Foodie 生活雜誌

終於完結7日safari之旅，最初計劃係完左safari就返香港，但我覺得咁遠飛到過來非洲，無理由咁快走，點都要揾多一個地方去，咁啱團友睇左youtuber Polly小姐的介紹，想去Zanzibar 睇海豚，咁我地半團人去Zanzibar ，半團人返香港了。作為一隻井底蛙，對非洲的印象係草原、獅子、大笨象及土人，從來無想過會有沙灘，仲要係水清沙幼的沙灘，簡直係跳出我的認知，真無知。喺Zanzibar 的五日四夜都係住沙灘旁的酒店，純渡假mode ，我覺得Safari 係被包裝後的非洲，所有接觸的人與事都經過過濾，全屬高級出品，到Zanzibar 係半包裝，雖然都係遊客區，但已令我接觸到少少當地人同比較地道的食物，係另類開眼界的體驗。

離開草原之前，見到豹哥昨晚食剩的餐點，隻角馬咁重，都唔知佢點拖上樹

返回Arusha轉機去Zanzibar ，等上機期間會有職員上前揾你，同你登記行李放上機，睇清楚行李有無搞錯。喺等候期間我真係遇到youtuber Polly原來佢帶第一團非洲旅行團過來，同佢傾左幾句，佢好友善。

今次架機大少少

到喇

Zanzibar 係國際機場，雖然都係簡陋，但已同內陸的差好遠

Zanzibar 旅遊業非常發達，有牌寫明叫車的價錢，呢度主要用美金

我地一早已訂左酒店接送

途中經過多條村落，都係比較落後

去到海邊，見到好多好靚的酒店，但我地訂的比較平實，旁邊就係當地人住的地方

好彩酒店尚算ok

放低行李先醫肚，之前入住的都係靚酒店，而家來到地道餐廳，好簡陋，坐室內都大風😅

睇google話係高分海鮮餐廳，但餐牌上十樣嘢有八樣無，最後又係點最穩陣的魷魚，其他都唔記得係乜

飯後行下沙灘

呢個沙灘亦係一個商業區，一行出去就有好多瑪沙族人向你搭訕兜生意，初初覺得幾有趣，好快就覺得煩厭，我試過廣東話、普通話同韓文佢地都繼續煩，結果用日文佢哋就唔識聽，行開左。

仲有阿姐賣衫

今日好大風，行左一陣就返房，晚餐都喺酒店內食，食完就休息了。