Foodie 生活雜誌

對大董的認知，係大董烤鴨，仲要同香港的大都烤鴨溝亂左，所以來到商場，朋友話要食，我無乜興趣，坐低見到餐牌上寫住「意境菜」，中西意法日菜都食過，意境菜真係未食過。睇本menu，印刷精美，成本書咁，連紙質都講究，菜式創意十足，味道亦配合，擺盤似藝術創作，真係估唔到喺國內會食到如此高水準菜色，當然價錢都有番咁上下。

近年身邊的朋友都喜歡北上消費，講得多我都好奇，決定去睇美術展時順道消費。深圳地方大，一個商場都可以行足一日，今次全日都無離開過商場，但係都無行得哂，真誇張。去到萬像城正值午餐時份，係時間醫肚，但間間食店都人山人海，只好求其揀間中菜小館，不過都等左成個鐘。好彩餐廳菜色品道不俗，地方雅緻，服務周到，感覺良好。

多年前已經好喜歡去深圳行書城，貪佢地方大，書多，最重要係價錢平，當年書店無乜設計都行得好開心。近年更加不得了，可能因為台灣的誠品書店及日本的蔦屋書店經營成功，如今國內好多同類型書店開業，設計時尚舒適，好似今次商場內的前檐書店，設計摩登簡潔，光線充足，大量座椅空間以供閱讀，書店附設商店及餐廳，風格一致，睇資料至知原來書店係由日本代官山蔦屋書店（TSUTAYA）總設計師設計，難怪感覺似曾相識 (我係蔦粉呀😁）。客人斯文守禮，行得好舒服。簡體字書本係香港繁體版一半價錢，但繁體字書本就貴過香港。可惜今次無時間，下次要再來慢慢行。

呢排頻頻北上，係我過去十年的總和。今次為左梵高展而去，雖然香港都有類似的展覽，但規模較小，始終唔能夠同內地比。展覽藝術館在深圳灣萬象城內，級數似香港的pacific place的高級商場。因為展覽剛開幕加上假期，好多人，排左成個鐘至入到塲，諗住入到去實好多人，只能睇人頭。點知出奇地ok，當然唔會無人，但都幾鬆動，人流管理不俗。展覽共展出11幅數碼名畫，每幅畫都有塲景配合，分11個部分，主辦單位有心思，仲設計埋打咭點，有埋聲音導航，只要download wechat apps，scan QR code就可以，對於無藝術細胞的我，係幾親民的，睇完後對梵高認識加深了，起碼知道佢唔係法國人(笑)。展覽大人細路都啱睇，少爺仔陪我地睇左兩個鐘都無叫悶，值得一看