係好好果，我喺Zagreb留三日食足三日，講比少爺仔知，佢都話 ： 好少餐廳你會去咁多次，一定好好食👍🏻佢真係愈來愈了解我。若香港有間咁好出品的餐廳，我一定每星期幫襯。有機會去Zagreb而又喜歡食呢類健康cafe早餐的朋友，誠意推薦你來試下👍🏻

前一晚瞓飽左，天一光就起身。今日的節目係漫遊Zagreb 上城區，地方唔大，一日乜都行哂，難怪好多人選擇只停留一晚。舊城都係教堂廣場之類的名勝，我對歴史興趣不大，行過就算，想shopping又無乜啱睇，結果行到下午已無乜好做，團友提議回住宿抖下再出動晚餐，結果我地就避過左一場大雨，感謝上天。因為大雨持續，原定想去的餐廳都去唔到，求其揾左間就算，食完打道回府，一天就此結束。