Foodie 生活雜誌

2016 瀨戶內海一圈遊行程 (包括: 廣島、愛媛、高松、直島及小豆島)

最後一日，食完早餐就出發去機場。剛到達廣島機場時，只覺得機場唔大，靜英英，商鋪食店都唔多，諗住離境大堂都無咩好行，點知大跌眼鏡，原來離境大堂有好大間免稅店，當然無北海道咁誇，但無論食的、用的、書店、電器一應俱全，臨上機前補貨或最後至來買手信都得。咪以為咁就買完，入閘後仲有「北海道三寶」： Royce 朱古力、三兄弟薯條同La Tao cheese cake。機場餐廳都唔錯，2/F咖啡店頗精緻，若果食蠔食到意猶未盡，3/F有間店，外面有枝旗寫住個蠔字，可以入去刷番餐，試哂不同煮法的蠔料理。若果回程日無咩做，不妨早點去機場check in 後行下仲好，唔使一路玩一路心掛掛怕miss 班機，最適合我呢類有旅行緊張症的人。

幾大的免稅店

今日係行程最後一天，hea 住遊。早上在旅館嘆到十點幾先離開，呢個時候開始落雨，對於呢塲雨我好感恩，感謝上天在我去完哂重點行程先落雨。回到高松行瀨户大橋去倉敷，之後發現其實可以坐船去岡山，慳番半小時車程，不過行埋呢條橋感覺會更圓滿，因為兩條大橋都係跨過瀨戶內海連接四國，在我心目中，行哂先至係一圈遊。

再見小豆島

(醬油之鄉，晚餐中，醬油當然係主角，味道由淡至濃)

島宿真里共有七間客房，每間佈置同設計都不同，可以在網上選擇。今次我分別訂左房間て及な。因為價錢較平的房な類型無房，唯有加少少錢住て，但見到實景後，我喜歡な多d，感謝團友肯同我換房。

入住島宿真里係我遊小豆島的其中一個目的，我對呢類精緻的小型温泉旅館情有獨鍾，所以跟住幾篇都會係酒店篇。島宿真里原址係一間醬油廠，後來改為旅館，已有八十幾年歴史，係國家文化遺產。全館只有七間客房，房裏基本上係無景可睇，温泉亦普通，喜歡的係館內一份沉厚內斂的氣氛及每一個細節，旅館四周有好多精緻擺設，古色古鄉之餘卻又設備現代化，兩者和諧並存，毫無衝突，店員細心體貼，輕聲細語，好舒服的一間旅館。

直接預訂

(天使之步道 潮退，神奇步道現身)

今日繼續check point 遊。重點係去中山千枚田區睇展品「橄欖之夢」, 一個竹棚靜靜的坐落於梯田中，外形獨特之餘又有實際用途，可以供農民休息或作為活動塲地，感謝上天賜我好天氣，風和日麗，攤在竹棚內吹住微風，懨懨欲睡，可惜團友在外面等，不能久留。之後再睇多幾個展品，不經不覺已到十二點幾，潮退時間，可以行戀人聖地天使之步道了。

(酒店外貌)

plan行程真係唔懶得，一直大安旨意諗住直島會有船去小豆島，後來至知只有快船，載車的渡輪就要由直島返回高松再轉船去小豆島。時間長左，唯有超早起床，將pension 早餐倒落肚就出發。回到高松見時間剛好接駁到小豆島的船，立即買票，點知都係趕唔到，好彩工作人員立即帶我到票務處換下一班船的票。小豆島有三個碼頭，由於我自駕，邊個碼頭都無所謂，所以半小時後就有船。船程一小時，到左小豆島就開始check point式揾藝術品。

(現代化的大屋)

早上於酒店內食完簡單但豐富的早餐，就往直島進發，正式進入藝術祭之旅。坐10點船，原本想昨晚買定船票，但職員話要即日買，所以早少少去排隊，停車後再買票，若連車上船，要注意車的長度，出發前查清楚，否則到時由職員目測亦可。上船後停好車就上船艙坐。日本的船真係好整潔，窗口一列大玻璃，睇景好清楚，連厠所都夠豪華，佩服！

