Foodie 生活雜誌

7/2021光顧

7/2021光顧

去大圍揾食，見到呢間cafe幾骨子，加上以蛋做主題，啱哂愛食蛋料理的我。定食味道普通，同food court 出品差不多，反而吐司同甜品賣相靚，啱晒打咭。餐廳好㕵場，平日下午都坐滿，客人輪流轉，假日應該又係長龍店。

7/2021 光顧

餐廳開左幾十年，係朋友的食堂，食過幾次，水準穩定，兩個太子爺落手落腳做樓面，一個親切一個cool，好大對比😆晚市9點後有孖寶餐提供，幾抵食。菜式以當日剩下的食材再組合，要等菜單即時出，幾有趣。當晚的亮點係黃金龍蝦配煎米粉及梅子蒸鱔。

7/2021光顧

上次同試過鰻魚飯，雖然唔算好好，但覺得還可以，即管帶太后來試下。前後只差一個月，點知每個餐居然加左一舊水，真誇張。今次太后食鰻魚飯，我點左個迷你懷石膳，鰻魚又係唔夠肥美，蟹膳份量少菜式及味道皆普通，物非所值。雖然師傅及侍應友善細心，但價錢太進取，要再揾其他店了。

7/2021光顧

朋友又帶我去食好嘢。韓國人開的餐廳，食物就似我喺韓劇見到的一樣，最好食係炸雞，我平日唔多喜歡食炸嘢，去到韓國點過炸雞都唔覺特別好食，喺度食完後就明白點解韓劇內的人咁鍾意食，原來真係好好食👍🏻餐廳去過兩次，第一次我自己同朋友去，食得唔多，第二次去就唔同了，因為朋友係熟客，我完全唔使點菜，由佢發辦，食左多款菜式，好開心。

7/2021 光顧

我的灣仔美食刺針朋友話呢間小店的出品唔錯，有我喜歡的豬膶，過來一試。食物唔錯，但我更留意的係小店整潔衛生，樓面個男仔好有禮貌又勤快，無一般粥麵店的老氣。

7/2021光顧

好友帶我食好嘢，開左幾個月的意大利餐廳，一睇個menu 好有Bombana 的影子，不過呢度晚餐價錢只能喺B店食午餐。食材高質，味道不俗，pasta 尤其好味，麵質彈牙，醬汁濃稠合度，讚👍🏻要帶喜歡食pasta的太后來一次。不過份量偏細。餐廳唔知係咪設計關係，聲音侷住左，嘈到街市一樣。最後要多謝朋友訂位及帶來美酒共享💕

7/2021光顧

原本諗住去同一條街的河內大娘食碗牛肉河，點知星期日居然唔開，吹脹！行前兩步見到呢間金牛苑，以前喺海港城店開店時間中會幫襯，好耐無食，又試下。午市套餐幾豐富，一個人可試多款菜式，每樣少少，啱晒我呢個孤獨試食家，食物水準不俗，間中可以食下。

7/2021光顧

朋友落order : 「金鐘至銅鑼灣，要坐得好，食物味道唔太差」一個好似無要求的要求，其實唔容易，因為朋友的「坐得好」唔係一般的好，加上下午兩點至食，想食的餐廳好多三點後休息，我地要坐足一個下午，選擇已經少左好多，又估唔到平日的下午都好難揾位，結果只剩Conrad Hotel 的lobby lounge，去到見到大把位。食完就明白點解咁多位，因為質素認真麻麻，好彩尚算坐得舒服。

7/2021光顧

老字號火鍋店，我第一次來。對我來講，呢個價位的火鍋店食材水準間間差不多，分別在擺盤有無雕花。我係實際人，最緊要食材新鮮，環境乾淨舒適，招呼好就得。呢間餐廳做得到以上要求，自家制餃子及肉丸都唔錯，不過每碟份量比較細，四個人食都要起孖。