Foodie 生活雜誌

結束12日旅程，終於回港了，回程唔坐高鐵坐飛機，約左包車，但一早落好大雨，好cool的房東居然幫我地推行李到城外上車，感謝🙏🏻建議去機場的朋友要預點時間，因為大理同世界上所有城市都一樣塞車。大理機場好細，入閘後都有嘢食賣，經過兩小時機程到深圳機場，再上包車直駛香港，好方便👍🏻十二日雲南之旅完結~

我對足少爺仔十日，今日終於要離團尋找自我時間。先去古城中心，見到人群已立即掉頭走，其實只要行過幾條街就好清靜。我隨心搵間餐廳食個早午餐，去cafe飲杯咖啡打個旽，四處參觀其他民宿，四處閒晃，晚上join番團友食晚餐，寫意的一天。

行程進入尾聲，今晚會住大理古城，因為團長嫌大理古城太多人，去個少人d的魏山古城先。對我來講其實個個古城差不多，發展左的又嫌商業化，未發展的又嫌遠嫌未開發，好難服侍。

講番魏山古城，係商業化得來無咁多人的古城，我呢團係龜速旅行團，所有地方都磨爛蓆，喺城內左穿又插，慢慢行都行左幾粒鐘。離開魏山直去大理古城，只係門口都熱鬧到嚇死人，完全好似鄉下人去左京城咁，大理古城果然名不虛傳👍🏻

喺酒店食完簡單早餐就去揾咖啡，超哥好細心，之前一日已經幫我地留意附近有無好咖啡，可惜都係唔啱心水，好彩最後都揾到靚景cafe，左影右影又飲左兩粒鐘。之後去周城村玩扎染。扎染係大理白族世代相傳的手藝，一塲來到，當然要去見學，我就無耐性，所以主要都係太太同少爺仔玩，我間中企埋去整下影下相，結果居然玩左四個鐘，真係天光做到天黑。之後去今朝早cafe旁的西餐廳食飯就回酒店休息。

今日又係移動日，離開昆明去大理，車程四個幾鐘。先去舊城買咖啡，昆明好大，除左花市，今次我基本上乜嘢地方都無去過，有機會要再來。呢兩日先去洱海海邊住兩日，之後至去大理古城。沿路經過洱海，景色好靚，影到唔捨得走，結果差不多入黑至到住宿，晚上喺附近小店食飯後就休息了。

原本想睇綉球花，但昆明市昨晚已開始落豪雨，因為市內的去水基建不足，所以好多地方水浸，師傅話今日未必可以出車，唯有等消息。因為水浸，連酒店的電梯都壞左，死好命剩番貨𨋢頂住，順利落樓下食早餐，之後師傅話可以出車，但去唔得遠，所以去左書店。食完晏後，雨停了，道路似乎通順了，於是把握時間怱怱睇完綉球花田就去斗南花市。

昆明斗南花市係全亜洲最大的鮮花交易市場，規模極大，內有大廣場及多幢樓房，成個小區咁，行幾日都行唔哂，我只行左一小部分已腳軟，見到各式各類不同品種植物，人來人往，電單車及小貨車不停穿插，非常熱鬧，睇得好開心，絶對係大開眼界！食過晚飯後就回酒店休息了。

今日係移動日，要坐六個鐘頭車回昆明，中途喺雙胞鎮食個午餐就直踩昆明。好一個少爺仔，全程安穩地坐喺較窄的後座，無不耐煩無發脾氣，就算暈車浪都只係調位一段時間，過一陣就自己要求坐番後座，乖到要比十個讚。回到昆明大城市，即時有回到comfort zone的感覺，自動切換城市人mode，入住apartment，食西餐，安樂哂。

今日又係長途車。從普洱市到糯崗山寨。先到網路上講普洱市第一咖啡店Torch coffee買咖啡。咖啡店由外國人Martin所開，從咖啡園到cafe到咖啡班一條龍，好全面的發展。咖啡種類選擇多，外國及雲南的都有，外賣咖啡上車飲，味道不錯。沿途大部分行高速，雲南多山，不停的穿隧道，山過山，師傅話呢條高速路費平均$1一公里，係全程最貴的路。行完兩小時公路再行一小時山路，山寨近緬甸邊境，途中經過檢查站，個個都睇完就過，但我地要落車登記証件，真係無諗過。

