Foodie 生活雜誌

7/2021光顧

去大圍揾食，見到呢間cafe幾骨子，加上以蛋做主題，啱哂愛食蛋料理的我。定食味道普通，同food court 出品差不多，反而吐司同甜品賣相靚，啱晒打咭。餐廳好㕵場，平日下午都坐滿，客人輪流轉，假日應該又係長龍店。

招牌吉列玉子芝士定食 吉列蛋沙律，細細件幾精美，格仔碟內有泡菜及芝士絲，似兒童餐。泡菜偏甜，唔好食。加埋沙律及味素白飯，六十零蚊算係咁。

和風烤雞扒定食 同玉子定食的食物一樣，只係玉子轉左做雞扒。雞扒完全唔似烤過，似汁煮多d，麻麻地。

焦糖雞蛋布丁盒子吐司 厚多士烤得金黃，外脆內軟，中間放入滑溜蛋布丁，淋上糖漿，食落一冷一熱好有趣，加埋cream及生果同食，好味。

眼見其他食客點的滑蛋盒子吐司賣相都好吸引，若各位有機會來，點吐司好了，咪學我咁笨點定食。

ice latte

招牌奶蓋咖啡 餐牌寫話含酒精，酒精就飲唔到，但味道咸咸地又滯口，麻麻地，不過用隻荷包蛋做裝飾又幾可愛。

有富士山形狀蛋糕

日系小清新門面，簡潔裝修，一邊廚房水吧，一邊坐位

可愛的小擺設