2016九州一圈遊餐廳篇：きままなキッチン@霧島 @ Foodie 生活雜誌

去日本旅行，打書釘係節目之一，主要喺當地雜誌揾餐廳。呢間森林小屋餐廳就係喺便利店打書釘的收穫。餐廳位置偏僻，在霧島温泉鄉的山上，離「壺畑」情報館約一小時車程，感謝團友在食同住方面比我話哂事，揸成個鐘頭車去未知的地方都毫無怨言，好彩今次都無令大家失望。餐廳在山林中，靠餐廳電話同Google 都揾唔到入口，結果兜左幾個圈再問人至得，原本可以揸車去到餐廳門口，但路窄我地車大，所以泊在停車塲再行上去較穩陣。

經碎石路行入山林中，一度以為係無呢間餐廳，好在一轉彎就見到兩間小屋，充滿童話feel。一間小屋係賣染藍衣物(indigo)、食材及zakka，另一間小屋係餐廳，有室外坐位，再行上去就係巨木參天的森林，好原始。餐廳由兩母女經營，走田園西餐風格，所有醬汁、麵包、香草皆自家種自家製，感覺新鮮健康，食物精緻又好味。餐廳無冷氣，但在盛夏的下午都唔覺熱。在餐廳四處參觀，逗留左好多時間，非常喜歡的一間餐廳。

店主因為想比女兒有更好的生活環境（第三代）所以來此開餐廳，自己都住喺附近小屋，用餐期間見有同學仔來探小女兒，一齊野餐，真係童話般的生活。店主問我點解知道有呢間餐廳，我估應該好少外地人來。餐廳地方唔大，建議先電話預約，若趕時間千萬唔好嚟，因為只有兩人工作，出菜好慢。呢度係慢活的時空，請預留時間好好享受。

初初好難揾，問人至知要喺呢度轉上去，所以有心去的請入牌上電話