Foodie 生活雜誌

9/2022光顧

西營盤真係美食聯合國，短短一條水街已經有墨西哥菜、西餐、新疆菜、日本菜、糖水、漢堡，今次揀的墨西哥菜，餐廳裝修窗明几淨，舒舒服服，唔會好似傳統南美餐廳裝飾咁花花碌碌，頭都暈。食物以牛油果為主題，點左大路的Taco、Nachos， 有趣的牛肉湯飯、牛油果雪糕，全部味道都唔錯，除左侍應有點性格之外，各方面都唔錯，可以一試。

6/2022光顧

2/2022 光顧

去完大帽山賞霧，落山腳食印度菜。記得之前去林村時，賣寶碟的嬸嬸介紹我來食，佢話芒果奶昔同cheese cake好食，等我仲以為係西餐廳，原來係印度菜。餐廳好旺塲，食客大部份係印巴藉人，價錢實惠，味道唔錯，難怪咁多人幫襯，除左堂食滿座，仲有好多人買外賣。我好小食印度菜，因為對咖哩興趣一般，不過呢度的食物味道唔算特別濃烈，偶一為之係可以的。

5/2021 光顧

餐廳有好幾間分店，心諗連鎖店都係賣埋d行貨嘢，無諗過食，點知分別有兩個朋友介紹呢度的豬手好食，一次外賣，一次堂食，味道又真係唔錯，所以第三次就輪到我帶朋友去食了🤣🤣

6/2020光顧

餐廳Roganic主打有機餐單，Aulis 係餐廳Roganic 內的chef table，對有機食物興趣不大，總覺得唔好食，後來睇過一篇介紹，感覺良好，一於試下。chef table 只得9個座位，chef喺你面前準備餐點，食材大部分預先製作好，只係喺你煎下砌就上碟。食物美味，擺碟好raw但好靚，chef同助手動作利落乾淨，一眼關七，見到有滴水都立即抹乾淨，非常衛生企理，整個用餐過程感覺好好，值得一試。不過全程要聽英文，對於我係一個負擔，所以有d sauce 都唔知係乜。問過餐廳，餐牌唔會成日轉，因為所有食物的準備功夫較多，若轉menu都未必會整個餐牌轉，所以雖然想再試，但應該都要等一排先。餐廳訂位時要收信用卡資料，另外建議訂位前先查詢餐單。

11/2017光顧

貴價小食店，菜式係墨西哥加日式fusion ，每道菜都小巧精緻，材料新鮮，配搭有新意，味道複雜，醒胃刺激。餐廳不設訂座，要人齊至可以入座，侍應態度友善，但手快腳快，有點好似想催你埋單的感覺，味道係好，但值唔值得就見人見智，喜歡新鮮感的不妨一試。

12/2016光顧

荔枝角D2附近的食店選擇多，連墨西哥菜都有。今晚一個人，簡單試下個大卷餅。玉米餅內包住自選饀料（雞、牛、豬肉）、洋蔥、雜椒、碎芝士、豆蓉，再配上酸忌廉、牛油果醬，黑豆及蕃茄蓉另上，大大份，好滿足，我點雞肉，好香口，味道唔錯，若果酸忌廉同牛油果醬多d就更好，真係肥死罷就。餐牌上有好多菜色，以肉類為主，餐廳細細，若人多記住要先book位呀。

11/2016 光顧

標榜食阿根廷牛肉的餐廳，地點在中環，餐廳鬼多過人，氣氛casual，以木及磚為主調的裝修洋溢暖意。食物有南美的隨意感覺，唔會好精緻，小食味道唔錯，反而主角阿根廷牛味道一般，稍欠牛味。

5/2016 光顧 

尖咀C又帶我食好嘢。西環新開餐廳多到不得了，無可能試得哂，靠地膽帶路最穩陣。呢間店鬼多過人，坐位全部係吧枱高櫈，看似唔多好坐，不過原來張櫈又坐得幾舒服。食物全部細細碟Tapas  咁，款式多，味道好，我叫呢d店做鬼佬點心店，開支酒，tapas 遂樣點，同朋友邊食邊傾，好free好好feel

想食瑞士菜，香港無太多選擇，Chesa係其中之一。

瑞士小木屋裝修，氣氛輕鬆，服務好好。