Foodie 生活雜誌

晨早起床，喺温泉旅館嘆完早餐後就坐新幹線回東京。一出門見到有豪華轎車等侯，心想真係一分錢 一分貨，仲同太后話我去咁多次温泉旅館都未坐過豪華轎車接送，不過幾秒鐘後就清醒番，因為我記起同集團在附近有一間大型旅館，果然，我只係坐唔夠兩分鐘的車程去轉車。去到大型旅館等車期間，太后對我話 : 「食食，我都係喜歡我地昨晚住嗰間旅館多d 。」我壓抑住內心的激動，重重地搭住太后的膊頭，語重心長地吐出一句 ： 「當然啦！」心諗 ：鬼唔知呀媽係女人，相差幾倍價錢！

因爲知道有個美食節在舉行中，想見識一下日本美食節係點，返回東京安頓好行李後立即前往。可惜好失望，塲內的食品係平日街上買得到，而且太多人，要排長龍，我同太后象徵式食左少少嘢，行個圈就離開。之後往隔離的昭和紀念公園賞花，可惜對於看盡天下美景的太后，一個大花圃係滿足唔到佢，當我歡天喜地諗住同佢影相，佢冷冷地拋下一句 ：「係咁咋？有咩好影？」勉強影兩張就坐埋一邊。我無理佢，繼續自我興奮，仲幾欣賞呢個遊樂設施完善的大公國。

晚上入住上野酒店，同太后去遊客必到的阿美橫町遊覽後，帶太后回酒店休息，之後我自己去附近一嘗渴望以久的錢湯體驗，再滿足地返回酒店。

離開旅館的豪華轎車

兩分鐘後夢醒，好彩太后都分得出兩間旅館的分別

美食節入場

場內係嘉年華會形式，有食有玩，適合一家大細來渡週末，不過作為遊客的我就唔多啱

好多不同食物攤檔，不過每檔都要排長龍，加上款式唔太吸引，無心機排

最後只食左呢個芝士菇

之後往昭和紀念公園賞花

是日無料入園，走運了

公園好大，分好多不同區域

嬉水區

燒烤區

兒童遊樂區

大草地，好多人帶備帳篷來野餐，好羨慕

公園太大，可以租單車

園內小食店，唔怕餓親

太后無興趣的花圃

一個罌粟花小山坡，居然可以任採任摘，可能因為花期快完結，第一次見，與民同樂，有意思。好多人有備而來，帶齊剪刀等工具

園內提供清水清洗花泥，真貼心

大家滿戴而歸

晚上太后揀在阿美橫町內食牛肉飯

原來酒店附近有錢湯，想浸好耐了。覺得錢湯好街坊，好在地。第一次獨自前往。

以為只係上年紀的人至會來錢湯，原本都有年輕人

先在門口除鞋，放好

購票方可內進

每日都有不同效用的風呂，當然係落不同的温泉粉

錢湯即係澡堂，好有生活感，亦都好街坊，入面的設施基本而懷舊，麻雀雖小五臟俱全，有浴池、jacuzzi、小小的露天風呂，仲有可以睇電視的sauna，一個放鬆好去處👍🏻