Foodie 生活雜誌

我唔鍾意太熱鬧，所以無選心齋橋一帶的酒店。酒店位置係本町，離心齋橋十分鐘左右步程，去大阪站要坐地鐵出入，酒店離地鐵站約五分鐘步程，地鐵站有電梯到地面。酒店開業一年，好新淨，今次住左premium 及standard 兩款房間，面積及設備都滿意，最特別係有露台，啱哂草根的我晾下衫。大堂有免費飲品供應，一般商務酒店的寄放行理、洗衣機、微波爐等設施齊全，附近好多不俗的餐廳，隔離有百貨店及開到午夜十二點的超市，生活機能極好。我好滿意間酒店，連一入門的香氛都好舒服。唯一微言係酒店唔肯幫我打電話去餐廳訂位🥹

機場至酒店交通 ： 機塲搭乘南海機場線至天下茶屋站，轉堺筋線至堺筋本町站 ，7號出口，再行4分鐘（全程約1.5小時)

酒店外觀，似住宅多過似酒店，得十幾層

先去premium 房。官網寫23平方尺，但望落比想像中細，應該比左好多位個厠所。

房間有露台，露台幾大，最特別係齋露台，連張櫈仔都無。房間向街，遠望見到道頓堀摩天輪，不過夜晚車聲幾嘈

洗手間夠大，獨立淋浴及浴缸，太后唔使爬入浴缸沖涼，安全得多。

提供浴鹽及護膚品包，standard房無，原來浴鹽要100yen，護膚品包要200yen，點解我知？因為standard房無，我以為漏左，太后要浴鹽，我去counter 問至知。

衣櫃有感應燈，細心

太后話premium 房有咖啡機，standard 房得即沖咖啡，不過我無飲亦無留意，因為即沖咖啡已被太后秒殺…..放左入喼。

插頭都係我注重的，呢度有國際插，又有USB，好貼心

大堂免費使用，有免費飲品供應，但唔可以食嘢

有咖啡、茶及氣水提供

每位住客有一個代幣換酒飲，一般餐酒，當然唔會有靚酒

大堂有洗衣房

自助寄放行李，用密碼鎖，仲有磅可以磅行李。不過酒店講明只提供地方，無責任看管 。

我好少喺酒店食早餐，一來貴，二來係貴，三來都係貴😝但經過都影比大家參考下，幾豐富㗎。

之後再入住standard房，房間面積好似差不多，不過衣櫃變左掛架，露台對住後巷，無左浴鹽及洗面套裝。

露台樓望樓，同香港一樣，好有親切感😫

反而厠所好過premium room，乾濕厠分離，讚👍🏻

酒店附近生活機能充足，行兩分鐘就有一間營業到午夜的大型超市，太后喺度買左個稱心滿意的晚餐。

連住地鐵站的商場好特別，開喺橋底，成條彌敦道咁長，入面似羅湖商業城，話係賣泊來品，似我地的批發店。我日日經過，唔好失手勢，買左兩個手抽袋😝

地鐵站堺筋本町7號出口

酒店街口位於商場3號館出口，行李多的可乘電梯。