排隊上車，注意 ：不同線去不同港口，請注意指示

即係super hotel 。Budget所限，7晚住宿裡有平有貴，平衡下荷包。今次的經濟住宿就選super hotel。全館禁煙又有温泉浸，係唔錯。打開房門一眼見哂，上下格床好有趣，下格床係雙人大床，幾舒服，可惜房間太細，放左個29吋行李打開後已無位行，最後唯有將張椅放左上上格床。浴室係standard setting。其實除左間房細d同温泉入浴時間有限制外(結果我都浸唔到)其他配套我都好滿意，以經濟住宿為標準，酒店骨子乾淨，早餐選擇多，工作人員友善，check-in 付款全部電子化，酒店後面就係瓦町車站，好方便。不過實在太細，未必會再列入考慮範圍。

高松的骨付鳥，即係燒雞脾，係當地名物，當然要去試下，不過就如名古屋的手羽先（雞翼），真係唔明點解咁特別。我跟當地旅遊書介紹而來，食店應該幾出名，差不多9點仍然要等位。店子樓底高，被安排坐閣樓，好嘈。日本好多店鋪室內可以食煙，呢間都係，不過抽風系統真係好好，就算隔離枱食煙都唔會被攻住，但真係好焗。點左兩款雞脾同小食，雞脾又油又咸，麻麻地，反而小食唔錯。

(屋子靜靜座落於荒地上，仲要被大堆草包圍，門面極低調)

(高松市景色)

大清早去道後温泉本館浸温泉。我係宮崎駿粉絲，因為動畫「千與千尋」至知道有道後温泉，當然要來一看。其實溫泉無特別，不過一想如此歷史悠久的建築物不只可以參觀，仲可以使用館內的温泉設施，又頗有意思。

酒店外貌 (照片摘自網上)

道後温泉站有好多温泉酒店選擇，但我預算有限，又要選擇接近道後温泉本館的酒店，選擇有限，結果放棄早晚餐。酒店屬傳統中型日式酒店，設施齊備，温泉、餐廳、購物小店一應俱全，設施有點舊，房間係一般傳統的日式房間，無特別，温泉亦唔靚，原本打算會去道後温泉館泡温泉，想選擇普通小酒店，不過想到房間細少，而此旅館不包餐只需12180，價錢分別不太多，而且步行到離購物街只需五分鐘步程，一轉彎便到，好方便，若預算不高又想住温泉酒店，都係一個選擇。

早上先往平和公園睇原爆遺址，一個悲傷的過去，其實我唔太想睇，等團友影完幾張相就離開了。早餐在Anderson買麵包，原本想在二樓堂食，可惜睇完遺址後已無時間，唯有買走在車食，買左好多款，款款美味。之後就開始瀨戶大橋之行。七條不同設計的橋連貫住數個島嶼，中間可以在休息站展望台睇景色，不過天陰，能見度稍遜。途經每個島都有景點，我選擇左到大三島睇紫藤，可惜時間不合，花仍未開，但可以睇到季尾的櫻花，日本四季分明，花期有序，櫻花紫藤兩難存。在櫻花樹下影下相，最後在道之駅食燒海鮮，就完結此大橋之旅，呢個時候開始落雨了，開車到道後温泉時雨落得更兇。今晚雖然住温泉酒店，但唔包餐。在酒店職員介紹下食左餐質素普通的壽司後，逛逛温泉商店街就回酒店休息。

 平和公園景點 ： 原爆遺址

(酒店外貌)

經樂天訂，呢間酒店絕對物超所值！話就話係酒店，似乎似apartment多d。以每晚6800的房價計算(兌7，折合港幣唔使五百），房間面積頗大，有小型廚房，放左基本的床，梳妝枱同椅子之外，仲有空間放一張單坐手柄椅及茶几，仲有露台。不過地點稍遜，離市中心步行約二十分鐘，車程約七分鐘，但行一分鐘出大街就可以坐電車。此酒店係目前為止唯一一間現實比網站睇到更好的酒店。