Foodie 生活雜誌

細細個睇好多動物紀錄片，最有印象就係動物大遷徙，見到好多角馬同一時間一齊過河，場面震撼，夢想日後可以喺現場睇就好囉，估唔真係有呢個機會，有少少夢想成真的感覺。今年八月尾出發的旅行，上年十月已開始籌備，因為交比agent負責plan，加上朋友仔做聯絡，所以我乜都唔理乜都無睇，諗住當跟團咁，比完錢等出發就得，只知出發前要打針。點知出發前開茶會至知原來去坦桑尼亞(下稱T國)好多嘢要注意 ： 先來行李，因為要坐小型飛機，唔可以帶行李箱，要軟喼，再來連埋手提行李只可15到20kg，諗住非洲天氣熱，帶薄衫就得，原來非洲的季節唔係分冬夏，而係分濕旱，今次我去係旱季，天氣早晚較凍，要帶fleece及gortex，去safari 深色衣物唔著得，因為怕被蟲釘，鮮色衣服又唔得，怕被動物追，只可著大地色，結果要買衫買喼。

原來去非洲要怕的唔係獅子猛獸，而係要怕蚊，因為會散播瘧疾，我怕死，所以又要食埋藥，原來食藥唔係食一粒，係要出發嗰日開始每日食，回來後要食多七日，似食避孕丸，若選價錢平的，要食足廿幾日。之後知道酒店無風筒，唔可以用水喉水刷牙，沖涼都要限住用水，營地會有獅子出沒，突然覺得好似去冒險唔係去旅行，心諗大鑊，有點熬底又有點後悔。去個旅行啫？點解要咁煩？再知道原來係無領隊，全程幾個地都係到地迎接，中途要坐小型飛機，即係點？所以出發前的忐忑左幾個星期，擔心好多嘢，結果係點？嚟緊的遊記同大家分享。(應該又要寫幾個月😝）

出發前要去打針（去到至知唔打都得），我打黃熱針，指定要去衞生署的旅游健康中心打，原來好多人book，若各位有機會要打針，記得早點book定。

除左打針仲要食藥，食足咁多日，之前後醫生會先講解針藥的用處及副作用，我知佢有責任詳細解釋，但講到好恐怖咁，嚇到我死，問醫生有無去過非洲，佢話 : 梗係無！

作為港女，平日只係護膚品的瓶瓶罐罐都一大抽，今次仲要帶浮潛鏡，加埋防曬防蚊用品，百七咁多嘢，見到喼細細，重量又唔多，另外T國係唔可以用膠袋，pack 行李有點難度。