Foodie 生活雜誌

12/2021光顧

又一次中左開飯網好評䧟阱。睇介紹話係高級粵菜，食完後只覺得無論食物、環境、招呼都無樣高級，只係升級版小菜王，好彩係價錢都唔高級啫。餐廳經理熱情地介紹招牌菜，可惜我唔啱食，只揀左咕嚕肉，其他小菜就麻麻，見到餐廳全塲客滿，好熱鬧，枱枱都點差不多的打咭feel菜式，可能要點招牌菜至好食卦。

鮑汁鳳爪 睇個汁都知唔得，鳳爪唔夠柔軟亦唔入味

冰鎮黃金球配話梅 黃金球即係冬瓜球，配話梅味道應該更清新，可惜又係唔入味

咕嚕肉 外皮酥脆，豬肉肥瘦均勻，茨汁酸甜合度，算係唔錯，但個汁因為要做拔絲效果，所以好厚，我就寧願食普通打個甜酸汁茨好了。

小炒王 朋友喜歡小炒王，每次食飯通常都會點，慢慢我都有比較。呢個有芽菜、韮菜花、腰果、蝦乾，仲有炸芋絲，炒得好香，食落口感豐富，炒得唔錯。

蛋白松露炒帶子 我食中餐極少點松露菜式，呢個都唔好食，賣相成pat嘢咁，蛋白又厚又油，帶子無味係必然的，加埋幾滴松露油更可怕

脆皮牛腩伴咖哩汁 睇相都知乾到牛肉乾咁，仲要完全無味。經理話因為呢個菜主要用來送紅酒，要有味就要點咖喱汁。我即時話咁就死得啦，要靠個咖喱汁至有味，咁即係舊肉唔得啦，見經理尷尷尬尬話會向廚房反映，都無謂再講落去。既然比碟咁嘅肉送紅酒，不如直接食牛肉乾，起碼有味。

川辣肥腸 肥腸好似無乜處理過，肥膏肥到封喉，亦無咬口，差

啫啫芥蘭煲 唔夠香

經理問要唔要點甜品，咁嘅質素仲點會落搭？結果餐廳都有送甜品

餐廳喺商厦樓上

地方細細，有兩間房