Foodie 生活雜誌

9/2021光顧

經過買杯咖啡飲，見到menu 有款Blackcinno，未見過，多口請教下店員，但店員冷冰冰冰的答左句唔知乜，我見佢咁cool都唔敢再問。點知轉頭佢見到熟客就笑口噬噬，明白原來店員唔係生出來玄壇咁面，係要對熟客至笑。可能我額頭鑿住唔會再幫襯，亦因為咁，我都唔會再幫襯。

9/2021 光顧

9/2021 光顧

行過見到細細間，用牛肉麵做排頭，講到明係港式口味，感覺好有態度，擇日來試。我當然點牛肉麵，朋友唔食牛，點左蜆湯雞脾麵，試過之後，決定若再來都係獨注牛肉麵好了。

Massage，係每次去泰國必定做的事，行過九龍城見到間店幾合心水，不過我唔係好大癮，睇完又無左件事，好在貼心的駕駛員安排左一齊試下，結果一試愛上。店內環境舒適乾淨，所有按摩員都係泰國人，我試左幾個，雖然手勢各有不同，但都唔錯，按摩完有糖水飲品，享受同泰國小型按摩店一樣，價錢一定比泰國貴，但唔使坐飛機，隨時可以按，加上而家港鐵直達九龍城，按摩店就喺地鐵站出口的同一條街，非常方便，間中按下真係可以洗滌疲累。按完食番餐泰菜，催眠自己當去左泰國。

9/2021光顧

而家喺香港食飯好恐怖，名店full到滿瀉，呢餐都係臨時攝位，餐廳搬左，師傅都轉埋，原本的chef mori 走左， mori 走左，餐廳改名雲隱，由健師傅主理。健師傅喺mori 北角店已幫手，如今升格為師傅，戥佢開心。食材仍然優質，但口味偏重，今餐的亮點係大蜆，唔係成日遇得到。自10月起開番午市，師傅話午市會做番多點傳統江户口味的壽司，就等健師傅慢慢建立自己的風格吧。

9/2021光顧

餐廳提供串揚及一品料理，以小食為主，多款清酒及cocktail供應，全店只得十四個坐位，係乾淨版居酒屋，以前開通宵，好多壽司店的師傅放工後來食宵夜，我都係喺佢地口中得知有呢間店。串揚薄薄的金黃色炸漿包住食材新鮮，炸得乾身香口，款色多，又有時令食物，間唔中食下都幾有趣。餐廳好受歡迎，因為疫情關係，只營業到晚上十點，但加開午餐時段，分12點及3點兩個時段，不過今年的晚餐及星期六的booking已滿，下年的booking 喺12月1日早上接受預訂。(而家喺香港食飯好似精神病咁😭）

8/2021 光顧

開左好幾年的西班牙餐廳，菜式選擇多，當日晚餐想食輕巧點，食細細碟的Tapas就最啱。不過呢度的Tapas 比一般餐廳份量大少少，當日我地食量唔大，點左幾款食物，加一jar Sangria，幾個朋友傾下講下好輕鬆。

8/2021光顧

之前經過覺得小店幾有日本下町cafe feel，後來知道店家喺九龍城有分店，先幫襯九龍城店，試過之後覺得出品唔錯，今次試埋西環店。兩店風格好唔同，九龍城店係酒吧cafe加餐廳混合體，西環店係文青feel，襯番學校區。當日的食物及飲品都唔錯，環境舒適，就算坐滿人都唔覺得有壓迫感，不俗的cafe。

8/2021光顧

意大利餐廳加酒吧，環境幾舒服，有露台位，唔食飯都可以飲杯嘢chill 下。食物味道不俗，午餐幾抵食。若以食物計，未必吸引到我再來。但餐廳的服務卻令我窩心。話說幫襯當日落好大雨，我無帶傘，淋到濕晒，上到去餐廳侍應立即接左我滴水的風褸幫我放後欄掛起晾乾，再比暖水及紙巾，好細心。為咗呢個優質服務，我唔介意再來。

8/2021光顧

從「不能說的秘密」到「可以講d唔講d的秘密」。朋友帶我去食私房菜，每晚只招待一枱客，夠哂私隱。菜式由一人主理，心機小菜，菜單由食客同店主商議，價錢每位計，價錢愈高菜式愈多，初初食可能會覺得菜式少價錢貴，但其實食物份量足，而且考慮到包塲的費用，其實差不多。