Foodie 生活雜誌

今朝早又可以欣賞雲海，今次我喺酒店範圍遊走，多角度欣賞雲海，務求做到雲海吃到飽。早餐後開車去咖啡園，茶及咖啡係雲南兩大產業，近年雲南咖啡豆喺國際市場冒起得好快，而且水準高，更打響名堂。來到雲南，當然要參觀咖啡園，可惜咖啡園的規模較細，以銷售為主，去左兩間都有點失望。午餐後於普洱市內遊，行下食下就去酒店check in，酒店好大，去湖邊散下步又入夜了。晚飯唔想四圍行，叫美團外賣，平靚正👍🏻

今早又可欣賞美麗的雲海，感恩🙏🏻

我住左手面最高的帳篷屋，超級無敵靚景位

望住雲海嘆咖啡的畫面，會成為我美好的回憶

參觀小凹子咖啡庄園

漫山都係咖啡樹，與茶園唔同，咖啡樹雜亂，而且行埋去好多蟲，搞到周身痕，咪搞

咖啡樹唔算太高，結滿咖啡果

咖啡園規模小，而且只作展覽講解，並非在此作業，所以睇唔到實際咖啡豆從田到枱的工序，有點失望

咖啡園內設cafe。

重頭戲係銷售，有興趣的去coffee bar遂款豆試，幾位咖啡師似工廠工人咁輪流不斷沖，一邊介紹咖啡豆的特性。

攞住銷售單，好認真地寫低remarks，試哂再買。喺香港試過雲南豆，味道麻麻，但喺呢度飲左幾日都唔錯，莫非因為豆夠新鮮？

我有幫襯㗎，包裝好專業，有哂咖啡豆的資料

之後去左另一間咖啡工廠，梅子工廠。我睇介紹就係被呢個大咖啡豆造型的空間吸引。

可惜靚豆空間同四周環境唔配合，只有打咭店的感覺，我咖啡都無飲就走了。

咖啡店旁邊係咖啡工廠，但可能唔係季節，貨倉空空如也，對於遊客的我毫無睇頭。

我最欣賞呢本書，叫太太買比少爺仔睇，實際係我睇😆😆

美麗的小花，全個咖啡店的亮點

午餐喺古蹟石屏會館內食雲南菜，似喺祠堂內食飯，古式古香

都係點雞點菌，味道不俗。我地食量唔大，又怕重口味，所以點菜有限制，見隔離枱的菜色好吸引，真係隔離飯香

呢對筷子的筷子頭獨立包裝，大鄉里的我覺得新奇又衛生😂

會館內有個小型茶具博物館，展出清朝及近代的茶具，幾有睇頭

食完飯四圍逛下，但天氣好熱，好快就去左茶園東哥介紹的店買石斛。老闆用天然蜂蜜加石斛粉沖左杯濃郁石斛比我飲，即時覺得自己健康左😆

之後去酒店。今晚住山腳的普洱开元梅子湖酒店，酒店有點年紀，好在乾淨整潔，早餐好啱食。

房間有露台，我嫌煙味換左房，之前的房，個平台大過我間屋，有埋沏茶大枱，黐線。

房間外望湖景

有大泳池，可惜我懶，無陪少爺仔游水

酒店鳥語花香，同少爺仔行下湖畔浪漫一番。

晚上唔想四圍去，點左美團外賣，我喺香港極少食外賣，但國內就唔同，包裝精美，嚟到仲係熱辣辣，水準貼近堂食，最勁係送到酒店房門口，睇住個app見外賣員去到70m就開門，超級方便，從飲品到甜品都有，爽YY