2016東京遊漫步篇@奧澀、中目黑、自由之丘、二子玉川 @ Foodie 生活雜誌

(奧涉街頭)

東京大商場臨立，來一百次都逛唔完。大型商場雖然貨品集中，卻千遍一律，我比較喜歡漫步小街，睇不同的個性小店，所以代官山，中目黑，南青山，吉祥寺及自由之丘都係我愛逛的地方。今次除左舊地重遊，仲加左去兩個新地方 : 二子玉川及奧涉。

因為有triangle ticket 一日卷，所以我將奧涉，二子玉川、中目黑及自由之丘排在同一天(其實還想去代官山及三軒茶屋，可惜無時間)。Triangle ticket 係東鐵推出的一日卷，只需400yen就可以於涉谷，自由之丘以及二子玉川組成的三角區內的任何車站自由上落。在JR涉谷站轉東急東橫線，在購票機選英文，再選triangle ticket 就得。要知道坐火車平一程都要140yen，基本上坐三次已回本，又慳番買票時間，若去到不喜歡的地方可以立即離開，唔使心痛車費，非常抵用！

當日我先到奥涉食早餐，「奧涉」係涉谷購物區的伸廷，在神山町與富谷一帶的地區，距離涉谷JR站約10分鐘路程，但氣氛截然不同。我以早餐點Bondi Café Yoyogi Bach Park （地址：涉谷區富谷1-15-2 ）為地標，坐車至代代木公園站下車步行至餐廳，早餐後沿著商店街步行回涉谷JR站，沿路有好多個性小店與咖啡室，清靜悠閒，行下食下可以消磨半天。

北歐feel咖啡店

走回涉谷站買triangle ticket 繼續漫步小區之旅。先到中目黑，一出站過馬路便看到柚子鹽味拉麵店AFURI，曾經在惠比壽店食過，好對我胃口，打算逛一圈後來食，可惜被精緻麵包店吸引，配額用光。唯有下次再來，可恨日本美食太多，肚皮又唔爭氣。沿住目黑河邊兜一圈，兩邊樹的枯木結成網一樣，合上眼想像一下櫻花盛開的情景，自我陶醉一下。因為新年關係，好多店鋪仍未營業，草草行一圈就出發到自由之丘。

目黑河，閉上眼睛幻想櫻花滿開(相中係一月)

張開眼只見銀杏

街角遇見幸福麵包店

自由之丘係喜愛逛小店的人的天堂，好多不同種類的小店 : 家品、時裝、文具、生活概念店，應有盡有，我無地圖，在車站口走出來四處行，卻收穫甚豐！行到攰就坐下吃pancake，呢度真係一日都逛唔完。

自由之丘or-lan-芝 van

童話Peter rabbit coffee shop

車站旁的pancake 店

入黑了，日本的街燈不太亮，逛街就無興致了，轉去二子玉川。二子玉川係一幢幢的購物商場，賣的都係一般百貨的貨式，不過係新發展，現代化又整潔，畢竟新宿涉谷池袋等地某些商塲都好舊了。但我來此地目的唔係商場，係型到爆炸的蔦屋家電。呢間比代官山的蔦屋書店大好多，設計甚具型格，空間感大，售賣的電器與日常用品精緻有趣，書本種類繁多，唔識日文的我都逛得好開心，我在這裡逛一天也可以！雖然香港的誠品太古城店都唔錯，但同呢度就無得比了。