Foodie 生活雜誌

首先鳴謝今次計劃行程的團長B，我只負責挑三揀四，毫無貢獻。

雲南地方大，景點多又分散，唔可能一次去哂。就算揀地方都唔可以貪心，因為車程長，所以計劃行程時要花點心機。今次我去左大理、昆明及普洱，三個地方已用去十二天。

普洱景點  : 茶園、咖啡園，觀雲海及參加採茶活動

昆明景點 : 斗南花卉市場、市內遊

大理景點 : 洱海、大理古城

*要注意行程從昆明到普洱要走回頭路，每程六小時車，要預兩天移動日。今次行程重點係普洱，若非天氣太熱，建議去埋西雙版納，順路。

交通 ： 因為旅遊點分散，選擇包車會舒服點。包車最重要係有個好司機及一架舒服的車，今次睇網上評價找司機，在微訊商議行程及價錢。我地揀一口價全包，國產七人車，建議連行李只坐四人好了，十一日包車價為$12500，包路費、油費、泊車費，司機自行負責自身食宿，不過沿途有時都會同我地一同用餐。價錢只作參考，實際係以路程長短定價。

今次的司機超哥性格沉穩慢熱，駕車安全，準時又細心。唯一缺點係抽煙抽得厲害，有時會帶著煙味上車。

📣📣司機 聯絡方法 ：汪曉超 13700697979 可加微訊，QR code 在附圖。

天氣 : 7、8月係雲南的雨季，大理、昆明早晚天氣涼，約十多度廿，下午陽光猛烈，氣温都係維持廿多度，好舒服。愈南下愈熱，普洱市平均三十多度。三個地方天氣時晴時雨，天文台都只能話個大概。

衣著 : 短衫短褲，加件風褸就可以

食 : 從昆明到普洱一段路，少數民族多，食物口味偏重，多鹽多油又辛辣，初嘗覺得幾新鮮有趣，食多兩餐開始頂唔順。昆明及大理係大城市，選擇比較多，不過都係以中菜為主。

住 :  行程中所有住宿經trip.com預訂。我選的係中價酒店，水準跟一般國內酒店一樣，望落去非常不俗，但住落總有甩漏，不過無大問題就算，建議選新落成酒店會好一點。

電話卡 : 鳴謝駕駛員為我準備的中國聯通電話卡，12G咭用足咁多日，接收無問題。

付款方法 : 而家國內遊，比錢都成為問題。我今次用港版支付宝，已做身份認證，信用咭扣數，全程無問題。但朋友的微訊及支付宝就算做左認證加埋國內户口都時得時唔得，唔明點解。現金都可以用，但店員通常會面有難色，因為店家無零錢，找贖係一個問題，好多時找錢要掃碼入微訊。

總結 ： 今次雲南之旅感覺良好，風景美麗，一路遇到的人民及服務員都友善有禮，一洗以往對國內的負面印象。雖然清潔程度及服務水準仍有進步空間，但絕對可以接受。

尤其係衞生間簡直係有驚喜，高速休息站的衛生乾淨，就算山區的雖然簡陋但都全無異味，令人感動。抱著多接受，少比較的心情去感受就好了。