2016九州一圈遊遊記篇： Day 6 鹿兒島-霧島-鹿兒島－Foodie 生活雜誌

一早就出發去參觀釀醋工塲'坂元のくろず「壺畑」情報館'。大家咪以為我成日寫食後感post一定好識食，去醋場咁招積，實則上係奶奶的意思，佢好鍾意買調味料，至於我，比枝一滴香我都分唔出。情報館(即係展覽館) 所在地背山面海，對住櫻島火山，好山好水做好醋。除左展覽館，仲有餐廳同工塲，到達後先在附近周圍兜，四圍影，唔覺意去左化驗室外，師傅出來友善地提出並非參觀地，要我地返回展覽館參觀，又問我地喺邊度來。可能佢見我地咁有興趣，我地泊好車後居然見佢從實驗室跑過來大樓親自招呼我地，其實大樓本身已有職員介紹，但佢似乎好想我地知道呢個地方，雖然語言不通，都好努力地介紹醋的釀造過程我地知，仲親自帶我地四圍參觀，完全感受到職人對自己專業的專重同自豪，佢對工作的熱誠，實在令我敬佩。情報館內除左有介紹釀造醋的短片，仲有商店，團友都買唔少，買完仲可以宅急便去福崗酒店，唔洗攞住周圍走，夠哂方便。不過餐廳係食中餐，無興趣，影左幾張相就算。

現代化的建築內藏傳統工藝

情報館全貌

有短片介紹釀造過程

師傅親自畫圖解釋

產品一覽

皇牌產品有得試味

前面係餐廳

餐廳外對住醋塲及櫻島火山，似一幅畫

之後去左一間位於森林處，好別緻的餐廳きままなキッチン午餐 (另文介紹)，餐後遊覽霧島神宮，去到已差不多5點，神殿都關門了，而且主宮在維修中，所以怱怱行個圈就走。神宮位於山林內，好有神秘感，希望有機會可以來好好行一轉。時間過得好快，返回鹿兒島市又已入黑，去市中心天文館揾食，結果又係食拉麵，點完食物後居然見到枝TVB錦旗，應該係旅遊節目介紹過，我好少睇電視，唔清楚。碗麵又的確唔錯，火灸腩肉，湯底唔太濃，餃子皮薄饀好味，配自家出品餃子汁，唔錯。不過最好食的其實係個醃蘿蔔，好清甜。飯後其實已經好飽，但我堅持要食白熊冰，其實呢d刨冰我平時係唔食的，但好耐之前睇過介紹話鹿兒島其中一個名物係白熊冰，所以有個印象係來到一定要食。結果明白都只係刨冰一杯，係大碟d配料多d，即係b仔涼粉，咁試完心息就番酒店大覺瞓了

霧島温泉，靜英英，呢個温泉市場最熱鬧，有足湯，但要付款