Foodie 生活雜誌

來到行程最後一日，喺酒店樓下食個簡單早餐就算，餐廳有點似香港的茶記，簡單多士咖啡，感覺幾街坊。早餐後出發去車站，因為行李多，之前一晚千挑萬選一個行遠少少但有𨋢搭的入口，仲特別沿路行左一次實習，點知千算萬算，原來當日係馬拉松大賽，封路！我地只能在對面入口，對電梯默哀，再喺條長樓梯枱行李落去，真係一切都係整定。好彩上天只係於頭尾兩日比難題我，其餘都好順利又好天氣，感恩。到達機場後，坐底食碟章魚燒就入閘了。成田的T2真係無咩好行，不過近年多數坐點心航空，好耐無去T1了，唔知係咪多商店d?7日旅程完滿結束，遊記都post完，多謝收看

喺日本食西餐似乎係一個唔錯的選擇 : 食材新鮮，煮得用心，價錢唔貴。今晚去的係法式小館，選用時令日本食材，我唔識睇餐牌，點左個最貴的tasting menu 就算（都只係8000yen)，tasting menu係要全枱人點同一個餐。呢餐好美味，食材配搭有新意，大家都好滿意，不過可能我感冒，狀態唔好，覺得餐廳好焗，而且上菜慢，等到我差點瞓著。

 網站 : http://bistrosimba.jp/

今次東京遊剛好遇著日本國寶級藝術家草間彌生的一個大型作品展，當然唔可以錯過。今次展品豐富，橫跨幾十年的作品回顧，有畫作、雕塑、短片，又有百幾幅從未曝光的新作。場外有招牌南瓜供影相，又有塗鴉室(Obliteration Room)，當然唔少得紀念品店，展覽期至5月22日，絕對值得一看。

每個人來東京都似乎要去一次築地，加上就快搬，更加要留下足跡。其實我好怕去築地，因為人太多，而且都去過好幾次，唔會特別想去。咁啱今次又有團友要求去，只好奉陪，順道去出名的鮨國食海膽飯。名店就當然多人排隊，在我輪侯時，團友們自己去行街，各得其所，不過等左半小時就有得食，佢地都無得點行。食完後就知道果然係名不虛傳，海膽滿滿，鮮甜美味，真係回味無窮，唯一缺點係要排隊，下次似乎係我提出要去築地了。食完行下個市場，可能因為近排有興趣煮食，今次居然覺得多嘢睇左好多，仲喺有趣大叔的鋪頭買昆布時學埋如何選昆布，不過實在太多人，行一陣就走了。

(二月天,sky tree 附近居然見櫻花開了)

(進入餐廳，呢度門的雕工都足夠我註足細看)

今日分享下客房，房間寬敞舒適，裝飾清簡但細節位多，好精緻，傢具舒適，一列落地大玻璃，浸完溫泉坐在坐在張極舒服的椅子上欣賞雪景，室內暖笠笠，外面冰天雪地，感覺勁正！坐椅太舒適，居然不知不覺舒服到瞓著左。旅館的貼心令我想起小豆島的島宿真里，不過呢度更豪華

每間房都設有玄關，先開敞門，再有一度金屬門，門上的花花帶點童話感

(旅館面積不大，佔一個小小山頭，門口小而低調)

(坐纜車往谷川岳途中)

一早於汪泉閣旅館食完早餐後就坐旅館接駁車去水上町站。由於下一間旅館的車要幾小時後先到，見車站對面有個tourist information centre, 就八卦下有咩做，經介紹下買左個纜車套票遊谷川岳，套票3050yen包水上町車站至谷川岳口巴士來說回卷及登山纜車來回卷。巴士車程每程約半小時，纜車車程每程約15分鐘。坐纜車上山頂，望住被白雪粉飾了的山峯，就如一幅水墨畫，靚到假的一樣。山上係滑雪場，若果唔係滑雪就無咩好行。只有一間餐廳，可以坐低飲杯咖啡睇下景。我係纜車迷，又咁啱遇見美景，所以對呢個景點好滿意。夾啱時間落山，回到火車站食碗麵就上旅館接駁車去check-in。

來到今次的重頭戲 : 宝川温泉。温泉在汪泉閣旅館內，從旅館出來，穿過吊橋就到。露天温泉就在山谷中，範圍好大，四個温泉分佈在河川的兩邊，用吊橋連接，此温泉最特別係男女混浴，只有一個係女性專用。不過女士們可以放心，因為可穿著旅館提供的深色吊帶浴衣浸浴，反而男士只得一條毛巾，不過當地男士都不在乎，赤裸裸的四處走，只有女生不好意思吧。

(從河川望回旅館，好靚呀，我住最高層第二間)

今次東京之旅係因為兩間温泉旅館而成行。曾經在電影羅馬浴場同東京未婚妻出現過的場景宝川温泉，美景令我念念不忘，印象深刻，已暗暗同自己講終有一日要到此一遊，多年後終於成行。宝川温泉位於群馬県利根郡水上町的汪泉閣旅館內，坐新幹線從東京站出發只需個幾鐘，原本計劃喺東京站食早餐，但發覺選擇不多，最後喺咖啡店簡單食個早餐，買完至見到對面有個好大的外賣food court，好多美味便當，忍唔住再買再食，下次坐新幹線一定要記得買便當上火車食，更有意思。坐新幹線一路北上，窗外景色亦轉為雪景，到達上毛高原站時，放眼四周都已經係厚厚的積雪，出站後再坐一小時shuttle至到於館 (因為大雪，車程廷長，平時半小時就得)。旅館位於深山，四周無任何餐廳及旅遊點，來到就係純粹享受温泉。

晚餐在銀座蟹工船食蟹餐，地方唔錯，獨立房間，但招呼同食物都係一般，仲要好難book位，試一次就夠。晚餐食左三個鐘，節目當然係去港人至愛的激安之殿堂逛逛。淺草呢間夠濶落，行得舒服，在酒店對面，好方便。

website : http://wins-corp.jp/newaccess.html

( 「FLOWERS by NAKED 2017 數碼花展」燈光投射做得超細緻，好靚)

(酒店外貌，樓下就係「まるごとにっぽん」（Marugoto Nippon），但受到「愈近愈唔去的咒詛」我居然只可以喺離開的一日速行左半小時。其實呢度好多嘢睇，唯有希望下次有機會再來。)

2017東京群馬美食温泉之旅

第一天旅程實在太精彩！估唔到去東京要用一日！原本1105的機改到1600再改回1455。順利上機後，原定2000到成田，點知飛機無位泊，在機上乾等個半鐘至可以落機，連過關攞行李，結果要坐1051的火車出城，個天都算待我不薄，比我坐到尾班車。今次住淺草，坐access 特快最方便，但呢架只係普通電車，唔似narita express 畫好哂位咁舒服，我今日咁幸運，當然無位坐要企個幾鐘啦，仲要無直車，抬住行李走兩條樓梯過對面月台轉車，到站後再喺寒冷街頭被的士拒載，千辛萬苦的去到酒店，攰到食唔落嘢，最後晚餐只係食個飯團，第一日的行程就在航班delay 下報銷，真難忘。原來早到的朋友都唔好過，當日東京大風大雨又寒冷，佢地淋到落湯雞咁去到酒店都唔再出來。不過好彩衰運都集中在第一天，之後的旅程好順利又天天天晴，感謝上天安排！

註 ： 若住雷門附近，地鐵淺草站A4出口就最近，回程時若行李太多，就要選A2b出口，因應有𨋢，唔洗行樓梯，但就要行遠d。