Foodie 生活雜誌

plan行程真係唔懶得，一直大安旨意諗住直島會有船去小豆島，後來至知只有快船，載車的渡輪就要由直島返回高松再轉船去小豆島。時間長左，唯有超早起床，將pension 早餐倒落肚就出發。回到高松見時間剛好接駁到小豆島的船，立即買票，點知都係趕唔到，好彩工作人員立即帶我到票務處換下一班船的票。小豆島有三個碼頭，由於我自駕，邊個碼頭都無所謂，所以半小時後就有船。船程一小時，到左小豆島就開始check point式揾藝術品。

到達池田港，好可愛的渡輪，去程係熊貓船，回程係長頸鹿船。

 為左顧及團友感受，先參觀熱門景點小豆島オリーブ公園（橄欖園）同寒霞溪。橄欖園其實 係一般道之駅公園，佔據一個小小山頭，有橄欖園，香草室，亮點係彷希臘小島大風車，雖然聲稱同希臘係姊妹島，但個風車都有A貨的感覺。不過配合藍天白雲好 天氣，簡單公園都令我感到心曠神怡。

似A貨風車

橄欖園

小豆島餐廳唔多又早關門，求其食個午餐就繼續行程。

望海的午餐

橄欖之島，食物梗係要配橄欖油

和式意粉，侍應介紹照淋橄欖油，又幾香

開始搵展品，展品散落於島上的不同地方 : 沙灘上、碼頭邊、民居、學校內，依住簡單地圖加上沿途的指示牌，遂個揾，慢慢睇，好好玩。揾資料時我完全唔知小豆島上有個有三刀半島，當我睇完展品時，我亦遊覽完整個三刀半島。講真，若唔係因為呢個藝術祭，我真係未必會來小豆島，更加唔會去三刀半島。所以呢個藝術節真係達到目標，起碼最少多左四個人來。

玩check point要有提示，見到藍旗即係有展品

展品在藝術館

展品在山邊

展品在學校

展品在崖邊

展品在沙灘

展品在海邊

睇完哂三刀半島的作品已經差不多5點，見天仍亮，趕去寒霞溪。寒霞溪係賞楓名所，坐住纜車在峽谷內賞楓，一定好靚。可是我來得不合時，加上天色已晚，心急地買票後，入閘時票務員善意提醒我最後一班纜車將會開出，唔夠時間參觀，主動退票比我，真窩心。一場來到，點都揸車上山頂睇行一轉，山頂好大風又有煙霞，睇下個景就落山。

在寒霞溪頂看海景，面對的係瀨戶內海，相中右面角落的就係三刀半島

今晚住温泉酒店，終於可以食餐好。