Foodie 生活雜誌

4/2021 光顧

三坡坊內有好多餐廳，當晚一入去，滿滿成個大笪地咁放滿枱坐滿人，好有江湖味。餐廳喺街角，由年輕老闆主理，小菜好有鑊氣，菜式多樣化又有心思，食材喺隔離楊屋道買就得，新鮮過好多餐廳。朋友係熟客，正所謂識人好過識字，當然有好嘢食啦。餐廳以小菜為主，若要食刺身或特別菜色要預訂。

雞皮送酒，燒得有水準，比好多串燒店燒得好

龍蝦刺身，好甜美，朋友特別order

泰國生蝦 朋友訂，好耐無食過。生蝦隻隻肥美爽口，食兩隻都夠皮，辣汁夠辣，連蒜片食，爽YY

椒鹽瀨尿蝦 老闆話當日買唔到大隻的，只能提供中size，一樣新鮮啖咪肉，椒鹽香口，好惹味

水煮魚 先旨聲明，呢個係識人size，平日order無咁大。店主用石班起肉，啖啖肉，但我更喜歡桂花魚。配菜有大量芽菜寬粉酸菜，酸菜湯香濃，但可以再辣點。

黃金鮑魚 用咸蛋黃焗，柔軟香口，稍嫌搶左鮑魚的鮮味，但對於我，不失為一個新口味

炸蝦頭 剛剛的生蝦刺身剩下的蝦頭，炸香送酒，唔好嘥

腸粉蟹煲 膏蟹爆膏，下面墊住腸粉，吸收哂蟹汁的鮮味，腸粉好食過蟹

鐵板薑蔥蠔 蠔肉肥美，爆得好香，但食到呢度，我的戰鬥力已下降，有點浪費左佢的好

龍蝦泡飯 龍蝦刺身的廚餘，配埋葱、脆米同大頭菜食，晚餐完滿結束

當然唔少得飲杯酒