Foodie 生活雜誌

在酒店check out 寄存行李後，去AEON mall作最後衝刺，我的衝刺係去書店睇雜誌，太后就在商場閒晃。睇到差不多時間就去樓上食lunch，餐廳昨晚已揀好，同太后再食鰻魚飯，飯後出發去機場，完成今次旅程。

太后愛花，所以排行程的時候點都要有賞花的環節。因為太后要求高，所以我選擇離岡山站老遠，位於米子，有「西日本最大花園」之稱的鳥取県立とっとり花迴廊，仲要即日來回，交通時間已花去半天，一般人應該唔會咁排。雖然已踏入春天，但花園唔見得花團錦簇，可能地方太大，花圃分散，部分花圃更加未有花，太后唔多滿意，不過有臣兒全程推住輪椅相伴，總算搏得太后一笑。晚上喺AEON mall內的牛舌專門店食烤牛舌，今次終於對口味，大后舉起大姆指，我安樂了。

太后最愛鰻魚飯，所以食鰻魚飯係去日本不可缺少的環節，千揀萬揀(其實係無乜得揀）揀左呢間在tabelog算係高分的一間，叫識日文的朋友打去訂位，仲要訂埋鰻魚飯，以確保萬無一失。餐廳其實係做割烹小料理，不過睇介紹，鰻魚飯幾出色。現場即燒，雖然唔係炭燒，都好香好肥美，鰻魚汁味道剛好，刺身新鮮，太后好滿意，臣兒幸不辱命。

第四次來倉敷美觀地區，以為要行的都應該行過，點知仍有漏網之魚，今次行埋林源十郎商店、倉敷商店街，去有鄰庵食蛋飯。由於太后對倉敷興趣不大，結果我行完自己想行的地方就離開，去太后全程最渴望去的outlet。一向怕行路的太后去到outlet居然龍精虎猛，成隻電兔咁四圍行，最後重有戰利品，行到天黑去食太后最期待的鰻魚飯，太后渡過滿足的一天，我深感安慰。

離開琴平，返回岡山，先喺酒店酒店寄存行李後再往兒島。兒島以出產牛仔布著名，出站後步行約二十分鐘往牛仔褲街，整條街都有牛仔褲裝飾，多間售賣牛仔服飾的店鋪，不過一般貨品都能在倉敷美觀地區買到，可能我在平日來，好多店鋪都關門，四周靜悄悄，無乜氣氛，若週末來會較熱鬧吧，兒島對於我吸引力唔大，逛兩逛就走，叫做到此一遊。晚餐於倉敷食西餐，質素一般，頗失望，但不得不讚賞信用卡白金秘書的服務，以前互聯網未有咁方便時，去日本好多時都請白金秘書幫忙訂民宿或餐廳，後來互聯網普及，好少再用此服務。由於今次想預約的餐廳因爲我唔識講日文而拒絕招待，自己又無心水，想起白金秘書，結果秘書為我提供多間餐廳選擇，email內更附上餐廳資料，非常貼心，讚👍🏻

旅館有三款房間 :  包括主樓內的標準客房及附露天風呂客房，另有獨幢木屋區。主樓只有二十幾個房間，附露天風呂客房的type A 至Type D都好受歡迎，建議預早訂房。由於附露天風呂的心水房間已無房，今次只能入住標準客房，房間舒適，對住綠油油的山嶺，心曠神怡。二食的早晚餐質素一般，早餐比晚餐好。

Wish list 上的旅館。瀏覽網頁時見到呢間被群山環抱的旅館，感覺不俗，來到至知原來旅館在馬路旁，不過在鄉下地方仍然寧靜。原來之前曾入住同一集團旗下在淡路島的淡路 渚之莊 花季，証明自己的喜好幾一致。旅館走低調豪華舒適路線，帶點禪意的氣氛，營造出寧靜寫意的渡假感。房間舒適，二食質素一般，我入住最平價的房型，二人價一泊二食只需二千幾，我覺得算抵住。

資訊 ：

金刀比羅宮係琴平必遊景點，但我之前來過兩次都居然無上去，第三次來到琴平，正所謂事不過三，相信我未必會再來，今次決定點都要上去參觀。將太后安頓好，比自己一個小時來回，免得太后等得太久。全程785級樓梯，來回千幾級，簡直要左我條老命，由於之前無睇過資料，行到中間至知有間靚靚cafe，梗係唔可以錯過，點都要嘆杯雪糕，最後要個半鐘至完成，總算達成目標，感謝太后又讓我任性一次。

今晚會入住位於琴平的温泉旅館，所以安排遊琴平，一早在高松酒店check out後坐電車往琴平，今次已經係我第三次來琴平，所以烏冬學校學整烏冬、行金刀比羅宮參道同食烏冬等節目已做過，太后亦無興趣，所以最後太后只行左參道同食烏冬，至於我，當然另有打算，下回分解。

每個城市總有至少一個文青點，今次去高松就選左北浜Alley。一個離碼頭十幾分鐘步程，在海邊一隅，由幾個舊貨倉改建而成的覆合式小店區，內裡有售賣精品的小店，時裝店及餐廳。我當日去到已經下午四點幾，好多店鋪一係已關門，一係就公休，無乜睇頭，好彩最具人氣的Unie咖啡店有開。

