Foodie 生活雜誌

(11點已排成咁)

雖然我唔係炸豬朳迷，但去到日本總係想食一餐，因為日本的炸豬扒肉質特別鬆軟，米飯粒粒精瑩，好好食。今次呢間係人氣食店，星期六早上十一點嚟到已經要排長龍，多謝好友肯陪我癲，足足等左成個鐘至可以坐低食。為左節省時間，排隊時已落單，餐牌有好多款豬扒，唔識分，排左咁耐，唔可以求其，所以忍痛點隻價錢最高的(2590yen$。豬扒鮮嫩，鬆化可口，炸漿又薄又脆，隻油好清，無油味，毫不油膩。但又不至於傳說中咁入口即溶，佢始終係一舊豬扒。椰菜絲爽甜，麵豉湯清甜，全個餐都滿意。朋友點的好似係豬柳，只記得肉質較實，普通。

酒店西新宿Mystay附近的烏冬店，烏冬彈牙有勁，簡單的加豉油已好好味，我加左明太子，另外有炸物及冷盤可選作加餸，營業時間到深夜二時，係住在附近的消夜之選。

一向對甜品興趣不大，但好奇心總是有的，見到合心意的介紹都會幫襯。首次認識PIERRE HERME係佢個macaron ，曾試過著名的Laudree，但太甜，不對口味。食過朋友介紹的PIERRE HERME，唔太甜，多種味道都好香，好好味，印象深刻，所以估計甜品都必定出色，決定朝聖。

聽講近年東京的有名食店好難訂位，尤其係對外國人更嚴格，今次呢間星級天婦羅店係朋友代訂，有幸一試午餐，畢竟晚餐太貴了。餐廳在銀座的商厦內，分兩段時間用餐，12:00至1:30及1:30至3:00。幸運地由近藤師傅親自主理，師傅年紀唔輕，全程專注地對住兩個鍋，用心工作，食材新鮮，炸漿薄，應該係不錯的天婦羅，但唔知點解硬係不對胃口？想想終於明白原來係用油的關係！關東天婦羅用芝麻油，對我來講太重口味，我喜歡關西的紅花油，所以可能對好多人嚟講係美味的一餐，於我就一般了，除左套餐，亦追加著名的炸蕃薯，但都係一般，並無網上講的驚為天人，可能我唔識欣賞。虛榮的窮風流總算試過名店，感謝好友為我張羅。

吉祥寺係另一個家品雜貨天堂，一出車站北口已經係購物街，購物街固然好好行，但亮點係東急百貨後面的幾條街，好多個性小店，家品、日本style 時裝，小物等。同自由之丘頗相似，但因為店鋪在民居，感覺更親民，不太商業化。 喜歡的品牌如natural laundry, grin 等都可以在此買到。去到商店街就更熱鬧，除左一般藥房家品店，亦有東急及Paco，仲有一楝六層專賣outdoor 用品的店，呢度唔似新宿池袋等地方咁有壓迫感，逛得舒適，好喜歡的一個地方。

吉祥寺街頭

Z和牛Omakase ，將和牛以不同方式烹調，因為唔知食咩，所以由頭盤至甜品，每一道菜都充滿期待，呢餐食足兩小時，好滿意。餐廳在人形町地鐵站附近，因為並非於熱鬧的大街，加上冬日晚上街燈微暗，街上靜英英，以為走錯地方。其實餐廳就在東橫inn 隔壁。餐廳細細間，只有約二十個座位，其中部分係吧枱坐，星期三晚上都坐滿客人，我當然係預先訂位了。

旅館的晚餐並非名貴菜式，選用的都係在地食材，蔬菜，雞肉，牛肉等，大部份由附近農場供應，以圍爐燒方法處理食物，好有風味。於餐廳廂房內用餐，全部為獨立房間，不過因為我地得兩個人，所以房間與另外二人分享，中間以屏風隔開，問題不大。女侍應一人服務兩個單位，頗忙碌，幸好手藝純熟，燒得一枱好食物

