Foodie 生活雜誌

8/2021 光顧

Cafe 裝修充滿日本襌意，有埋幅枯山水，好有意境，似茶室多過似飲咖啡。但我第一個感覺係 ：唔好坐。坐位全部靠牆單邊位，似茶室的setting，但好睇唔好使，枱仔細細，飲杯嘢就無問題，若食埋嘢就唔夠擺，要加張櫈，無哂feel。我都係慕名而去食tiramisu，蛋糕係合格的，但唔使特登去食囉。

8/2021 光顧

餐廳做割烹套餐，午餐同晚餐menu一樣，分兩款餐，tasting menu 及Omakase Menu，今次我試午餐Tasting menu。食材高質烹調用心，雖然未至於驚艷，但感到滿意，價錢唔平仍物有所值，有機會再來試另一個餐。師傅會喺食客面前烹調食物，一路睇住都幾有趣，日本師傅同兩個助手都幾靚仔😁，侍應詳細講解食物及餐具的資料，令我長知識，態度友善又唔覺煩，一個好侍應對一間餐廳真係好有影響。

8/2021光顧

網上評價不俗，餐廳喺尖東的商場內，由韓國人經營，店內播放住韓劇的OST，電視又播韓國的綜藝節目，好有韓國feel，餐廳感覺幾地道，食物都唔錯，價錢合理，不過限時個半鐘，食得好趕，無時間細心品嘗味道，唔記得咩味了，不過肯定唔係差。

8/2021光顧

8/2021光顧

好多cafe都開11點，對於晨型人的我唔多啱，呢間開8點就合心水了。食物及飲品選擇多，手沖咖啡都有8款揀，餐點大大份，味道不俗。落單全部電腦化，好方便。不過餐廳又係限時個半鐘，因為我10點就坐低，坐到12點都未叫我走，不過我見客人漸多，都醒水打算走人，點知侍應行過木口木面地放低張單叫我埋單，呢下我有點反感，不過香港就係咁，唔鍾意唔好幫襯吖笨😜

8/2021 光顧

餐廳喺K11 Musea 內，最吸引我的唔係間餐廳，係任何電子消費可享5小時免費泊車。餐廳定位幾特別，分別喺尖沙咀同荃灣都有分店，目標客群都幾廣泛，又可能係城市一體化，每區客路都一樣？餐廳水準非常一般，食物温吞吞的，味道半淡不濃，唔知想點，咖啡蛋糕都麻麻，咁樣食左幾舊水，去food court 食個包好過。唯一值得一提的係坐喺露天座位的感覺不錯。

7/2021 光顧

7/2021 光顧

唔知係咪我黑仔，去親大商場內試新嘢通常無好結果。話說去開太古城，見到呢間新派韓食評價不俗，鎖定目標幫襯。不過無想過餐廳係半自助形式，行來行去點餐攞餐具有點煩。食物味道一般，我試左兩款食物，一ok一唔得。不過餐廳裝修精緻，好有少女feel，食物present好靚，餐牌都影得好靚，啱晒打咭。高級快餐，試過就算。

7/2021光顧

7/2021光顧

去大圍揾食，見到呢間cafe幾骨子，加上以蛋做主題，啱哂愛食蛋料理的我。定食味道普通，同food court 出品差不多，反而吐司同甜品賣相靚，啱晒打咭。餐廳好㕵場，平日下午都坐滿，客人輪流轉，假日應該又係長龍店。