Foodie 生活雜誌

9/2021光顧

置地文華內的MO BAR以前係好多名人的聚腳點，時移世易，而家我等平民都坐低食飯了。聽講MO Bar 的海南雞飯幾出名，見餐廳做晚餐promotion，套餐三百幾蚊有3個course (promo已完)，平時單點雞飯都要二百幾，而家多一舊水有埋頭盤甜品，幾抵食。無論環境、服務、大部份食物都唔錯，反高潮係碟雞，居然幾鞋口，若打算專登來食海南雞就要諗諗。不過我幾鍾意餐廳環境，熱鬧得來唔嘈吵，坐得舒服自在，不俗的聚腳點。

9/2021光顧

餐廳有幾間分店，幾次經過荃灣店都想食，但又無乜信心，原來葵芳都開左，反正諗唔到食乜，又試下。又再確認我的感覺係正確的，雖然小店幾受街坊歡迎，遲下仲會細店搬大店，但食物出品實在麻麻，試過就算。

9/2021 光顧

喜歡的中菜廳，食物精緻美味，裝修高雅舒服，係背景音樂大聲左d，侍應親切服務好，雖然價錢唔平，份量又少，但大廚成日有新菜式，隔一排會食下，就當食西菜fine dining 好了，二人食剛剛好。

9/2021 光顧

介紹讚到飛起，話菜式色香味俱全，仲有日落靚景陪食，加上打去訂位時做緊奄仔蟹套餐，太后愛食蟹，當然立即預訂，好彩趕得及套餐最後一日供應期。餐廳環境開揚舒適，食物味道不俗但一定唔算好味到識飛，餐廳走中菜fine dinning 路線，擺盤靚。除左餐牌上的菜式以外，餐廳定期推出不同套餐，啱晒唔想諗的食客。侍應殷勤有禮，要垢病的應該係交通，實在太遠。

9/2021光顧

飲手沖咖啡，我徧好坐吧枱，可以同咖啡師學下嘢。深水埗cafe開到成行成市，無可能間間試，只靠感覺選店好了。呢間喺我去開的店隔離，睇住佢開張，感覺對咖啡較認真的cafe。當日都係坐吧枱，同咖啡師傾開，話佢沖左10年咖啡，問佢悶唔悶，佢話有時都會悶，所以會沖不同的咖啡豆。咖啡世界好大，不同豆有不同處理方法，每次同咖啡師傾偈都似上堂，雖然次次聽完都唔記得，但過程係有趣味的。

9/2021光顧

經過買杯咖啡飲，見到menu 有款Blackcinno，未見過，多口請教下店員，但店員冷冰冰冰的答左句唔知乜，我見佢咁cool都唔敢再問。點知轉頭佢見到熟客就笑口噬噬，明白原來店員唔係生出來玄壇咁面，係要對熟客至笑。可能我額頭鑿住唔會再幫襯，亦因為咁，我都唔會再幫襯。

9/2021 光顧

9/2021 光顧

行過見到細細間，用牛肉麵做排頭，講到明係港式口味，感覺好有態度，擇日來試。我當然點牛肉麵，朋友唔食牛，點左蜆湯雞脾麵，試過之後，決定若再來都係獨注牛肉麵好了。

Massage，係每次去泰國必定做的事，行過九龍城見到間店幾合心水，不過我唔係好大癮，睇完又無左件事，好在貼心的駕駛員安排左一齊試下，結果一試愛上。店內環境舒適乾淨，所有按摩員都係泰國人，我試左幾個，雖然手勢各有不同，但都唔錯，按摩完有糖水飲品，享受同泰國小型按摩店一樣，價錢一定比泰國貴，但唔使坐飛機，隨時可以按，加上而家港鐵直達九龍城，按摩店就喺地鐵站出口的同一條街，非常方便，間中按下真係可以洗滌疲累。按完食番餐泰菜，催眠自己當去左泰國。

9/2021光顧

而家喺香港食飯好恐怖，名店full到滿瀉，呢餐都係臨時攝位，餐廳搬左，師傅都轉埋，原本的chef mori 走左， mori 走左，餐廳改名雲隱，由健師傅主理。健師傅喺mori 北角店已幫手，如今升格為師傅，戥佢開心。食材仍然優質，但口味偏重，今餐的亮點係大蜆，唔係成日遇得到。自10月起開番午市，師傅話午市會做番多點傳統江户口味的壽司，就等健師傅慢慢建立自己的風格吧。