Foodie 生活雜誌

今日終於離開江西去廣州，原來龍南市係無高鐵直達廣州，要於深圳北站轉車。去到廣州都係行下食下，無乜特別，餐廳會另出post分享。不過喺廣州去左廣東省博物館，好值得一遊，有興趣行博物館的朋友可以去下。

昨日幫襯過滴滴的司機唔錯，今日揾佢包車一日遊，$300包足一日，算係咁。今日去另一個AAAA級旅遊點 : 關西圍。江西好多客家人聚居，所以有好多圍村，呢個圍村好大型，入面有好多展覽，係一個介紹客家傳統的博物館，內裡有埋餐廳，我地慢慢行都參觀左成個下午。回程時經過橙田，司機帶我地玩摘橙，晚餐食牛肉火鍋，之後去左兩個司機介紹，但我連舉(相)機意欲都無的景點就回酒店休息。

AAAA景區關西圍

一切由樸宿開始………上網見到呢間旅館，一見鍾情，以為喺廣西，咁啱朋友話想出行，就去住下，點知原來喺江西，中國地大，差一個字可以差好遠，我儍儍的臨出發至知原來地方偏遠，氣溫仲會降至零度。

一早喺酒店食完早餐就去深圳北站搭高鐵去一個我聽都未聽過的地方：江西龍南県。酒店pullman有通道直去深圳北站，唔使過馬路，攞住行李都唔怕雞手鴨腳。今次搭高鐵仍然感覺良好，就算住得近都早45分鐘前到站，因為要檢查行李及驗票，通常開車前五分鐘停止驗票，建議早點排隊，因為若前面的人証件有問題，阻住條龍，你可能會眼巴巴睇住架車走。兩小時車程舒舒服服好快就到龍南東站。當地唔係旅遊熱點，火車班次少，我地出站後職員隨即關上出口門等收工咁款。出閘後隨左的士司機，四野無人。我地打迪迪去酒店，安頓好後出省食晚飯行夜市，之後就回酒店休息了。

今次旅行緣起係團長話聖誕節假期一定要離開香港，作為CEO(chief entertainment officer) 的我，當然要出主意。睇到間幾合心水的酒店，比左團長，佢就搞左個七日六夜深圳江西廣州遊出來，我呢隻鴨仔就跟住行了。我對中國地理知識近乎零，話說我一路以為酒店喺廣西，訂好哂之後至知原來喺江西贛州(咪話我睇小你，估你讀都唔識讀😜），氣溫得零度，於是大家就似賣豬仔地出發了。