Foodie 生活雜誌

早晚餐都在石藏地下的「食菜石藏」內用餐，晚餐精緻美味，日式加西式的菜色設計，擺碟食器高雅，色香味俱全，好滿意。餐廳設計有特色，每張餐枱都由以舊物裝飾的屏風格開，變成半開放房間，食客各有天地又唔侷促，整間餐廳有如玩具博物館，風格獨特。早餐豐富，貼心的服務員更為我地安排check out後的行程及安排交通往機場，由入住至離開都享受住高質的服務，加上舒適的環境與可口的餐點，整間旅館就係如此貼心，帶住滿滿受寵的感覺離開旅館，重返人間。

入住好的旅館從來係逃避現實的時光，雖然明知內裡一事一物都係營造出來，而且代價較高，但我仍然甘之如飴。旅館佔地廣，一共有三個露天温泉，一個足湯及一個大浴場，作為一間只有19個房間的旅館，實在非常足夠。旅館環境寧靜安逸，充滿禪意，處身其中，真正明白何謂洗滌身心。最令我欣賞的係野溪温泉，浴池就在溪床上挖出來，非常天然，在溪旁一邊浸一邊聲住潺潺流水，完全沉醉在大自然中，想起都陶醉。

2018鹿兒島遊 酒店篇 妙見石原莊@霧島 (房間篇)

旅館最吸引我的係温泉設施，因為內設砂浴，原來温泉浴場都好華麗。晚餐懷石料理一般，服務亦一般，可能實在太多人。反而自助早餐幾好，選擇多，味道唔錯。最最令我欣喜的係温泉外面的燒酌酒塲，免費任飲任試，我當然唔蝕底，試左好幾杯，覺得抵哂😁

好少會入住大型温泉旅館，今次為左個旅館附設的熱砂浴至選擇入住。旅館勁大，根本就係一個渡假村！行到腳軟，房間新淨舒適，望住海景好舒服。入住呢類大型旅館好忙，因為我係旅館迷，要全個旅館𥚃𥚃外外行一圈至滿足，館內有商店、餐廳、温泉，仲有個海邊大庭園，美術館，結果第二日行到11點至離開。總括來講，除左晚餐欠佳以外，整體都幾滿意，温泉華麗，又有免費清酒試飲 （下篇分享），而且價錢合理，難怪旅館咁受歡迎。

離開鹿兒島，坐特色火車「指宿のたまて箱」往指宿。車票之前已於網上購買及選好位置，到達鹿兒島後於新幹線站綠色窗口取票就得。去日本，坐特色火車都係一個節目，行來行去參觀有趣的車廂，到時到候又攞個牌影下相，東搞搞西摸摸，好快就到達目的地。來指宿主要係體驗下砂浴温泉的樂趣，今晚入住的温泉酒店備有砂浴塲設施，所以我地喺指宿温泉街行個圈就去酒店check in 了。

喺鹿兒島只係留左兩晚，無乜時間揾食，特色的白熊冰同熊襲鍋之前又試過，結果無乜心機揾食之下，當然亦無好下塲。去日本少不免要食餐燒牛肉，要食又當然要食日本牛，又想去間地道少少，千揀萬揀，揀左味來屋，結果係麻麻。地方係好地道，喺tabelog分數亦算高，可惜質素一般，有點失望，枉我仲專登拜託朋友為我越洋致電訂位（但唔訂又真係無位喎）。至於早餐，我好少喺酒店食，有時間都想試下不同的cafe，行過見到danken的toast 幾靚仔，又試下。芝士加toast無可能唔好食，麵包係日本一貫鬆軟的厚多士，加上不同的topping，好好味。

最後於中央站轉車時喺站內的food street食左個親子丼，水汪汪，不提也罷

再次來到鹿兒島魚類市場，可惜到達時又係店鋪已關，莫非真係要晨早8點前到訪？無得行市場，唯有直接去食早餐。我2016年曾經來過，市場外圍同食店一幢似乎翻新過。食堂提供的刺身好新鮮，食得出魚的鮮甜，讚。之後去JR中央站shopping，初初plan 行程時仲怕無嘢做，點知一個車站商場就KO左一個下午，最後連商店街都無時間行，女人的shopping 能力實在太可怕。午餐原本團友想食gram pancake，奈何要行去天文館至有，最後試左星乃咖啡館，出品不俗。全日本好多分店，叫做去左日本幾十次，但我居然係第一次食，以後去日本諗唔到食乜，一於走入靚靚商場的餐廳層，揾間出名的，一定無甩拖，因為佢地品質控制得好，出品間間一樣，唔會差太遠。

去日本必食鰻魚飯，原本想食的店(うなぎの美鶴  ) 離住宿地點一個鐘車程，來回計埋食飯時間就無左一晚，雖然團友們肯陪我，但理智話我知唔可以咁任性，於是去左商店街內的鰻魚飯專門店就算。其實呢間都係老店，鰻魚飯的質素都幾好，不過若果鰻魚可以肥美點，炭燒味香點就好。飯後意猶未盡，朋友想食串燒，去到JR總站附近的屋台揾食，但無間吸引，最後在酒店附近求其食兩串就番歸。

2018鹿兒島遊 酒店篇 Richmond@鹿兒島天文館