Foodie 生活雜誌

(酒店在民居內，唔起眼，但幾清靜，向前行就係晴空塔)

晨早起床，喺温泉旅館嘆完早餐後就坐新幹線回東京。一出門見到有豪華轎車等侯，心想真係一分錢 一分貨，仲同太后話我去咁多次温泉旅館都未坐過豪華轎車接送，不過幾秒鐘後就清醒番，因為我記起同集團在附近有一間大型旅館，果然，我只係坐唔夠兩分鐘的車程去轉車。去到大型旅館等車期間，太后對我話 : 「食食，我都係喜歡我地昨晚住嗰間旅館多d 。」我壓抑住內心的激動，重重地搭住太后的膊頭，語重心長地吐出一句 ： 「當然啦！」心諗 ：鬼唔知呀媽係女人，相差幾倍價錢！

日本之旅，一定會安排最少一晚入住温泉旅館，為左比太后有一個難忘的温泉之旅，今次安排入住秋保温泉的高級旅館獨幢客房。旅館有個八千尺的庭園，一心諗住太后可以喺庭園散步，點知原來唔可以行，只供觀賞，激死。旅館感覺高雅大氣，房間裝修簡約中見細緻，處處流露出含蓄的豪華感。可惜温泉一般，無論個室風呂及大眾浴場都係一般，房價雖然係我住過最貴的，但並非最好，不過太后好滿意就算。

近年每次去日本都會食西餐，今次選擇西式創作料理。餐廳主要食套餐，平日只供應晚餐，價位較高，只得星期六有午餐供應，亦較經濟。因為時間剛好配合，可以帶太后來一嚐西餐。

今日帶太后去做貴婦。一早瞓到安樂醒，check out 後喺酒店附近行下就直接去食午餐。話説今日訂左間靚靚西餐廳食創作料理，之前一晚叫太后著好少少(太后一向主張「舒適」打扮）喺酒店見太后的一身造型 ： 灰色運動綿褲配同色系fleece外套，忍唔住問佢係咪打算去晨運，佢仲問我有咩問題，我唯有直接話佢咁著法去到餐廳會有辱國體，佢至死死氣去換過衫。去到餐廳見到客人個個打扮端莊，佢至明白今早的造型幾咁有問題。太后邊食邊讚 : 「我都係喜歡食呢d多過昨晚的大排檔」我心諗 ：鬼唔知呀媽係女人？不過見佢食得開心就好。

想帶太后去地道一點的食店，聽講餐廳有鮮魚拍賣環節，特別過來見識下。餐廳以海鮮浜燒為主，食材新鮮，另有下酒小菜，價錢大眾化，客人以當地人為主。可惜當晚客人唔多，拍賣要等到8:30至開始，太后已無耐性等，而且又嫌地方地踎，（唔知佢從幾時開始貴左）興趣不大，所以無等拍賣開始就離開了。

(市場外貌，係室內魚市場)

一早起身先去仙台朝市，呢個朝市雖然都係遊客必到，但仍然好地道，就似我屋企樓下的街市一樣，當然食材靚好多，太后行得好開心，可惜當日落大雨，否則更盡興。太后選左幾個生果，放回酒店就出發去松島。今日天氣同昨日差得遠，昨日天朗氣清，萬里無雲，今日天陰有雨，氣溫仲差左十度，幾凍下。

(酒店外貌，似住宅)

同呢個酒店集團幾有緣，集團於日本只有兩家酒店，咁啱都被我選中，上次在青森陸奧市。若我一早知道係同一集團就未必會選擇，因為陸奧店似一間賓館，簡陋殘舊，大堂一陣煙味。好彩仙台店清潔整齊，雖然都係有點舊，房間基本，賓館格局，但對比起其他車站附近的酒店，價錢算平，始終一分錢 一分貨。酒店位置方便，朝市就在隔離，行去車站步程10分鐘，商店街步程都係二十分鐘左右，好方便。

2018函館仙台遊  餐廳篇 閣@仙台

去日本食pancake係指定動作，相信每個城市都有自家出名的pancake店，所以唔揀連鎖名店。在網絡上揾到BallPark，喺tabelog都有三點幾分，應該可以？餐廳位置在距離仙台站東口步程十幾分鐘的民居內，四周環境清靜。餐廳充滿夏威夷海灘風情，一派懶洋洋的感覺，我在平日下午來，客人較少。pancake 有蛋味，內裡鬆軟綿密，可惜表面似over cook， 帶點乾硬，整體不過不失，喺餐廳見到有雜誌介紹pancake店係某年仙台百大人氣餐廳之一，莫非今日失手？

一早起身就同太后去函館朝市，當年佢跟團，得好少時間行，又迫人。今次我地晨早去，太后可以慢慢逛慢慢影，仲可以烚隻蟹食下，再叫佢食海膽同魷魚，佢話食唔落，點知回程時反問我話人地去魚市場好多刺身食，點解佢無，激到我彈彈下，立即攞番d相出來自辯。

2018仙台函館遊 酒店篇 Resol Hakodate (瑞索爾函館酒店)@函館

2018函館仙台遊  餐廳篇 菊泉@函館市元町

旅程第二日一早就check out坐新幹線往函館，太后𠲖𠲖吟吟話點解要咁早，對於一個覺得坐新幹線同坐地鐵無分別的港產刁民解釋係無意思，直接比佢睇環境好過。原本想太后試下火車便當，不過佢話唔喜歡凍食，結果千揀萬揀，揀左個蛋糕仔， (真係揀左好耐，因為我地有JR pass， 幾個閘口出出入入係咁揾），我比零錢佢自己買，佢買完好開地帶住勝利的笑容回來，我覺得似同少爺仔去旅行，果然小孩同老人家係同一個type。上到月台，太后好奇怪點解要咁早排定隊，直至佢見到個個都係咁，至明白當地文化。太后對上一次喺日本坐火車已經係80年代，當時仲叫子彈火車，佢喺車度一直讚嘆車廂乾淨，同高鐵無得比，之後睇住駕駛員一早為佢準備好的韓劇，四個幾鐘頭比想像中過得快。

因為第二朝早車往函館，所以選擇住東京站附近，由於臨時更改行程，價錢較平的住宿已滿，唯有退而求其次，選擇呢間離東京站步程15分鐘的小型酒店。酒店位置靚中帶旺，其實離JR神田站(即山手線東京站的下一個站)只需幾分鐘步程，車站旁，好多餐廳，酒店位置靜中帶旺，小清新格局，房間細細，但所需物品一應俱全，我最喜歡酒店夠乾淨，空氣淨化都做得好好。

太后出巡，必食鰻魚。由於香港難揾到質素好的鰻魚飯，所以我每次去日本必食。太后亦係鰻魚迷，上次去日本某市郊小店食完後念念不忘，所以今次一定要安排一餐鰻魚飯。餐廳好易揾，喺銀座GSIX後面小街，家庭式經營，鰻魚係炭火即點即燒，夠惹味。雖然鰻魚汁稍咸，但係都幾滿意。太后五分滿分比四分，佢話其實想比五分，但又好似太誇張，好明顯讚賞唔係佢本色。

(買極都錯的火車證 )