Foodie 生活雜誌

一向對甜品興趣不大，但好奇心總是有的，見到合心意的介紹都會幫襯。首次認識PIERRE HERME係佢個macaron ，曾試過著名的Laudree，但太甜，不對口味。食過朋友介紹的PIERRE HERME，唔太甜，多種味道都好香，好好味，印象深刻，所以估計甜品都必定出色，決定朝聖。

店子在大街上，分兩層，地下為零售，餐廳在樓上。餐廳座位唔多，當日唔使等位。店員細心地為我地掛起外套，之後就介紹餐牌，因為朱古力系列有數款由不同濃度朱古力製成的甜品，所以侍應先比原片朱古力我地試味，好認真。朋友試後點左dark chocolate 朱古力球，我點左簽名甜品Ispasan。

朱古力球真係好大驚喜 ，送來時係一個普通朱古力圓球，侍應將熱朱古力漿倒在球上，睇住朱古力球慢慢溶化，好開心。朱古力球內係焦糖雲呢嗱與香濃朱古力雪糕，加上脆脆，堪稱色香味俱全，滿分！

Ispasan ，玫瑰味的macaron 夾著cream 及荔枝肉，玫瑰花味自然(有d店的製成品似食香水)，與香甜的荔枝兩者味道非常匹配，外面圍上原粒raspberry ，帶點酸，平衡左甜味，好滿意的甜品。

意猶未盡，再點一個開心果千層酥，對於唔係甜姐兒的我(無論樣貌及口味)實屬少見。開心果cream 與raspberry jam加玫瑰cream，有點raspberry 菓肉，紅紅綠綠的襯得好靚，cream 幼滑得來不太甜，酥皮鬆脆但唔會一咬四散，邊食邊有滿滿的幸福感。

咖啡係全餐的反高潮，淡而無味，但已不重要。下次有機會來東京一定再幫襯！