Foodie 生活雜誌

 {自駕} 意大利人揸車係癲㗎！車速好快，平均開80咪以上，高速起碼140咪，而且駕駛態度非常「率性」，對頭車時常會越過隔離線，小路出大路好似唔洗睇，係咁就隊出來，最恐怖係行山路，無論晴天雨天，天光天黑，有路燈無路燈，直路或多彎，車速不變，都係咁快，仲要係咁啄住你，好大壓力，好多時駕駛員都駛埋一邊讓路，無謂阻人發達。 高速我地試過開180咪都仲慢過好多人，而且好多時無街燈，有時快線的車似炮旦飛車在旁邊駛過，但又恍惚從無在後面出現過，試過在山區山路漆黑一片，對面線的車居然連車頭燈都無開！總之就要聚精會神，同香港好唔同。

{租車｝ 今次經agent 網站http://www.rentalcars.com租，車輛由GOLDCAR提供，型號係Ford Focus Estate 油渣車，我地坐4個人，尾廂三件29吋行李加四個中型摺合式行李袋都夠。米蘭機場攞車還車，淨車價全程16日港幣$3030，平到我以為自己睇錯。租車時經agent 買左個全保加多$1040 ，後來至發現唔需要，因為去到租車公司解釋就算買左呢個保險，攞車時都要先付訂金1400歐，若架車有事就喺按金扣，你自己再向agent claim番，但未必樣樣有得claim，之後推介我買個由佢公司提供的全保，只要205歐，點撞都無問題。咁我當然買，免得夜長夢多。今次教訓係以後直接喺租車公司買全保算了。

{GPS} 無向租車公司租，自己用TOMTOM 及Google Map 搞掂。

{泊車｝若果只係去意大利Big 4城市 (Rome, Florence, Venice, Milan) 強烈建議大家無謂揸車，一來四個城都設有ZTL 禁區，即係非指定車輛進入會被罰款，若無登記就駛入去，每次罰款60歐至10歐不等。所以自駕人士通常泊車在城外，但意大利文我睇唔明，亦估唔到，錶位有時要收費，通常0.5歐至2歐一個鐘。有d車位首一兩小時唔收費，若泊到呢d，記得在落車時揾張紙寫底離開車廂時的時間 （當地人會有個時間牌，但我係遊客就無買），由紙上的時間計起。或者你可以話我寫時間後d就有著數？要知道洋人係玩誠實制，若執法人員來到見到紙上寫的時間後過佢來的時間就會開罰單。至於幾時要比錢泊車幾時唔洗，我理解力低，通常落車揾人問。

注意，街邊車位地線分三種顏色 : 

藍色：要入錶付費

白色：免費停車

黃色：當地居民或殘疾人車位，若隨意停泊，有被拖車的風險

以下呢條link 有意大利自駕的詳細資料，個人認為非常有用，有心機就慢慢睇啦 :

http://bbs.qyer.com/thread-1008894-1.html?authorid=824436&page=2

{路費 、油費} 今次都行左唔少高速公路，但比起日本，收費唔貴，最貴一次都係16.9歐，其他都係十元八塊有交易，總數大概唔過150歐。我係租油渣車，油費平少少，全程行左約2500公里，油費係300歐以下。