晚餐處，全部廂房內用餐

旅館房間分佈在主樓以外的兩幢建築物，其中一幢在河邊，以天橋連接主樓，我入住的房間「せせらぎの間」就係喺呢幢。房間附私人風呂，打開露台門就係半露天風呂，雖然樹枝光禿禿的有點瀟剎，不過因為在河邊，又可以睇到小瀑布，晚上打燈更靚，整體感覺係唔錯。其實呢間房在最低一層，大浴場、露天温泉同貸切風呂都係呢層，全層只有我呢間房。房間旁邊就是露天風呂入口，房間附有的風呂，睇個setting都應該係其中一個貸切風呂，若無人book 房就release 番出來。

整間旅館的感覺就似坐左時光機進入古時，在古式環境內卻又享用現代設施，品味著在地食材的晚餐(另有文章介紹)，在山中享受寧靜時光，隔天早上更被我遇到飄雪，一個美好的旅程。

(旅館外貌)

温泉旅館在我的旅行名單中book mark 左好一段日子，難得今次去東京逛逛，就以此旅館作中途休息吧。旅館離東京好遠，在深山中，坐JR 由新宿站至中之条站已經要差不多三小時，再加上酒店專車接送約45分鐘車程，足足要四小時至到。

(奧涉街頭)

東京大商場臨立，來一百次都逛唔完。大型商場雖然貨品集中，卻千遍一律，我比較喜歡漫步小街，睇不同的個性小店，所以代官山，中目黑，南青山，吉祥寺及自由之丘都係我愛逛的地方。今次除左舊地重遊，仲加左去兩個新地方 : 二子玉川及奧涉。

因為新年關係，好多食店都仍未營業，呢間在酒店附近，似大牌檔，好多本地人光顧，連續兩晚經過都係高朋滿座，心諗應該有d料到，決定試下。餐牌全日文，但有略懂英文的侍應，加上漢字，點菜問題不太大。兩個人，點左小食、沙律、魚生同炸蠔，食物大大碟，價錢大眾化，食物加兩杯梅酒，前菜小食，連稅約七千多yen，若住附近又諗唔到食咩都可以一試。

近年去東京已經唔會去築地市場，因為人太多，食物又唔係特別，不過今次同行朋友未去過，又再重遊一遍。

先到鳥藤食親子丼，因為大部份人都係為海鮮而來，又可能時間尚早(9時左右)，到達時只需稍等五分鐘。我點左雞球飯，網上介紹係用雞尾(即係屁股肉)做，但我來到睇中文餐牌寫的係雞球，可能雞尾未必人人接受，所以改個叫發，其實根本就係雞尾。雞肉每件小小的連住雞皮，加上醬汁燒香後蓋在飯面上，再加上雞蛋，黃澄澄的蛋汁與雞飯混在一齊食，好香好好味。不過我個人口味偏淡，稍嫌醬汁太濃。朋友點的親子丼即點即製，雞嫩蛋香，雞有雞味，蛋有蛋味 ，唔錯。

若你的住宿預算有限，西新宿my stay 係一個不俗的選擇。位置距離繁忙的新宿站東口只需10分鐘左右的步程，酒店附近有便利店，餐廳齊備。當然無東口及南口附近的酒店咁方便，但卻有點靜中帶旺的休閒感。酒店大堂喺一樓，要行一條長長的樓梯，雖然停車場後有電梯直達，但晚上十時後電梯停止服務。當你一日走左好多路以後仲要行一條長樓梯，有點掃興。除此以外，用價錢來衡量，酒店各方面都好滿意。

房間係一般的小，不過衛浴相對其他同類型酒店大，標準浴缸，洗手盤與馬桶並列，算寬敞，房間已有點年紀，但乾淨整潔。我總共住左五晚，首三晚入住高級雙床間，另外兩晚入住豪華雙床間。

 餐廳位於澀谷區代代木公園附近，我地在平日上班時間來，人流較少，因為天氣好，選擇坐到店外梳化雅坐，邊食邊睇街上的人悠閒散步，好舒服，店員貼心的為我地開暖爐蓋毛氈，所以就算冬日都唔感到太冷。店子以澳洲滑浪為主題，可以帶竉物內進，氣氛悠閒。室內地方大，以木為主要材料，配上滑浪板等裝飾，有坐在Bondi海灘附近的感覺(我未去過，睇相後老作😆）。剛到達店面時見店內有好多吉枱，但居然都要等位，因為日本人服務習慣係要準備好才讓客人內進，但整間店只有兩位侍應，一位咖啡師及兩位廚師，所以速度好慢，趕時間的朋友就唔好來了。

地址 : 澀谷區富谷1-15-2