Foodie 生活雜誌

終於來到最後一日的旅程，今晚夜機，所以參加左個local tour，去Prison  Island同埋Stone Town。今日明顯被賣豬仔，包左車，以為司機會跟足全日，點知司機放低我地喺碼頭就走咗去接第二單生意，仲車埋我哋啲行李走咗，結果我對鞋甩鞋底都冇得返車度換。講番個行程，先坐艇去Prison  Island睇巨龜，個島好細，好快睇完。之後行Stone Town，雖然係超級旅遊點，但都叫做較接近當地人生活的地方，食完晚飯就去機場，結束今次難忘的非洲之旅。感謝好友沿途照顧❤️

連續寫兩日，因為day 10天氣差，全日喺酒店及喺隔離酒店食飯就過左。Day 11天未光就出發去睇海豚，望住個太陽升起，好靚。可惜我跟咗一個好Hea的艇家，佢求其帶左我去個船躉旁邊就叫我落水睇魚，我唔係潛水人都覺得唔係好掂，何況我的朋友個個都係潛水人，更覺得佢Hea到爆，喺嗰度餵吓麵包，玩咗一陣就出發去追海豚。你冇睇錯，係「追。海豚」，因為海豚係野生的，佢游去邊你就要跟住佢，當佢停低你就可以跳落水同佢短聚，之後佢再游你又要再追，如是者喺隻艇度跳上跳落，其實好攰，我跳左三次都頂唔住，不過見到海豚喺你艇邊遊，落到水又見到前後左右上上下下都係海豚，雖然時間短，但感覺又真係好夢幻。估唔到喺非洲可以嘗到海(追海豚）陸（safari)空(熱氣球)之旅，夠哂皮了。

第二日都係繼續hea，經過之前一星期的safari，每日早起，舟居勞頓，真係幾攰，來到Zanzibar 就係食同瞓了。住宿喺海邊，出面就係一個長沙灘，行下曬下太陽又一日。喺天台飲緊啤酒，見到海邊好熱鬧，落去八下，原來漁夫捕魚歸來，海邊變成臨時市集，幾有趣。晚上去左酒店介紹的餐廳，一間喺小島上的餐廳，潮漲時要坐船仔過去，我以為自己去左東南亞。

終於完結7日safari之旅，最初計劃係完左safari就返香港，但我覺得咁遠飛到過來非洲，無理由咁快走，點都要揾多一個地方去，咁啱團友睇左youtuber Polly小姐的介紹，想去Zanzibar 睇海豚，咁我地半團人去Zanzibar ，半團人返香港了。作為一隻井底蛙，對非洲的印象係草原、獅子、大笨象及土人，從來無想過會有沙灘，仲要係水清沙幼的沙灘，簡直係跳出我的認知，真無知。喺Zanzibar 的五日四夜都係住沙灘旁的酒店，純渡假mode ，我覺得Safari 係被包裝後的非洲，所有接觸的人與事都經過過濾，全屬高級出品，到Zanzibar 係半包裝，雖然都係遊客區，但已令我接觸到少少當地人同比較地道的食物，係另類開眼界的體驗。

離開草原之前，見到豹哥昨晚食剩的餐點，隻角馬咁重，都唔知佢點拖上樹

天未光就起身去坐熱氣球，我未坐過，感覺新鮮，聽講話平時坐熱氣球就咁升上去，無咩睇，幾悶下，我款會見到動物喺地上跑下，叫做生動點，可惜飛得唔算高又無乜動物，叫做飛過啦。反而降落後的原野早餐幾有貴族感😀之後join番其他團友繼續safari。咁多日safari都未試過喺酒店午餐，今日決定唔好咁chur，喺酒店午餐及瞓晏覺，點知下午有大象家族來探訪，大鄉里的我當然又影一餐。黃昏再去一轉safari，居然執到個尾彩，連最難遇見的金錢豹都睇埋，非常完滿。之後喺河馬屋企旁邊開個祝酒會，正式結速7日6夜safari之旅了。今晚要執行李，明日去另一個截然不同的地方 : Zanzibar。

來到第6天，繼續Safari。一出門口已經見到獅子家庭開餐，近距離觀看，聽到獅子咬碎骨頭的聲音，比電視機睇到的真實得多。行兩行又見到一對獅子交配，睇足幾個round至走😝再行一陣又見到睇水的獅子兄弟，簡直就係獅子生態團。午餐後又收到風有crossing ，其實我睇左一次，又唔係一定要再睇，但領隊好有心，堅持要我哋等，我真係好敬佩佢哋對份工咁有熱誠，照理做左咁多年，睇左無數次crossing ，睇唔睇到對佢哋來應該係無乜所謂，我哋唔睇佢仲可以休息下，但領隊仍然好希望我地能夠睇到，係咁陪我哋等，最終睇到大家都好開心。

