Foodie 生活雜誌

7/2020 光顧

新派點心，味道較重，但唔算口渴，可以接受。點心精緻，不過好快上枱，唔係即點即蒸。餐具有點殘舊，餐廳係去年12月開張，唔明點解咁快咁殘舊。整體麻麻，試過就算。

精緻茶具

黑椒和牛酥 酥皮酥鬆唔油膩，和牛味道濃郁，太后好受落，食左兩件

海膽蟹肉春卷 食到蟹肉的鮮甜，春卷皮厚薄適中，炸得乾身，不過太后教訓我，話海膽唔係熱食，又細塊，應要刺身咁，大大塊至好味，鬼唔知呀媽係女人，真係縱壞左

黑毛豬腸粉 家陣去新派中菜廳，你唔會見到餐牌安份地寫叉燒兩字，總會喺前面加好多形容詞，呢度索性無埋叉燒二字，因為舊肉真係無燒到，但食落都係有叉燒的感覺，幾好食，腸粉皮厚左d

黑蒜燒賣 黑蒜包在燒賣內，好香，幾好味

紅菜頭野菌餃 個皮唔得，咬落腍pat pat。

擔擔湯包 又係個皮出問題，食落似翻蒸，湯過於濃郁，肉削口，唔好食

雲南黑菌手撕脆皮雞 雞皮燒得香脆，不過應該搽左好多油，手撕雞又係落左好多松露油，搞到油淋淋，所謂的雲南黑菌完全無味，菜式應該改名為「松露油撈手撕脆皮雞」