9/2021 光顧
睇介紹話係hidden jam，睇相都唔錯，但朋友食過話唔得，但反正book左位，都試下啦。原本book左晚餐，見有午餐就食午餐試下水温先。餐廳開放式廚房加一列吧枱，食set 為主，lunch 有兩個set : 5 course set 及 marble set，我揀Marble set，食兩款日本牛。食材味道均一般，團隊由侍應至廚師比我的感覺都唔夠專業，同個裝修唔多夾，成餐飯好似食快餐咁，若唔係出左亂子，半個鐘搞掂。感覺非常麻麻，試完後取消左之後的晚餐訂位。
刺身 拖羅及牡丹蝦，質素可以。好彩事先話左唔食赤身。
燉牛肉清湯，湯夠熱，但唔夠清澈，可能係加左塊牛落去，搞到有油浮面，其實若係功夫夠，一碗清湯已可顯功架，若以食牛為主的餐廳，呢啖湯就唔合格了。
宮崎牛三文治 打咭三文治，烘得香口又有空氣感的方包夾住塊厚切吉列宮崎牛，肉嫩鬆化，但唔覺後好好食。
尾崎和牛薄造 鐵板和牛薄切，配飯及温泉蛋同食，好飽肚。話說上枱時已見到牛肉生多過熟，咁食牛又唔會食全熟，所以都照食，但一口咬落去覺得唔多妥，打開塊肉見到睇入面係全生，侍應見我面有難色，叫大廚過來，大廚話幫我再煎煎塊肉，我有點滴汗地問 : 咁薄，再煎係咪好易overcook?佢至話整過塊比我。正諗緊飯同蛋都會凍，好彩侍應話會換比我，全餐唯一的安慰。
第二碟來到，牛肉僅僅熟，好彩比到應有水準。牛肉下面係大葱及豆腐，温泉蛋加左壽喜燒汁，甜甜地好送飯。雖然牛肉好滑，但又係嗰句，我應該唔使再食和牛，因為我唔識欣賞，實在食唔出牛味，都係食番澳洲美國算了。
甜品 柚子雪芭
咖啡
餐廳喺酒店1樓，店面有神秘感，但比個安心出行code破壞哂美感，好心就貼入面啦。
行入餐廳一列吧枱，盡頭係兩間廂房
開放式廚房，四人團隊但無乜隊形， hea下hea 下咁。侍應都係愛理不理，行行企企感覺好hea
房間精緻
留言列表
香港食食食 (25)
