第二次入住Miyako 集團旗下酒店，之前大阪店好滿意，今次博多店更滿意。首先係地理位置優越，酒店喺博多車站紫筑口一出步行幾分鐘就到，無博多口咁繁忙，但餐廳便利店藥房一應俱全。酒店B1直駁地鐵站，落雨不怕落雪也不怕。房間面積合理，雙床房夠開兩個喼，衛浴乾濕分離。酒店頂樓有温泉，行完一日的最佳享受。
不過今次酒店前台犯左一個低級錯誤，話說我經booking.com訂左兩間雙床房，喺網上填寫入住人姓名時，我每房填左一個名就算，一向都係咁，點知入住時櫃檯職員話我訂的房只係一人入住，要加人就得加錢，一人一晚4800yen，結果係加兩個人，三晚合共28800yen，可能我英文唔好，加上同日本人解釋係要用好多時間，當日行完街已好攰，我照比錢息事寧人就算，最緊要大家有房瞓。上到房愈諗愈唔對路，即時email booking.com，因為當時已夜，booking答應同我跟進，結果來來回回通訊搞到我三日後回來再入住至搞得掂。酒店仲唔可以即時退款，要credit card過數後至再退款，咁結果我又要蝕兌換差價，雖然係小數目，但無理由要我suffer，好彩最後銀行退番比我。
喺呢件事上，我真係比酒店職員負評，但我相信係個別事件，搞掂就算，無損我對酒店的喜愛。相反我要讚booking.con同銀行職員的服務，尤其係booking.com，我幫襯左超過十年，客服水準高，訂房後有問題可以直接與客服對話，方便溝通。雖然好多人話佢比較貴，但我都只幫襯佢。不過國內線都係揾trip.com。
酒店喺十字路口，四通八達，酒店建築帶cyber feel，好搶眼，行過一定見到
房間大小適中，顏色柔和
咖啡茶水齊備
平版控制全房冷氣燈光，版面簡單易用，插頭(無影)有USB
有睡衣浴袍提供，可穿浴袍直上温泉層
衞浴乾濕分離，浴室寬敞
提供標準洗漱用品，今治毛巾，dyson風筒
身體清潔用品品質不錯👍🏻
獨立電梯上温泉樓層
温泉分室外室內(圖片擇自網上)若想浸室外，記得帶泳衣。
酒店地庫係麥當當，亦係鐵路入口
從機場坐的士至酒店價錢 (僅供參考)
留言列表
香港食食食 (25)
