Foodie 生活雜誌

餐廳喺天后開店時已幫襯，係其中一間我會回頭的cafe，不過位置有點吊腳，而家喺銅鑼灣開店就更好了。食物出品不俗，餐牌有多款選擇，早午晚餐下午茶都有，而且開早上8點，啱哂我呢d晨型人。侍應好nice又勤快，食得開心🥳

之前常去荃灣店，自從動線轉左，無機會再去。最近見鰂魚涌開店，喜出望外，真係有回家的感覺。cafe喺太古坊二期，無論地段同裝修都高級左，所以收費都高一級，要加一🥹餐牌比荃灣店的選擇多少少，食左兩次，質素不俗，可成口袋店了

喺外國靠google map揾食的經驗唔錯，番到香港都試下。人在中環，諗唔到去邊度飲咖啡，打開見G神比4.8分，跟去。點杯黑啡，店員叫我揀豆，三揀一，但無講唔同價錢，有眼光的我當然揀左最貴的，點知比錢時明明$40變$60，最慘係後知後覺的我比左錢至識問，好彩杯咖啡幾有果味，加埋當日外面有音樂表演，當入場費囉。我以後都係唔好懶型，問多句穩陣～

餐廳最突出的唔係咖啡，係設計，咖啡似淪為配角。

又係坐車經過，見小清新裝修幾吸睛，擇日幫襯。店如其名，以三文治為主角的cafe，不過店長話喺香港單賣一樣食物係唔work，所以都有意粉及小食供應。食物賣相幾靚，不過食材一般，唔算高質。小店最出色係裝飾擺設，話說店長熱愛日本文化藝術，會不定期喺店內舉辦展覽及活動，我去左兩次，一次展覽和果子模具，另一次係和果子成品及poster，仲有體驗工作坊，店長好有心呢。

新開的咖啡店，之前想去，點知去錯左對面。今次去啱了。地方舒適，啡底不俗👍🏻

 阿美利卡奴

餐廳食材優質，出品不俗。之前經過覺得餐廳幾型，坐窗口位睇街外行人應該幾有趣。終於有日去試下，原來餐廳係網紅店，好多旅客打咭，今次咁啱比我坐到心目中位置，睇到打咭眾生相，好好笑。

兩間我喜歡的cafe 放埋一齊，無理由唔幫襯。nutmad 由前身係PREGIO時已幫襯，之後PREGIO關門大吉再喺觀塘店開業已經係坐上客，最喜歡法蘭西多士及卡邦尼意粉，後來因為水準下降再無去。至於n.o.t係一向我喺銅鑼灣的愛店，今次利苑商場裝修，搬左過來同nutmad放埋一齊。聽講係短租，等商場裝修完至知會唔會續租。nutmad 主要負責食物，好彩出品不俗，n.o.t提供輕食加coffee，以我喜歡假日早午餐齊食的人就啱哂。餐廳開放式，從前賣意大利包Panino Giusto個位(OMG I really miss u)。唯一有怨言係無免費水供應😐

8/2023 光顧

之前係pop up store，慢慢發展成cafe，幾叻。喺樓上食完午餐，行過飲杯咖啡，無乜特別，記錄下。

7/2023  光顧

食完飯想飲杯咖啡，行過經過見到呢間結合咖啡、花藝及生活雜貨的小店幾精緻，推門而入，感覺似去左日本的花藝雜貨店，樓上係workshop，樓下係咖啡店及店面，氣氛幽靜舒服。不過睇真d，其實貨品及花種都好大路，花藝的成品亦唔啱我心水，成間店似得外表無靈魂。不過見到兩個妹妹仔對住花樽左插右插，覺得兩位打工(定係老闆?）打得好優雅。至於咖啡……都係飲環境，唔難飲就得。

5/2023光顧

尖沙咀分店係我的心水店，行過見到原來灣仔都有。尖沙咀店好多時都無位，呢度可能開喺橫街，週末中午都無人，咖啡一樣有水準，去漢發食完豬潤麵再過來飲杯啡就剛剛好👍🏻👍🏻

4/2023光顧

筲箕灣一帶無乜啱心水的cafe，小店喺疫情其間開業，幾次坐車經過，見佢個樣幾pro，但只做外賣，心諗應該開唔長，估唔到兩年後仍喺度，行過經過見加左張櫈，有得坐下就幫襯。小店由年輕女生主理，見佢同客人講咖啡頭頭是道，原來做左四五年了，真係後生可謂。long black 用兩隻巴西豆混合而成，濃得來唔澀，幾厚身，唔錯。

3/2023 光顧

唔係旅行又唔係staycation 之下去酒店食早餐對我來講係一個奢侈的動作，當然係因為有優惠至去。cafe喺太古城服務式住宅「東隅」內，撇除價錢，cafe環境舒適，食材質素不俗，服務都唔錯，幾好，幾好…….平d更好🤣🤣

3/2023 光顧

3/2023 光顧

行過見到餐廳的懷舊裝修幾骨子，見網上評價ok就試下。典型行貨餐牌，基本上信心不大，但一塲來到都無謂走，入到去見到水吧的兩位年輕人同餐廳的氣氛唔多夾，結果亦如我所料，食物咖啡非常一般，勝在夠靜及坐得舒服，冷氣非常強勁，若於盛夏到來就啱哂。

2/2023光顧

藍屋小區內cafe，似街坊聚腳點，好熱鬧。

2/2023光顧

香港咖啡文化盛行，咖啡店開完一間又一間，香港的開到過九龍，九龍的都開過香港。KNOCKBOX係本地薑專業咖啡店，出品有保證，由旺角開到灣仔再去中環。咖啡對於我都係偏濃，唔啱我。上次灣仔店都已經係咁，不過唔記得又飲過，下次應該唔會了。競爭激烈，隔離就係另一間本地薑COCO ESPPRESS，後者啱我多d

2/2023 光顧

估唔到太子太厦Ralph Lauren 內會有間咁精緻的cafe，全室桃木古典裝修好classic，咖啡味道唔錯，又夠大杯，不過用紙杯就成件事down grade 左。

1/2023光顧

西貢出名咖啡店，行過總係好多人，未有機會幫襯，如今西環再開分店，太后識貨，行過影相比我話要食，當然要做嘢。為免排隊，10:30就來到。可惜食物唔多啱口味，食價比低，招呼亦麻麻，試過就算。

1/2023光顧

餐廳喺銅鑼灣邊陲，有次坐車經過，一片藍的店面幾吸引，睇過網評不俗，擇日來訪。小小的cafe食物及咖啡出品都不俗，店員友善，環境舒適，室內佈置有心思，不俗的咖啡店，可以再來(事實上我都有再來)當日帶埋太后來，佢居然幾鍾意，一餐讚左三次。