Foodie 生活雜誌

我將呢間旅館稱之為「鬼迷心竅」。話說我喺網站上對旅館一見鍾情，不理路途遙遠，不理酒店無接送，要付高昂交通費，不理館內無大浴塲，一心一意要去住一晚，撞邪一樣，結果失望而回，仲連累團友浪費金錢，真係過意唔去。

整個旅程最令我滿意的一餐。餐廳由兩夫婦主理，男主內(大廚)，女主外（樓面）。食材優質，食物美味不在話下，擺碟同配搭都充滿心思，令我喜出望外，難得餐廳氣氛唔拘謹，餐廳主人友善，我地係最後一枱客人，離開時餐廳代召的士，夫婦親自送客，下次去東京一定要再去，期望再有驚喜。不過訂位較煩，可以致電訂位，但餐廳只於10:00-11:30, 3:00至6:00接聽訂座電話。若網上訂位要經飲食網站，有手續費。

話說兩年前朋友已向我推介此餐廳，但價錢實在貴，經過兩年掙扎，終於的起心肝幫襯，其中兩名團友原本興趣不大，主要係陪我，好彩食完後大家都好滿意，無浪費到金錢，我都放下心頭大石。四個人一樣選帝王蟹鮑魚套餐。鮑魚炭燒後切片食，另外有天婦羅。至於主角帝王蟹則全程由師傅解剖拆肉，只需攞起筷子就食得，由生食到熟，啖啖肉。仲上埋一堂解剖蟹學，長見識了。

晚餐以每位計，一定要予約，在網上揀定套餐，要填credit  card 資料，餐廳會hold 起餐費總數的信用額，但唔會過數，用餐後再付款。

東京銀座名店林立，好多名店都有附屬的餐廳或cafe，一直都想試下。當日剛從修善寺回到東京，打算選一間名店附屬餐廳午餐，咁啱當時最近的餐廳係貴婦品牌香奈兒的Beige@chanel，結果一個唔覺意，食左餐貴價法蘭西午餐。好彩食物有水準，味道好，份量足，餐具精緻，擺盤靚，環境舒適，服務好，合哂我要求，貴都值得。唯一缺點係食客個個身光頸靚，氣氛有點拘謹。

俢善寺温泉街地方唔大，好快行完。路經見到一個有趣的屋台，入去八卦下。唔知食乜，不過見到500yen 一位，即管試下，原來係one man band的蕎麥麵omakase ，一個餐有三款食法，即係食左三著麵，其實味道一般，不過老闆友善生鬼，就當係一個有得食有得影相的節目好了。

旅館分四款房間 ：花之藏、木之藏、谷之藏及山之藏，每間房都有個室風呂。我的心水係三樓的木之藏及地下的谷之藏，最後揀左3樓的木之藏，因為喜歡個風呂。房間舒適，地方闊落，廳房分明，可能房內唔夠光猛，房間唔夠光鮮，有點點舊的感覺（我𠄘認我對房間要高較高）。一泊兩食晚餐菜式精緻美味，用心煮，早餐豐富，侍應雖然唔識英文，但仍努力同我地溝通，提供專業服務，非常感謝，旅館又安排一位曾於加拿大留學一年的服務員接待我地，賓至如歸。

旅館舒適，温泉及膳食皆不俗，房間有點點舊，但整體而言好滿意，價錢非常合理，值得推介。先分享旅館環境及温泉，旅館位處河邊，環境清幽，全店以木及石為主要建材，配合大自然環境。館內有男女各一的大浴場，另外有4個貸切風呂，貸切風呂於check in 後至可以予約，建議入黑前先浸河川的貸切温泉，因為晚上無景睇。由於温泉環境個個不同，我地又貪心，check in後浸左3個温泉，第二日朝又浸一個，加埋自己房間的一個，簡直浸到甩皮，四條友忙住四圍走，唔知為乜，真搞笑。

團友話要食鰻魚飯，又話要食海膽飯，睇下個行程，喺東京實在無空檔塞個鰻魚飯入去，只有修善寺行程的兩餐無著落，碰下運氣。結果死好命，去到修善寺的旅遊中心，職員推介呢間。去到餐廳門口大大枝旗寫住鰻魚，應該無走雞。鄉村小店，食物簡單得來真材實料，味道扎實，食得順心的一餐。

從機場去到酒店check in 後，又到晚餐時間。一早諗定今晚要食串燒，喺日本食串燒價錢比香港平，質素比香港高，最重要係用炭燒，香好多，問問G神(google)，check到酒店後的串燒店「伊勢廣」幾合眼緣，決定去碰碰運氣，結果當然係無位。不過店主好友善，介紹我去前面，同樣係串燒店的「榮一」，可能佢見我一臉茫然，居然親自帶我到榮一店內同店員交帶。串燒店分兩層，好企理。嬸嬸招呼周到。由於我地唔識日文，店家只比兩個套餐選擇，不過之後追加其他食品都可以。套餐以燒鳥為主，有一串鴨肉，又有醃菜，結尾有雞湯及生果，水準不俗又飽肚，飲飽食醉都唔肉赤，可以一試。

因為旅程安排往伊豆浸溫泉，而往伊豆的火車由東京站出發，加上想食的餐廳大多數在銀座，所以今次入住東京站附近的酒店。睇過好多酒店選擇，Super Hotel LOHAS無論位置、設施及價位都合理。酒店對正東京站，雙床房夠位開兩個大喼，清潔整齊，仲有大浴場、自選枕頭等added value，每晚住宿可以獲取一個印仔，儲齊三個，喺到期日前可以作現金使用，係一個不俗的選擇。同日本好多連鎖酒店一樣，super hotel 有會員制，登記做會員後可以早於入住前半年訂房，酒店房間好搶手，我都係一早訂定。

6日旅程，以温泉及美食為主，全無景點。有關酒店及餐廳價錢，行程內已附上綱頁資料，請自行到網上查詢。