Foodie 生活雜誌

Jökulsárlón冰河湖絕對係冰島重要景點之一，感謝上天，今日終於賜我陽光，雖然之前天氣唔好，但去重要景點時有好天氣，感覺上天已經盡做。太后離遠見到冰川已經好開心，到左冰湖就更加自己行左去影相。我一早已book 左boat tour 遊冰湖，同太后揾左厠所，再交代集合地點就走，反正要唔見都會唔見。準時集合，換好衫就上船，坐住橡皮艇遊冰湖都係第一次，之前喺紐西蘭試過坐直升機行冰川，海陸空都集齊了。橡皮艇在浮冰間穿插，職員一路講解冰川生態，當然唔少得地球暖化問題，真係「冰川融化，人人有責」。我英文差，只聽得明一部份，反正唔多明，用心欣賞美景好了。

一早出發，有陽光，感謝上天，披上草皮的小教堂更美

靠近冰河湖，路上已見積雪

看得見的冰川，但其實規模已經細左好多

冰湖，靚到假的一樣

可以行上山坡，企高d，睇多d

準備出發boat trip，先在貨櫃內著上全身防風防水衫，因為凍，連埋Gortex著埋喺入面，成個人大隻哂，transforma 咁款。開艇時好大風，(太陽)眼鏡、帽、手套唔少得

套衫唔多靚，神高神大的鬼佬都救唔到

帶隊的職員講解中，最緊要知點用救生衣

要行一小段路去湖邊上艇

若你坐圖中的水陸船就唔使行，但距離水面遠d，無咁好feel

上船

開船，團長一路介紹生態

往冰川前進

有人爬獨木舟，好有型

似青蛙的冰塊

湖上有不小浮冰

海豹呀！我地埋到去，佢望下我地就跳落水，好可愛！

湖上的冰舞台

我地就係坐呢d船

靠近冰川，見到有一大塊冰跌下來，似睇緊發現台

美麗的冰藍

又一個難忘經歷，點都要影番張相留念，型嗎​

Jökulsárlón冰河湖旁邊有個較小的冰川及冰湖，小巧精緻，較清靜。可以慢慢行，好好感受。其實經過大冰河湖的時後，一直見到有流冰流往大海，好有趣，諗住過去睇，但太后成日問幾時食龍蝦 ，話説太后有個老友記每日都問佢食左龍蝦未，睇到極光未，所以太后好著緊要食龍蝦。由於怕去到餐廳過左時間無得食龍蝦，結果我忘記左去夢幻的鑽石沙灘，不過喺當時的情況，龍蝦係絕對比鑽石沙灘重要。