不過今次無上次咁好彩，等左幾個鐘，好彩我哋九個人，講下笑下又唔覺難捱。最搞笑係次次有人去緊廁所就會收到有crossing 的消息，如厠中的人就要裙拉褲甩咁趕快上車出發，因為動物唔等人，所以個個去廁所都好驚。又講下大家都會關注的問題 : safari 期間如何如厠？基本上午餐的地方都有厠所，其餘時間要就地解決。咪以為好戲劇性地㢌㢌下會有隻獅子大笨象企你隔離，其實領隊會揾個安全的地方，你去車尾解決就得。車上有紙袋，如厠後要將用過的紙巾放入紙袋內包好放番上車，結束一天旅程後會有人清理。

今日繼續Safari，天未光就出發，八月份的坦桑尼亞早上清涼，要著風褸。架車喺酒店駛出來轉個彎已見到獅子伉儷想交配，係想咋，等左一陣見無動靜我地就走了。沿路見到不同動物， 之後領隊收到風話附近發現一大群獅子，結果大家都蜂擁而至，最後亦不負眾望，一大堆獅子有老有嫩，遂一從灌木林中行出來，再去樹下休息，其中一隻仲喺車群中左穿右插，令我大開眼界。

午餐後再繼續喺大草原搵動物，今日收穫豐富，除左獅子伉儷、獅子一家，仲見埋獅子三兄弟，真係獅子看到飽。之後仲見到大象、長頸鹿、獵豹，滿載而歸。

今日坐小型飛機由Manyara 飛去Central Serengeti，大約飛一個鐘左右。 第一次搭小型飛機，全機得十二個坐位，又細又窄，因為機程短，尚可接受，中途仲會好似巴士咁停站，好過癮。去到Central Serengeti，又稱The Big Cats Region，big cat 係乜？即係豹、獅子囉。落機後先去酒店食lunch，原本lunch後去safari，但途中突然落起大雨，無法繼續行程，唯有返酒店hea。原本諗住平淡過一日，點知晚上的獅吼至係亮點，想知發生咩事？睇埋d相吖😁😁

來到再深入一點的非洲大草原，呢間酒店除左比之前的豪華，仲讓我有luxury 的感覺，Luxury 唔系來自價錢(當然都要比錢)，而係來自一種奢侈感。試想像入到非洲大草原，居然可以有渡假酒店的享受，敞大的房間舒適漂亮，有水有電，有美酒佳餚，服務一流，既有城市舒適的享受又可感受非洲原野的原始，嗰一刻，我真係覺得我的人生好奢侈。

今早6點就食早餐，天都未光，食左我人生第一次燭光早餐。餐後出發去Ngorongoro Crater floor。Crater 即係火山口，係多年前大型火山爆發後自行坍塌時形成的盤地，內裡係大量動物及雀鳥的棲息地。跟昨日的森林safari 好唔同，今日去的係一個大平原，喺車上遠遠望去都係一大群的河馬、水牛、班馬、羚羊，雖然好多動物要用望遠鏡至睇得清楚，但對於自己能夠置身火山口內，感覺奇特。仲見到奔跑的大象及駝鳥，見到飛奔中的駝鳥身後沙塵滾滾，似睇卡通片小鳥必必現實版一樣，好好笑。午餐喺湖邊，湖內好多河馬，肥嘟嘟好可愛。飯後繼續safari，等獅子獵食，睇駝鳥跳求偶舞，所有所有都係上天安排，睇你彩數了。完成一日的safari後，回酒店休息，晚飯後要收拾行李，明日搭小型飛機離開去下一站了。

對於今次非洲之旅，大家最有興趣係食物同住宿。今次Safari 共入住三間酒店，各有不同風格，酒店早午晚餐全包，以西餐為主，今次呢間食自助餐。酒店幾大，主樓係酒店大堂及餐廳，房間為獨立bungalow ，幾大間，酒店有泳池及gym room，自設農場，幾有規模。

細細個睇好多動物紀錄片，最有印象就係動物大遷徙，見到好多角馬同一時間一齊過河，場面震撼，夢想日後可以喺現場睇就好囉，估唔真係有呢個機會，有少少夢想成真的感覺。今年八月尾出發的旅行，上年十月已開始籌備，因為交比agent負責plan，加上朋友仔做聯絡，所以我乜都唔理乜都無睇，諗住當跟團咁，比完錢等出發就得，只知出發前要打針。點知出發前開茶會至知原來去坦桑尼亞(下稱T國)好多嘢要注意 ： 先來行李，因為要坐小型飛機，唔可以帶行李箱，要軟喼，再來連埋手提行李只可15到20kg，諗住非洲天氣熱，帶薄衫就得，原來非洲的季節唔係分冬夏，而係分濕旱，今次我去係旱季，天氣早晚較凍，要帶fleece及gortex，去safari 深色衣物唔著得，因為怕被蟲釘，鮮色衣服又唔得，怕被動物追，只可著大地色，結果要買衫買喼。

行前準備 : 坦桑尼亞無需注射防疫針，但香港衛生署會建議旅遊人士打幾款防疫針及食抗瘧疾服藥，我就打左yellow fever 針及食藥，同行團有有d打針唔食藥，有d針藥都無，純屬個人選擇，最後大家都無染病。

十四日十一夜的坦桑尼亞遊共分兩段，前半部七晚去中部safari 睇動物，後半部四晚去小島Zanzibar 陽光與海灘。行程前半部由旅遊公司wild senses 策劃，後半部自由行。