Foodie 生活雜誌

11/2021光顧

專食鰻魚的餐廳，除左鰻魚飯，仲有沙律、串燒等小食，餐廳領有酒牌，可以來飲番杯，細細間，好骨子。餐廳標榜食日本鰻魚，即點即燒，從生燒到熟，等候需時，絶無欺塲。喺香港硬係食唔到好肥美鰻魚，呢間都無例外，質素唔算突出，但又唔差，做到日本一般店舖的鰻魚飯水準 ，距離好好食有一段距離。若無得去日本都可以來食下，不過價錢係日本的一倍😅

餐廳侍應都係中年人，服務殷勤，斟茶斟到有名係吸水珠珠的我都飲夠👍集團喺附近一共有4間餐廳，一間鮨店、兩間拉麵店、加埋呢間，厲害👍

坐底只點鰻魚重，原來係套餐，包埋前菜、蒸蛋、湯及甜品。先來蒸蛋及前菜

鰻魚凍，鰻魚同高湯一齊雪凍，高湯清甜，鰻魚肉緊實無骨，不俗的小食

蒸蛋夠熱，蛋內都有鰻魚

鰻魚重及清湯，清湯無左個鰻魚肝

鰻魚燒得幾香，但唔夠肥美，個飯鋪左蛋絲喺面，鰻魚兩邊突左出來，擺盤似港式food court feel，米飯無日本米的粒粒分明及帶點黏口的感覺，（雖然香港好多店家標榜用日本米，但我好少食到日本飯的味道）鰻魚汁味道適中，普通的一個鰻魚飯。個飯睇落有點的式，但飯量夠，又夠飽喎。

餐廳可以order原條日本活鰻，要預早order，價錢當然有番咁上下，我喺日本食過原條野生鰻魚，又食唔出特別之處，仲覺得養鰻肥美d😅不過侍應好好笑，我聽到客人問佢活鰻同我地喺餐牌點的有乜分別，侍應答分別係朝早劏定同即刻劏

野生活鰻分享

https://hearoom.pixnet.net/blog/post/346056997-2017山陰山陽大阪遊-day-6-餐廳篇-うじょう亭-%40

甜品 咖啡忌廉丸子及綠茶蕨餅。咖啡丸子咖啡味濃，糯米外皮包住滑滑的cream，口感幾特別，好味，又有我喜歡的蕨餅，呢個甜品小點幾好

餐廳喺歌賦街，同一條街上有多間食店

餐廳好細，得廿零個座位。

玻璃廚房內見到廚師忙碌地燒鰻魚，用備長炭燒，有焦香味

全店最搶眼係個8K大電視，當日播緊介紹瀨户內海的風景片，瀨户內海周邊去左幾次都未去哂，有機會要去多次淡路島及未去過的高知。

厠格內連牙刷都有埋，看似好細心。不過有趣在洗手盤在厠格外，而且只得一個，若你想刷牙，就會被行來行去的人見到之餘仲阻住人洗手，其實餐廳係咪打算比人攞隻牙刷回家刷牙？