2024坦桑尼亞遊遊記篇 Day 3 Full day safari on Ngorongoro Crater floor－Foodie 生活雜誌

今早6點就食早餐，天都未光，食左我人生第一次燭光早餐。餐後出發去Ngorongoro Crater floor。Crater 即係火山口，係多年前大型火山爆發後自行坍塌時形成的盤地，內裡係大量動物及雀鳥的棲息地。跟昨日的森林safari 好唔同，今日去的係一個大平原，喺車上遠遠望去都係一大群的河馬、水牛、班馬、羚羊，雖然好多動物要用望遠鏡至睇得清楚，但對於自己能夠置身火山口內，感覺奇特。仲見到奔跑的大象及駝鳥，見到飛奔中的駝鳥身後沙塵滾滾，似睇卡通片小鳥必必現實版一樣，好好笑。午餐喺湖邊，湖內好多河馬，肥嘟嘟好可愛。飯後繼續safari，等獅子獵食，睇駝鳥跳求偶舞，所有所有都係上天安排，睇你彩數了。完成一日的safari後，回酒店休息，晚飯後要收拾行李，明日搭小型飛機離開去下一站了。

一早起身食燭光早餐，都係自助餐，有一個counter比住客pack 三文治做午餐，我地個團包餐，唔使自己嚟。

出發往 Ngorongoro Crater floor，目的地係山頂，一早揸車上山，經過rainforest (!)，山路好大霧，非洲真係令我意想不到。中途仲見到花豹….個pat pat，其實係前面車的司機見到花豹走左入草叢，佢叫我地停車睇，花豹見人就走，我只見到佢背影，都算好彩了，其他同車的人都見唔到。

來到入口。每個國家公園都要入塲費，大概百零蚊美金，費用已於團費內包左。

沿途見到當地小孩行路番學

Masa 族聚居地，佢地係遊牧民族，唔會長期停留

上到頂，望落去就係火山口，咪以為有水的係湖，其實係積水

入塲前停車去定廁所

好大棵仙人掌樹

一入到火山口區就見到山坡上的斑馬，對於平日喺山坡上只見過牛羊馬的我，感覺新奇，已經停低係咁影。

沿火山口的邊(rim)往下行，我去之前只知要入個地方睇動物，去到至知係火山口，tour guide 好有心機咁解釋crater 同candela 的分別，我當然唔知佢講乜，對於地理常識，中文都未必明，何況佢講英文，回來後反而有興趣上網揾資料，因為有個形像概念，讀萬卷書不如行萬里路係啱的，我去完萬里以外就有興趣了解呢個知識了。