Foodie 生活雜誌

3/2019 光顧

久仰大名，酒家雖然好出名，睇過好多介紹，在我心目中卻仍然有點神秘感 ，一直想來食，但酒家提供懷舊中菜，碟頭大，要人多一齊食至得，終於等到同路人搞飯局，一行7人來探秘。可能因為係老牌酒家加上日日爆場，訂位時有哂格式規矩，仲好有態度，先要致電訂位，要打好多次至打得通，若你選擇食懷舊菜，訂位後要於開餐前5日再打去落單，再過數$500落訂，接聽電話的呀姐態度麻麻........感謝以上的事前工夫由朋友完成，否則我未必有心機訂位。酒家環境非常街坊，當晚每枱客都係預訂，大部分係區外客，開枝酒食中菜的吃貨，似乎係吃貨必到餐廳之一。菜色實而不華，功夫扎實，絕不欺場，用料足味道好，7個人食五餸一湯，飽到上心口，難怪日日爆到七彩。網上評論話招呼麻麻，我當晚由入座到離開的招呼都唔錯，侍應呀姐好友善，門口聽電話的呀姐都無傳說中咁悪。

酒家在彩虹邨內，仍然保留舊有裝修。

杏汁豬肺湯，杏汁香，湯味濃郁，湯料都煲到腍哂，不過得幾舊豬肺，太少了。

蠔豉生菜包 蠔豉好香，與馬蹄切碎，刀功細緻，切得好細粒，加入炸米粉碎，口感更有層次，炒得乾身，生菜雪凍，抽走水份後更爽脆，包住配料食，咬落脆咯咯，好好食

錦鹵雲吞 甜酸汁內材料豐富，除左一般的燈籠椒、菠蘿，居然有豬潤同雞肉，雲吞皮炸得香口，金黃酥脆，好味

八寶鴨 人多至可以點。鴨肉鬆軟，鴨肚內的蓮子清香，仲有冬菇薏米綠豆，好香滑，茨汁濃稠適中，食落唔會滯

酥炸蟹箝 蝦膠蟹肉結實足料，啖啖肉，唔會成口粉，外皮酥脆，不油不膩

蜜汁燒鱔球 蜜汁醬包住極肥美彈牙的鱔球，食落感覺有點似叉燒，可惜一枱七人，原來有五個人係唔食鱔，最後其中兩人肯食一件，但我同另一食友點都無可能完成，唯有忍痛剩低幾件。