5/2023光顧
每日有海量的飲食介紹文章，睇下試下，試得多就會知自己同邊個筆者啱口味，邊個唔啱。啱嗰d固然會一直睇跟住食，唔啱嗰d我都會繼續睇，因為咁樣就會令我剔走好多餐廳。
今次我跟食的筆者日後會被我列為剔走型。話說光顧的餐廳喺商厦內，精品中菜，裝修清雅，佔大半地方係廳房，會所格局，坐落就知做熟客生意，深感不妙，但坐低左就既來之則安之。菜式偏貴之餘份量少，食材係好的，但價錢偏貴，食價比低。而且上菜慢，就算我第一枱坐低，餐廳都上菜比遲來的房間客人先，同一晚同一碟菜式，居然出品都有差距，加上當晚隔離枱的貴客旁若無人，粗口橫飛，非常嘈吵，唔知以為去左大排檔，侍應當然唔敢出聲，埋單時我不禁埋怨幾句，侍應話唔好意思，下次唔會，我話唔會有下次了🫣呢個價錢，我應該有頗多選擇。
平心而論，餐廳選的食材係好的，若唔計價錢，只食質素係幾好。另外又想講下上菜的問題，上菜次序都係一種學問，顧客習慣個個不同，好難一一應對。好似今次咁，
餐廳係遂碟上菜，我初初以為上得慢，了解之下經理話餐廳類似私房菜，係遂碟上，但我覺得食中菜，宴會就話遂碟上，但我點小菜，若遂碟上，咪無左中菜夾下夾下的意義？之後我叫經理一次過起菜就好了。
至於點解嗰位筆者會讚？可能佢有江湖地位，所以餐廳特別招待，我等生客就無呢種福份了。記得筆者有次讚甬府，我食過，情況同呢間一樣，不過當時我係食完至睇到佢的文章。相信日後我要有自知之明，唔好再去名人食堂，因為跟本唔係招呼我呢類慕名而去的生客（玻璃心作崇🥹）
白灼鮮豬蹄筋
經理話一隻豬得兩條，確實係好食，筋肉嫩滑，蘸上以蔥頭煮香的豉油，好味😋
砂鍋生啫豬肉餅
正常我係唔會點，但講到係招牌菜，又試下。味道唔錯，豬肉嫩滑有咬口，介紹話肉餅內有咸魚，但全無咸香，而且一點都唔覺係生啫，似蒸好個肉餅放入砂鍋，唔覺有特色。
香茅台灣白鱔煲
白鱔放入煲內以香茅啫，白鱔下以蔥頭墊底，清香撲鼻，用台灣白鱔，同平日食開的不同，肉質緊實多骨。不過我都係覺得豉汁蒸鱔好味d。
酥炸大腸
見到捧入房的大腸肥嘟嘟，油光滿滿，好吸引，經理話仲有一份，我又點。結果上枱係咁嘅樣，似剩番的頭尾尾再翻炸咁，就係呢道菜，令我覺得完全無癮。
富貴鹽香雞
點左半隻，皮脆肉嫩，夠鹽香，但雞肉有點乾。
蝦子百千層時蔬
菜芯清嫩，茨汁厚左d，蓋哂蝦子味
蛋白杏仁茶
餐廳喺大厦二樓，裝修骨子，開飯網寫盧押道，其實呢個係後門，應該喺謝斐道個門口入至啱
留言列表
香港食食食 (25)