一路上山，山谷天氣陰情不定，我地喺觀景台見到對面山谷落大雨，自己嗰邊有太陽，暗自慶幸，點知原來自己就係去緊落大雨的地方，到達時雨大到落唔到車，好彩轉頭停雨，到走的時候更加放晴。糯崗寨（糯干）係傣族人住的山寨，四周有古茶樹圍繞，所以寨內好多賣茶的地方，可免費飲茶，飲啱就買，喺寨內四處逛，食個午餐試下茶，不經不覺又三個鐘，回程去古樹園望一望，又再坐三小時車回普洱市了。晚餐回到今早的咖啡店，因為有pizza同pasta，食左幾日雲南菜，以為終於可能食下西餐，點知收！左！工！簡直係絕望！最後求其揾左間台灣菜食雞飯就算了(死都唔食雲南菜😡)，飯後行個圏就回酒店了。

今朝早又可以欣賞雲海，今次我喺酒店範圍遊走，多角度欣賞雲海，務求做到雲海吃到飽。早餐後開車去咖啡園，茶及咖啡係雲南兩大產業，近年雲南咖啡豆喺國際市場冒起得好快，而且水準高，更打響名堂。來到雲南，當然要參觀咖啡園，可惜咖啡園的規模較細，以銷售為主，去左兩間都有點失望。午餐後於普洱市內遊，行下食下就去酒店check in，酒店好大，去湖邊散下步又入夜了。晚飯唔想四圍行，叫美團外賣，平靚正👍🏻

網上揀住宿時已對酒店一見鍾情，所以行程亦因此住宿而作出遷就，結果成為全個旅程最滿意的住宿，渡過美好時光。酒店位處半山，被茶園包圍，大自然的環境結合現代化的設施，啱哂我呢d城市人。有多種房型選擇，我今次入住雲境帳篷，對正雲海，爽YY。酒店新淨，環境清潔衛生，最厲害係酒店範圍及房間都無蚊蟲。餐廳食物不俗，服務員態度有禮，我要求換房都䀆力幫忙，非常感謝。而家興生態旅遊、研學體驗，所以酒店亦設有好多活動，而最大亮點係雲海景色，今次有幸睇到，真係靚到不能形容，有興趣可睇番之前的遊記。不過要留意，秋季係相對出現雲海機會較低的日子。

約左超哥來接我地去附近地道餐廳午餐，揀選當地食材，幾有趣。飯後返回酒店後山閒逛，超哥小時候住農村，識得好多山間小知識，仲採左幾款菌比我地睇，行下影下相就過左一個下午。晚餐都係酒店搞掂，晚上觀星，話說早上見到熱誠年輕人傍邊的朋友好hea下，仲碎碎念話佢無上進心，原來人地下午只係幫下手，真正身份係天文學科學生，仲帶我睇星河，真乖。

今日全日留守酒店，咪以為無嘢好做，實際上係忙過番工。朝早雞都未啼就起身睇日出睇雲海，靚到不能形容，大自然實有太奇妙，能夠睇到如此美景，除了感恩還是感恩🙏🏻

今日係移動日，從昆明到普洱，全程六個鐘，所以早早就出發。旅程正式開始，今個旅程全程包車，早餐後司機超哥來接，今次旅程就靠哂佢。

其實只需一句 : 全日高鐵~完。😝😝原本八個幾鐘高鐵，點知delay廿幾分鐘，結果搭左九個幾鐘高鐵，坐到呆左。到埗後打車到酒店，去樓下晚餐後高回酒店休息了。

講下坐高鐵的感受。之前試過坐高鐵去廣州，但已經係幾年之前，忘記了。況且今次坐長途，完全可以深入體驗。我買一等座，車廂及坐位設計同坐日本JR差不多，整段車程坐得舒適，只係長途車試一次就夠，因為車程太長真係幾辛苦。不過日後四小時以內的車程我都會選擇高鐵，真係舒適快捷。

首先鳴謝今次計劃行程的團長B，我只負責挑三揀四，毫無貢獻。

⚠️行程內所有車程為行車實際時間，不包休息停車⚠️