Foodie 生活雜誌

11/2017光顧

貴價小食店，菜式係墨西哥加日式fusion ，每道菜都小巧精緻，材料新鮮，配搭有新意，味道複雜，醒胃刺激。餐廳不設訂座，要人齊至可以入座，侍應態度友善，但手快腳快，有點好似想催你埋單的感覺，味道係好，但值唔值得就見人見智，喜歡新鮮感的不妨一試。

餐牌只簡單地寫出每道菜色的主要食材，用料，味道估唔到，要入口至知。

飲品真係有點伏，每人點左杯highball，成舊水一杯，成杯果汁咁，飲杯啤酒好過。

薄餅小食分TACOS 同 TOSTADAS，分別係個皮軟同脆,TACOS小食我地分別點左炸雞，炸魚同牛脷。一口一個，配料係醃菜，配上墨西哥辣椒或香料做成的醬汁，味道好豐富

牛油果醬好味

TOSTADAS 選左海膽帆立貝同牛油果龍蝦肉兩款。材料新鮮，都係配搭醬汁及醃菜，將新鮮材料的味道變得更複雜，但又唔會蓋過食物的鮮味，唔錯

南美菜色好興呢隻酸汁白身魚刺身。配料好多，有薄青瓜片、醃菠蘿、紫蘇、放埋一堆，加個酸汁 ，成碟蒸水蛋咁，但又幾好食喎。

西班牙腸煮蜆 蜆新鮮嫩滑，加入充滿油香的西班牙腸，用辣汁煮，食到唔停口

羊肉捲 羊味羶，醬汁濃，重口味菜式，味道濃而不膩，good。食完都飽

餐廳在小街街角

顧客同侍應都係鬼多過人