遊完女木島，再往男木島遊覽，兩島相隔不遠，約廿分鐘船程。男木島面積較細，房屋依山而建，即係要行大斜路，太后無可能行，只能在碼頭等，我教左佢去食店坐低等，之後就出發。由於唔可以讓太后等太耐，我決定兩小時內要行完。好在男木島大部份展品在室內，要收錢，我無買pass，遂個比有點肉赤，所以只行幾個，夠時間 (😅)。 之後再睇埋海邊的男木島簽名展品walking ark，勉強叫夠時間。其實島上仲有cafe，小小圖書館，可以慢慢行，島上多斜坡，只能用腳行，若係好天氣，記得做足防曬，否則會好似我咁，曬傷後頸。

瀨戶內海上散佈住好多個小島，因為人口老化及島民遷離，島嶼變得日益荒涼，但自從二十多年前直島被財團收購土地興建美術館及酒店開始，小島開始活化，自2010年起更開始舉辦三年一度的瀨戶內海藝術祭，此計劃更加為週邊的島嶼 : 豐島、女木島、男木島、小豆島、大島、犬島注入新生命，年輕人都回到島上生活，在島上的年老居民亦因為此計劃而可以做義工等工作，充實生活，係一個好成功及有意義的活動。

酒店在車道旁，感覺幾偏僻。實惠小酒店，距離高松車站約十分鐘步程，行去兵庫町商店街都係十分鐘。酒店坐落在住宅區，連便利店都無，非常清靜。內裡設施齊備，機能性高，附設大浴場，房間整潔，一晚雙床房只需六百幾蚊，平價之選。

去高松之前曾經不斷在網上揾餐廳，可惜無心水，上次食過骨付鳥，差d咬唔開，無乜興趣，決定去到瓦町再諗。去到打開tabelog，原本揾到間心水店，點知去到門口至知無開，問對面雪糕店的職員，其中一人的英文好好，我乘機問佢附近有無好餐廳介紹，佢諗左一陣就比左呢間餐廳我，仲幫我訂埋位，揾埋地圖教我去，超好人。我唔餐廳知食乜，只知道係廚師發板全魚晚餐，3500yen左右一位，以食魚為主，問左太后無問題，心口掛個勇字就去。食物一般，唔係特別好食，不過若唔係有人介紹，我絕對唔會去呢類地道小館，係一個有趣的經驗，旅行就係咁，一點點小經歷，加起來就係一個美麗的旅程。

作為一個温泉控，總喜歡嘗試不同的温泉及澡堂，今次去的仏生山温泉在市郊的住宅區內，午餐後坐電車至仏生山站再步行約十分鐘就到。澡堂現代化及簡約的外型，在樸實的環境裡非常突出。温泉係澡堂形式，要購買入浴券，由於在買車票時已包埋，入場時只需出示扇形車票予職員蓋印就可以，仲附送小毛巾。温泉內裡設計清簡，有小物售賣，又有小型書店，滿滿的文青風乙温泉水滑，浸完温泉後，在休息間午睡或嘆咖啡，對住以一排竹籬笆作裝飾的庭園，享受寧靜的午後，一派悠然。

離開栗林公園已經過左午餐時間，之前求其在車站攞左張單張，介紹車站職員會去的烏冬店，咁啱呢間上原屋本店喺栗林公園對面，仲要收4點，趕得切（好多烏冬店收3點）。烏冬非常彈牙煙靱，好好味，湯頭清甜唔口渇，天婦羅香口，太后讚不絕口，沿路不斷提住。

一早出發，酒店check out後從高松坐火車往岡山，到步後去酒店放低行李就開始一日行程，今日只有兩個景點 : 栗林公園及仏生山温泉。從高松築港站出發，先去栗林公園，原本天氣報告話今日落雨，雖然天陰陰，但好彩最後只灑左一陣雨，後來仲放晴。公園又大又靚，係一個放大左的日本庭園，好有意境，我地只行南邊都行左兩個鐘，北邊要等下次再會了。 喺公園入面飲茶期間遇到一位從德國來，已退休的獨行旅遊人，一位女士，可能佢見我同太后同行，有點好奇，同我傾偈，傾偈唔出奇，最奇係太后居然大約知我地講乜，之後喺我行開影相時居然自己同人傾偈，而德國人又聽得明😱我check 過，無用紙筆無用google，雖然最後要我翻譯，但都覺得佢勇氣可嘉👍🏻

去日本，若住在市區，心水酒店集團係Richmond, JR Blossom 及三井 。今次選擇入住岡山車站旁的就係三井集團𣄃下的三井岡山，由車站步行五分鐘就到，酒店對面係AEON MALL，驚安之殿堂，再行多兩條街係商店街，位置勁方便。標準商務酒店房間，清潔程度一般，頂樓附設温泉，酒店提供寄存行李服務，我離開酒店3晚後再check in 都無問題，價錢合理，值得入住。

資訊 :