Foodie 生活雜誌

一早起身就同太后去函館朝市，當年佢跟團，得好少時間行，又迫人。今次我地晨早去，太后可以慢慢逛慢慢影，仲可以烚隻蟹食下，再叫佢食海膽同魷魚，佢話食唔落，點知回程時反問我話人地去魚市場好多刺身食，點解佢無，激到我彈彈下，立即攞番d相出來自辯。

之後坐車落仙台，今日無咩做，四圍行下，先同太后去食pancake，食pancake 期間，太后好奇怪地問 :「你又話你次次去旅行都會hea下食下午茶嘅? 點解我地無？」我呆左咁問佢 ： 「咁你覺得我地而家做緊咩？」佢好似剛瞓醒咁哦一聲。太后就係咁，總係唔會享受當下，每次都係上次的比今次好，總係懷念上次，神經病，之後呢類情況不斷發生。tea完後四圍逛，由於所有嘢喺太后心目中都係貴，所以佢絕對唔會行百貨公司，就算行都只會不斷吟，叫你唔好買，佢腦海係無「行街」兩個字，只會將「行街」同「買嘢」二字連在一起，為免我會忍唔住怒吼的畫面上youtube，我決定同佢行一間我點買佢都無聲出的地方： 100円店，佢都行得好開心，立即變成大豪客。仲要行足幾間。

晚餐去當地人介紹的牛脷店，太后此行重點食品之二（之前食左鰻魚飯）原本最出名的幾間都喺火車站的牛舌通有分店，但我唔甘心食喺日本其他城市都有分店的牛舌店，結果同太后食左當地人介紹，無咁遊客feel的「閣」，大家都好滿意，之後漫步回酒店，hea足一日。

太后得知道可以執相之後，都唔介意影相，但大部份都係我要求，不過唔明點解佢會指明要喺間丼店門口影相，真係聖意難測

有圖有真相，我叫過佢食魷魚！

離開函館坐新幹線去先台，要去新函館北斗站至可以轉新幹線

學校活動，成班學生佔幾卡車，幾驚同佢地一卡，肯定嘈死。

太后終於肯買條粟米上車食，我好安慰

我話要影張太后駕到，佢立即擺出一副串樣駕臨仙台，比到戲👍🏻

pancake time

好在日本有一百円店，點買太后都唔會吟

晚餐食左太后好期待的牛脷，佢比4分㗎！輕輕鬆鬆的一天