Foodie 生活雜誌

今日先去宮古市魚菜市場，行程聲稱有海鮮浜燒，我心目中係好似八户咁熱鬧，去到至知係小市場，當日仲無得燒，好彩有幾檔海鮮檔可以買刺身，團長又食到佢喜愛的新鮮元貝，目標達到。餐後去淨土之濱，沿住海岸線行去海灘，冬日的海岸特別寧靜，陽光伴海鳥飛翔，幾舒服。跟G神食完個豬扒飯午餐就回盛岡市行街。晚餐團友們去食盛岡冷麵，我無興趣，一條友做孤獨試食家去食串燒，再行下AEON就回酒店休息了。

一早開車去魚市場。東北景點分散路程遠，最好都係自駕

有雪喇！

宮古喺海邊，呢個室内魚市場規模較細，好乾淨

靠海食海，魚穫種類多

好大隻生蠔，食！

開餐

淨土之濱，去到見到呢個景，我都靜左，默默地想 : 有乜好睇？

原來未到，沿路行，有熊出沒的牌

可以坐船遊覽，我當然無坐

穿過隧道拐個彎至見到豁然開朗

海鳥悠然自得拍拖

海水清澈透明

呢個就係淨土之濱，即係天堂一樣的海灘……

沙灘旁邊有餐廳及買手信的店舖，餐廳個景好靚，可惜無開😂

有巴士來，好彩我地有團長，可以坐私家車

午餐豬扒飯，不同款的炸豬扒定食。

回到盛岡市，見到宮澤賢治的踪影

晚餐離團獨食，走入地道串燒店，同隔離客人及廚師雞同鴨講地溝通。點左廚師發辦餐，老闆大部分比左豬我食，雖然豬係貴d，但我鍾意食鳥嘛，結果偷偷叫隔離阿叔幫我食，佢又禮尚往來比番兩串雞比我，真窩心